བརྩེ་སེམས་ཀྱིས་བཅོམ་པའི་གཞོན་ནུ། དང་པོ།


དུས་ཚིགས་གསུམ་པའི་ཡིག་རྒྱུགས་འཚར་བ་དང་དགུང་གསེང་ལ་འགྲོ་རྒྱུའི་དངངས་འཚབ་ཞིག་ལངས་པ་སུས་ཀྱང་ཟུར་བལྟས་ལེབ་མཐོང་རེད། སློབ་གྲོགས་ཕན་ཚུན་དབར་ཧ་ལམ་དགུང་གསེང་སུ་སྔོན་ལ་ཤོར་ཐུབ་ན་གཟི་བརྗིད་ཡིན་པའི་བཟོ་འདྲ་བོ་ཞིག་སྣང་། དེ་དབར་ལ་འཛིན་རོམ་བཅུ་གཅིག་ནང་ཡོད་པའི་སློབ་བུ་དོན་གྲུབ་ཡང་དགོངས་ཤོག་གསེར་པོ་དེ་རག་རྒྱུར་ཕར་རྒྱུགས་ཚུར་རྒྱུགས་ལན་མང་བྱས་རྗེས་གཞི་ནས་དགོངས་པ་རག་ཐུབ་ཙམ་བྱུང་འདུག །ངས་ཤེས་གསལ་ལ་དེ་སྔོན་ཁོང་ལ་ཨ་ཁུ་ཞིག་ཡོད་ངེས་ཀྱང་ད་རེས་དགོངས་གསེང་ལེན་དུ་ཡོང་མཁན་གྱི་ཨ་ཁུ་དེ་མཐོང་མ་མྱོང་བ་ཞིག་འདུག །ཡ་མཚན་པ་ཞིག་ལ་དོན་གྲུབ་དང་ཨ་ཁུ་དེ་གཉིས་མེག་ལཱོར་གྷནྗ་ལ་སླེབས་མ་ཐག་སོ་སོར་འགྱེས་སོང་།
དོན་གྲུབ་ཁོ་རང་གཅིག་པོ་དྷ་ཤོད་སྤྱི་སྤྱོད་རླངས་འཁོར་འབབ་ཚུགས་སུ་འབྱོར་བ་དང་སྤྱི་སྤྱོད་རླངས་འཁོར་ཞིག་གི་ཐོག་བསྡད། དེ་རིང་གི་གནམ་གཤིས་དེ་སྔར་རྒྱུན་ལས་ཏོག་ཙམ་གྲང་དུ་ཕྱིན་ཡོད་འདྲ། དོན་གྲུབ་ཀྱིས་རང་གི་སྟོད་ཕད་ལས་ཥོལ་ཞིག་བཏོན་ནས་གྱོན། སྐར་མ་གཉིས་ཙམ་རྗེས་ཁ་པར་གྱི་སྐད་སྒྲ་ཞིག་བསྒྲགས་འོང་། གོས་ཐུང་ཁུག་མ་ནས་ཁ་པར་བཏོན་ནས་བལྟ་སྐབས་ངོ་ཤེས་པའི་ཨང་ཀི་འཆར་བས་ཁོས་འཛུམ་ཞིག་བྱས་པ་དང་ཁ་པར་དེ་ལེན།
“hi དོན་གྲུབ། དགོངས་པ་རགས་སོང་ངས།” དེ་ནི་བུ་མོ་ཞིག་སྐད་སྒྲ་རེད་འདུག
“རགས་བྱུང་། ད་ལྟ་ bus ནང་བསྡད་འགྲོ་ཡིན། སང་ཞོགས་ཆུ་ཚོད་ ༥ ལ་འབྱོར་གྱི་རེད།”
“བྱས་ན་ངས་རང་ཤམ་བྷ་ལའི་མགྲོན་ཁང་ནང་བསྒུག་མཆོག MT འབྱོར་བ་དང་ང་ལ་ཁ་པར་བཏང་ཨཱ།”
“ངས་ཧ་གོ་སོང་། See you”

དོན་གྲུབ་ཀྱིས་ཁ་པར་གསད་པ་དང་ངོ་གདོང་ལ་དགའ་སྤྲོས་ཁེངས་པམ་ཡང་འདྲེན་འབྱེད་ཀྱི་འོག་ཏུ་མིག་ཆུའང་འཁོར་། ཁོ་བོས་འདས་སོང་གི་གནས་ཚུལ་རེ་རེ་བཞིན་དྲན་གསོ་བྱས།

