ཨ་ཁུ་ལགས།


༄། །ཨ་ཁུ་ལགས། ཁྱོད་ཀྱི་སྲན་མ་ལྟ་བུའི་ལུས་ཕུང་གི་སྒྲུབ་ཆ་ནི་དེ་འདྲའི་ལྟ་མི་སྡུག་པ་ལ་ཨང། མིག་བརྒྱད་ཅན། སྟོད་ཕྲ་བ། སྨད་གྲོད་པ་ཆེ་བ། ལྕུག་ཕྲན་བཞིན་དུ་ཡན་ལག་བརྒྱད་པོ་རིང་དུ་རྐྱོང་བ། འགྲོ་བའི་ཚེ་ན་ཆུ་ཤེལ་དར་ལ་གར་སྟབས་བྱེད་པ། ཁྱོད་མཐོང་བའི་མོད་ལ་ཞེད་སྣང་དང་བསུན་སྣང་ཟུང་དུ་བསྡེབས་ཏེ་འོང་བས་ཇི་སྲིད་ཁྱོད་ལེ་དབར་ཁ་ཤས་ས་ལ་མ་བསྐྲད་བར་དེ་སྲིད་དུ་ང་དང་བཟའ་མི་གཉིས་པོ་ལྷོད་དལ་གནས་བཟོད་མི་བདེ་བ་འདུག དེར་བརྟེན་ང་ཡི་འདྲེན་བྱེད་རྙི་ཞགས་ཀྱི་འོག་ནས་ཁྱོད་ལན་རེར་མཐོང་བ་དང། ངས་ཐབས་བརྒྱ་འཇུས་སྟོང་གི་སྒོ་ནས་ཁྱོད་དང་ཁྱོད་ཀྱི་ཁྱིམ་ཚང་གཏོར་བའམ་ཁྱོད་དང་ཁྱོད་ཀྱི་བུ་ཕྲུག་ཁ་འབྲལ་དགོས་པའི་བྱ་ངན་གྱི་སྡིག་ལས་བརྩམས་དགོས་བྱུང་།

ཁྱོད་ནི་དེ་ལས་ལྡོག་སྟེ། ཤ་འཁོན་གྱི་མེ་ལྕེ་རབ་ཏུ་འབར་བཞིན་ང་ཡི་སྙིང་རྗེ་ལག་ངར་འདྲ་བ་དེ་ཡང་རྨེག་མེད་དུ་གཏོང་སླད་སླར་ཡང་ང་ཡི་མདུན་དུ་མཆིས། གལ་ཏེ་ཁྱོད་གནས་དེར་དགའ་སྐྱོ་འདྲེས་མའི་འདས་སོང་གི་ལོ་རྒྱུས་དག་ལ་ཞེན་ཏེ་རང་གི་ཁུང་བུའི་ནང་རོ་ཉལ་བརྒྱབ་ནས་སྡོད་ན་འགྲིགས་ཀྱང་འགྲིགས་ལ། ངས་ཀྱང་ཨ་ཁ་བསམ་པའི་གདུང་བ་བྱེད་སྲིད། འོན་ཀྱང་ཁྱོད་ནི་བསམ་ཤེས་མེད་ཁར་ངེད་ཀྱི་ཆུང་མའི་འབབ་ཆུ་བཞིན་དུ་ལྷོད་པའི་ནག་སྐྲའི་ལྕང་ལོར་ཁྱུད་དེ་མོའི་གཏན་ལྷིང་གི་སྙིང་གར་འབྲུག་སྒྲ་ལྡིར་བ་ལྟར་འཇིགས་གཡེར་དགོས་པ་བཟོས་པ་ལན་གཅིག་མིན། དེར་བརྟེན་ཁྱོད་ཤི་ང་གསོན་གྱི་མཚམས་མེད་ཀྱི་གཡུལ་ས་དེ་ཁྱོད་ཨ་ཁུ་ང་གཉིས་ཀྱིས་བཤམས་པ་མ་ཡིན་ནམ།།


0 མཆན་གྲངས།:

Post a Comment

\\ ཡིག་ཆ་འཚོལ་བཤེར་གནང་།

\\ དྲ་ཚིགས་ཞིག་དགོས་སམ།

weChat: sonamdava
Phone: +91 9805941078
Email: iphoeniz@gmail.com
  • རྒྱལ་སྤྱིའི་བོད་ཀྱི་པེན་ཚོགས་པ།

  • འབྲས་སྤུངས་བློ་གསལ་གླིང་།

  • ཆོས་དུང་དཀར་པོ།

  • སྒོ་མང་དཔེ་མཛོད་ཁང་།

  • ཨ་ནུ་དྲ་བ།

\\ ཡིག་འབྲེལ།

Name

Email *

Message *