མུན་པའི་ཁྲོད་ཀྱི་རྣམ་ཤེས།




དེ་རིང་ལས་མཚམས་བཞག་པ་དང་འཕྲལ་དུ་རང་གི་མལ་ཁང་དུ་ལོགས། ས་གཞི་ཐམས་ཅད་མུན་པས་རབ་ཏུ་བཅོམ་ནས་རང་ཉིད་ཀྱི་གོམ་པའི་འདེགས་འཇོག་ཀྱང་ཚོད་མ་ཟིན་པ་ལྟར་ཁྱར་རེ་ཁྱོར་རེར་འགྱུར། སྒོ་ཁར་བརྒྱབ་པའི་རྒྱ་མིའི་སྒོ་ལྕགས་དེའང་ཁ་མ་གྲོལ་བར་ཡུད་ཙམ་ལུས།
“བལྟས་ངན་སྒོ་ལྕགས་དེའང་འབྱེད་ཁག་པ་ལ་ཨང་”
ནང་ལ་འཛུལ་བ་དང་དབྱར་ཀྱི་ཚ་དྲོད་ཀྱིས་མལ་ཁང་དེའང་ཐབ་ཀྱི་སྟེང་དུ་བཞག་པའི་སླང་ང་ཚ་པོ་ཞིག་དང་འདྲ་བ་ཚ་རླབས་ཀྱིས་བརྒྱས་འདུག
“ཋག ཊག་ ཋག ཊག”
“འོ་ ད་ཡི་ན་གློག་དེ་ཡང་མི་འདུག”
མི་འགྱེལ་བའི་སྒང་ལ་རྡོག་བརྫིས་ཞེས་པའི་དཔེ་ལྟར། ཁེར་རྐྱང་དུ་ལྷག་པའི་དེ་རིང་གི་མི་ངར་མཉས་བཅོས་བྱེད་པ་དང་ཅིས་མི་མཚུངས། “ཧེའོ་” དེ་ལྟར་སེམས་པ་ཡང་ལྷང་ལྷང་པོར་འགྱུར་བ་དང་། ཉལ་ཁྲིའི་ཐོག་ཏོག་ཙམ་གན་རྐྱལ་ལོག་ནས་བསྡད།
ཁེར་རྐྱང་གི་འཚོ་བ་ནི་ཇི་འདྲའི་ཡུད་པོ་ཞིག་ཡིན་པ་དེ་རིང་གཞི་ནས་ཚོར། རང་གཟུགས་མི་མངོན་པའི་མུན་པའི་དབུས་སུ་རང་ཉིད་ཀྱི་རྣམ་ཤེས་ཁོ་ན་ལས་མེད་པ་ཤེས། ཁ་སང་གི་སྣང་བ་སྐྱིད་པའི་སྒྲུང་གཏམ་དག་ལ་དྲན་གསོ་ཞིག་བྱས་རྗེས་། ཕུགས་འདུན་ལ་འོད་ཟེར་ཞིག་འཆར་བའི་སྨོན་འདེབས་གཅིག་བྱས།

Comments

Popular posts from this blog

Tibetan Font Download བོད་ཡིག་ཡིག་གཟུགས་ཕབས་ལེན།

བོད་ཡིག OCR

གུ་གུལ་ཡིག་བསྒྱུར་ཞབས་ཞུའི་ནང་བོད་ཡིག