བླ་མ་ཁོང་སུ་རེད།


༸རྒྱལ་བ་བསྟན་འཛིན་རྒྱ་མཚོའི་སྐུ་དཔར་འདི་མཐོང་རིམ་བཞིན་མ་བཅོས་དད་པའི་མཚོ་མོ་གཡོ་བ་དང་དུས་མཚུངས་ལྷ་སར་ང་རང་ལོ་བརྒྱད་སོན་པའི་སྐབས་ཀྱི་གནས་ཚུལ་ཆུང་ཆུང་དེ་ཝ་ལེར་འཆར་བྱུང།
ཉིན་ཞིག་མཆོད་གཤོམ་གྱི་སྟེང་དུ་ཞྭ་གསེར་གྱོན་པའི་བླ་མ་གཅིག་གི་འདྲ་དཔར་མཐོང་མ་ཐག “ ཨ་མ་ལགས་བླ་མ་ཁོང་སུ་རེད། ” ཅེས་ནམ་རྒྱུན་ལྟར་འདྲི་རྒྱུ་མང་བའི་སྐད་ཆ་ཞིག་དྲིས་བར་ཐལ། དུས་རྒྱུན་ཨ་མ་ལགས་ཀྱི་སྐད་ཆ་ཆོ་མིན་འདུག་སྙམ་ན་ལན་ཡང་ཡག་པོ་རང་མ་སྐྱོན་པའི་ཁར་དྲི་བ་མང་པོ་བསྐུལ་ན་ཨ་མ་ལགས་ཁོང་མགོ་ན་གི་འདུག་ཅེས་ཀུ་རེ་རྩེད་ཀྱི་རེད། འོན་ཀྱང་ད་རེས་རྣམ་ཀུན་དང་ནམ་ཡང་མི་འདྲ་བར། ངའི་དྲི་བ་དེར་ཨ་མ་ལགས་ལ་མནོ་བསམ་ཞིག་བཏང་དགོས་འཁེལ་བ་འདྲ། ཨ་མ་ལགས་ཀྱིས་ཞལ་འཛུམ་ཞིག་གནང་བ་དང་སྦྲགས་ང་ཁོང་གི་པང་ཁར་སྟེགས་བྱུང་། མཆོད་གཤོམ་ནས་སྐུ་དཔར་དེ་དལ་བུས་མར་ལེན་ཏེ་
ང་ཡི་མགོ་བོའི་སྟེང་གཅིག་བཞག དེ་ནས་སྐུ་དཔར་དེར་གཏད་དེ། “ འདི་ནི་སྐྱབས་མགོན་ཡིད་བཞིན་ནོར་བུ་རེད། བླ་མ་ཧ་ཅང་རྩ་ཆེན་པོ་རེད་དཱ།” ཞེས་ལན་བཏབས་རྗེས་ཁ་ཁུ་སིམ་པར་འགྱུར་སོང་།
ད་རེས་སྐུ་དཔར་ཆུང་ཆུང་དེ་ཨ་མ་ལགས་ཀྱིས་ཉེ་འཁྲིས་སུ་གཏད་དུས་བླ་མའི་གསེར་ཞལ་ཁྲ་ལྷམ་མེར་མངོན་བྱུང། འོན་ཀྱང་བླ་མ་ཁོང་མཇལ་མྱོང་མིན་འདུག་པས། “ ཨ་མ་ལགས། བླ་མ་ཁོང་ད་ལྟ་གང་དུ་བཞུགས་ཡོད་རེད། ” ཅེས་དྲིས་དགོས་བྱུང།
སྐར་ཆ་ཁ་ཤས་རིང་ཨ་མ་ལགས་ནི་འདྲ་སྐུ་བཞིན་དུ་གང་ཡང་མ་གསུངས་པར་མིག་གཉིས་ལས་མིག་ཆུའི་རྡོ་ཤེལ་འཕྲེང་ཐག་ལས་ཆད་པ་ལྟར་ངའི་བྲང་ཁར་འགྲིལ་བྱུང། སྐབས་དེར་ཨ་མ་ལགས་སྤྱན་ཆབ་སིལ་བ་མཐོང་བ་དང་ང་ཡང་སེམས་སྐྱོ་བྱུང།
“ ངས་དྲི་བ་མང་པོ་བསྐུལ་ཙང་ཨ་མ་ལགས་མགོ་ན་བ་ཡིན་ནམ”
“ མ་རེད། མ་རེད།” མིག་ཆུ་ཕྱིས་ནས། “ བླ་མ་ཁོང་ད་ལྟ་ས་ཆ་ཐག་རིང་པོ་ལ་ཡོད་རེད། ”
ང་ལ་དེ་དུས་དྲི་བ་དེ་ལས་མང་བ་བསྐུལ་འདོད་བྱུང། དཔེར་ན་བླ་མ་ཁོང་ས་ཐག་རིང་པོ་ག་བ་ལ་ཡོད་པ་དང། ང་ཚོས་མཇལ་ཐུབ་མིན། པ་ལགས་དང་ཨ་མ་ལགས་གཉིས་པོས་༸རྒྱལ་བ་ཡིད་བཞིན་ནོར་བུ་མཇལ་མྱོང་ཡོད་མེད་སོགས་འདྲི་འདོད་ཧ་ཅང་བྱུང་ཡང་གལ་ཏེ་ངས་ད་དུང་སྐད་ཆ་མུ་མཐུད་དྲིས་ན་ཨ་མ་ངུ་གི་རེད་བསམ་ནས་དྲི་མཚམས་བཞག་པ་ཡིན། དེ་ནས་བཟུང་སྐུ་དཔར་དེས་ངའི་སེམས་ཀྱི་ས་བོན་ངོས་སུ་ཟུབ་མེད་ཀྱི་དད་པ་ཞིག་ཀྱང་བཏབ། ད་ཆ་མི་ཡུལ་དུ་གྱར་ནས་དྲི་བ་དེ་དག་གི་ལན་ཐ་དག་རྙེད་བྱུང་ལ་སྐབས་དེ་དུས་ཨ་མ་ལགས་ཀྱི་སེམས་ཚོར་ཡང་རྟོགས་ཐུབ་བྱུང།

Comments

  1. ཁྱེད་ཀྱི་རྩོམ་འདི་བཀླགས་པ་ཡིན། བསམ་ཚུལ་འདི་འདྲ་ཞིག་མཚོན་བྱེད་དུ། ངས་དེ་སྔོན་ལྷོ་ཕྱོགས་སུ་ག་རེ་ཡོད་དམ་ཞེས་པའི་སྒྲུང་ཐུང་ཞིག་ཀྱང་འབྲི་མྱོང་བ་དེ་དྲན་སོས། མུ་མཐུད་རྩོམ་རིག་གི་ལམ་དུ་ཞུགས་རོགས།

    ReplyDelete
  2. སྐུ་ཉིད་ཀྱིས་བསམ་ཚུལ་གཏོན་པར་ཐུགས་རྗེ་ཆེ། ལྷོ་ཕྱོགས་སུ་ག་རེ་ཡོད་དམ་ཞེས་པའི་སྒྲུང་ཐུང་དེ་ཀློག་འདོད་བྱུང་། ཁྱེད་ནས་སྒྲུང་དེའི་དྲ་ཐག་ཞིག་གནང་བར་ཞུ།

    ReplyDelete

Post a Comment

Popular posts from this blog

Tibetan Font Download བོད་ཡིག་ཡིག་གཟུགས་ཕབས་ལེན།

བོད་ཡིག OCR

གུ་གུལ་ཡིག་བསྒྱུར་ཞབས་ཞུའི་ནང་བོད་ཡིག