དྲ་ཐོག་ཉེན་སྲུང་གི་དཔའ་བོ། www.cybersuperhero.net

 

དྲ་ཐོག་ཉེན་སྲུང་གི་དཔའ་བོ་ཞེས་པའི་ལས་འཆར་འདི་ནི་བོད་དོན་ལས་འགུལ་བསྟི་གནས་ཁང་གིས་གཙོ་སྐྱོང་བྱེད་ཀྱི་ཡོད་པ་དང་། དྲ་ཚིགས་དེ་ནི་ བོད་དབྱིན་རྒྱ་གསུམ་གྱི་སྐད་ཡིག་བརྒྱུད་ནས་གློག་ཀླད་དང་ཁ་པར་དྲ་རྒྱ་སོགས་ཀྱི་ཉེན་སྲུང་ཤེས་བྱ་སློབ་སྟོན་བྱེད་ཀྱི་ཡོད་འདུག དྲ་ཚིགས་འདི་དམིགས་ཡུལ་དང་ལས་གཞི་འདི་བཙུགས་དགོས་དོན་ནི།
བོད་དོན་ལས་འགུལ་བསྟི་གནས་ཁང་གིས་བོད་རང་དབང་གི་ལས་འགུལ་རྒྱ་བསྐྱེད་པའི་ཆེད་དུ། དྲ་བའི་བརྡ་འཕྲིན་འབྲེལ་ལམ་གྱི་སྟོབས་ཤུགས་དང་ཐབས་ཇུས་ལྡན་པའི་ཞི་བའི་ལས་འགུལ་གཉིས་ཟུང་དུ་སྦྲེལ་གྱི་ཡོད། ང་ཚོས་དཔུང་རོགས་བསྐྲུན་པ་དང་ལྷན་དུ་ང་ཚོའི་ཉམས་མྱོང་དག་གཉའ་གནོན་དྲག་པོ་མྱོང་བཞིན་པའི་མི་སྡེའི་སྤྱི་ཚོགས་གཞན་ལ་ཡང་ཁྱབ་སྤེལ་བྱེད་ཀྱི་ཡོད།
དྲ་ཐོག་ནས་བོད་མིར་འཇབ་རྒོལ་དམིགས་འབེན་ཏུ་བཟུང་བའི་གནས་ཚུལ་རིགས་བྱུང་ནས་ལོ་ངོ་བཅུ་གྲངས་ལྷག་འགྲོ་གི་ཡོད་ཅིང་། བོད་མི་རྣམས་ཀྱིས་ཀྱང་གསང་མྱུལ་དང་བྱ་རའི་གནད་དོན་རིགས་ལ་འཐབ་མོ་བྱེད་པའི་ཐབས་ལམ་བསྐྲུན་དགོས་བྱུང་ཡོད་པ་མ་ཟད། ལག་འཁྱེར་ཁ་པར་དང་དྲ་ཐོག་གི་འབྲེལ་བ་ཁག་ལ་ཉེན་སྲུང་ཡག་པོ་བྱེད་དགོས་བ་གཙིགས་སུ་བཟུང་ཡོད། བོད་དོན་ལས་འགུལ་བསྟི་གནས་ཁང་གིས་བོད་ཕྱི་ནང་གི་བོད་མི་རྣམས་ཀྱི་བདེ་འཇགས་ཤུགས་ཆེ་རུ་གཏོང་བ་དམིགས་ཡུལ་དུ་བཟུང་ནས། གསར་གཏོད་རང་བཞིན་གྱི་ཟབ་སྦྱོང་དང་ཤེས་ཡོན། འཕྲུལ་རིག་ལས་གཞི་བཅས་ཡར་རྒྱས་དང་ལག་ལེན་ཏུ་བསྟར་བཞིན་ཡོད།
དྲ་ཚིགས་ཁ་བྱང་ནི། www.cybersuperhero.net

དྲ་རྒྱའི་ནང་གི་བོད་མི་ཚོར་ཕུལ་བའི་གཏམ།

 