དོན་གྲུབ་ཀྱིས་ཀུན་གསལ་ཐོག་མར་འཛིན་གྲྭ་བརྒྱད་པའི་སྐབས་མཐོང་མྱོང་། ཀུན་གསལ་ལ་ཕ་ཆང་རྐྱལ་ཡིན་པ་དང་། མིའི་ས་ནས་བུ་ལོན་མང་པོ་བཟོས་ཙང་ཨ་མ་བྲོས་པ་སོགས་ཀྱི་ནང་མིའི་དཀའ་ངལ་སྐོར་གྱི་གནས་ཚུལ་ཏོག་ཙམ་ཤེས་རྗེས་དོན་གྲུབ་ཀྱི་ཀུན་གསལ་ལ་དམིགས་བསལ་གྱི་སེམས་ཁུར་དང་སློབ་སྦྱོང་ལ་རོགས་རམ་གང་ཐུབ་བྱེད་ཀྱི་ཡོད། ཀུན་གསལ་ཡང་དོན་གྲུབ་མ་གཏོགས་སློབ་གྲོགས་གཞན་སུ་དང་ཡང་མཉམ་དུ་འབྲེལ་དྲིས་དེ་ཙམ་མེད། དེ་ལྟར་འཛིན་གྲྭ་བཅུ་པ་བར་ཁོ་གཉིས་གཉམ་དུ་བསྐྱོད་ཐུབ་པ་བྱུང་། དོན་གྲུབ་ནི་སློབ་སྦྱོང་དང་ཀུན་སྤྱོད་གང་གི་ཐད་ཧ་ཅང་ལེགས་པས་དགེ་རྒན་ལས་བྱེད་ཀུན་གྱི་བསྟོད་ཡུལ་འགྱུར་ཡོད། ཀུན་གསལ་ནི་མི་དང་འབྲེལ་དྲིས་མེད་པ་དང་། དུས་རྒྱུན་ནས་ཁ་ཁུ་སིམ་པོར་བསྡད་ཀྱི་ཡོད་པས་དགེ་རྒན་འགས་ཁོ་མོ་སློབ་གྲྭའི་ནང་ཡོད་མེད་ཀྱང་ཧ་གོ་གི་མིན་འདུག་ཅེས་ལབ་མྱོང་། ཁོ་མོའི་དཀར་གདངས་ཀྱི་ངོ་གདོང་དང་འབུར་དུ་མཐོན་པའི་མཆུ་དམར་དེ་བཞིན་གཞི་འཇམ་པའི་གཤིས་ཀ་ཞིག་ཡོད་པས་སློབ་གྲྭའི་ནང་བུ་མང་པོ་རེ་བ་བཅངས་ཀྱང་ཁོ་མོས་ཁ་ཡ་ཚིག་གཅིག་ཀྱང་བྱས་མ་མྱོང་།

ཐེངས་གཅིག་འཛིན་གྲྭ་བཅུ་པའི་ལོ་འཇུག་ཙམ་ལ་ཀུན་གསལ་གྱི་ཨ་ཕ་སློབ་གྲྭར་གློ་བུར་དུ་སླེབས་ན་ཁོ་མོ་སློབ་གྲྭ་ནས་རྩ་དགོངས་ཞུས་ནས་འཁྲིད་ཕྱིན་པ་རེད། དོན་གྲུབ་ལ་ཚོན་ན་དེ་ནི་བློ་ཡུལ་འདས་པའི་གནས་ཚུལ་ཆགས། དེ་ནས་བཟུང་ཀུན་གསལ་ཞེས་པའི་བུ་མོ་དེ་སློབ་གྲྭའི་འཁོར་ཡུག་དེ་ནས་རྩ་བ་ནས་མཐོང་རྒྱུ་མེད་པ་འགྱུར།

“ MTBaisab MT !  MT,”
དོན་གྲུབ་གློ་བུར་དུ་གཉིད་བསད་དུས་ལྡི་ལི་ MT ལ་སླེབས་པ་ཤེས།

Comments

Popular posts from this blog

Tibetan Font Download བོད་ཡིག་ཡིག་གཟུགས་ཕབས་ལེན།

བོད་ཡིག OCR

གུ་གུལ་ཡིག་བསྒྱུར་ཞབས་ཞུའི་ནང་བོད་ཡིག