རྩོམ་ཡིག་ཡོངས་ཁུངསས། གློག་ཀླད་སློབ་གླིང་གི་རྩོམ་སྒྲིག་པ། ཟངས་དཀརཿཚུལ་ཁྲིམས།

༡༽ དྲ་ཚིགས་ཀྱི་སྐོར།

ང་ཚོའི་ལོངས་སྤྱོད་ཀྱི་དུས་རབས་འདི་ནི་ཆ་འཕྲིན་དང་ཚོང་ལས་ཀྱི་དུས་རབས་ཤིག་ཡིན་ན། ང་ཚོ་བོད་མི་རྣམས་ཀྱང་ཆ་འཕྲིན་ལག་རྩལ་གྱི་ལས་ལ་ཞུགས་ཏེ། དྲ་ཚིགས་མི་ཉུང་བ་ཞིག་གཅིག་རྗེས་གཉིས་མཐུད་ཀྱིས་འགྲེམས་སྤེལ་བྱས་པ་འདི་བསྔགས་པར་འོས་པའི་དོན་ཆེན་ཞིག་ཅི་ལ་མིན། དེ་བས་བོད་ཀྱི་དྲ་ཚིགས་ཀྱི་སྐོར་ལ་བསམ་བློ་གཏོང་བའི་འདུན་པ་ཞིག་ངང་གིས་སྐྱེས་བྱུང་།

༢༽ དྲ་ཚིགས་ཀྱི་བརྗོད་བྱའི་སྐོར།

མིག་སྔར་བོད་ཡིག་དྲ་ཚིགས་མང་པོ་ཡོད་མོད། ཆེད་ལས་རང་བཞིན་ལྡན་པ་དང་རང་རྐྱ་འཕེར་བའི་དྲ་ཚིགས་ཤིག་བྱུང་མེད།མིག་སྔའི་དྲ་ཚིགས་རེ་རེའི་བརྗོད་བྱ་ལའང་། འབོལ་རྩོམ། དཔྱད་རྩོམ། བཅད་རྩོམ། འགྱུར་རྩོམ། བརྩམས་སྒྲུང་། སྙན་ངག དགག་སྒྲུབ། བཅར་འདྲི། གསར་འགྱུར། འོས་སྦྱོར། ཟིན་བྲིས། གློག་བརྙན། རྒྱུན་ཤེས། བརྡ་འཕྲིན། ཆབ་སྲིད་སོགས་འདུས་ཡོད། དེ་བས་ཧོབ་སྟེ་བལྟས་ན་ཕུན་སུམ་ཚོགས་པ་ལྟར་སྣང་ཡང་། དོན་ལ་ཕན་པ་ཆེ་བའི་རྩོམ་ཡིག་ཉུང་ཉུང་རེད། དཔེར་ན། ལོ་རྒྱུས་ཞིབ་འཇུག་པ་ཞིག་ལ་དཔྱད་གཞིའི་དགོས་མཁོ་བྱུང་ཚེ། ལོ་རྒྱུས་ཆེད་གཉེར་གྱི་དྲ་ཚིགས་དང་དྲ་རྩོམ་རྙེད་དུ་མེད་པ་ལྟ་བུ་རེད། དེ་བཞིན་དྲ་ཚིགས་ཕལ་ཆེ་བས་རྩོམ་ཡིག་རྣམས་དྲ་ཚིགས་གཞན་ནས་བརྒྱུད་འགོད་བྱས་པ་ མང་དྲགས་པས་དྲ་ཚིགས་ཕལ་ཆེ་བའི་བརྗོད་བྱ་གཅིག་མཚུངས་ལྟ་བུར་གྱུར་ཡོད་པ་མ་ཟད། གསར་འགྱུར་ཁུངས་ལྡན་ཞིག་ཀྱང་རྙེད་དཀའ་བ་སྟེ། གསར་འགྱུར་ཐོག་མར་སྤེལ་མཁན་དྲ་ཚིགས་དེས་ནོར་ཚེ། དྲ་ཚིགས་གཞན་ཚང་མས་ནོར་བ་དེ་ག་རང་སྤེལ་འགྲོ་བ་རེད། དེ་བས་ང་ཚོ་ལ་ཆེད་ལས་རང་བཞིན་ལྡན་པ་དང་རང་རྐྱ་འཕེར་བའི་དྲ་ཚིགས་དགོས་པ་སྟེ། བོད་ཀྱི་གསར་འགྱུར་ཁང་། བོད་ཀྱི་གློག་བརྙན་ཁང་། རིག་གནས་དགག་སྒྲུབ་གླིང་། ཟེར་བ་ལྟ་བུའི་དྲ་ཚིགས་ཚད་ལྡན་རེ་ཡོད་ན་ཅི་མ་རུང་།

༣༽ དྲ་ཚིགས་བཟོ་བཀོད་ཀྱི་སྐོར།

བོད་ཕྱི་ནང་གི་དྲ་ཚིགས་འགའི་བཟོད་བཀོད་རྒྱ་ནག་གི་དྲ་ཚིགས་རྣམས་དང་འདྲ་བར་པར་རིས་སོགས་ཁྲ་ཁྲའི་རིགས་བེད་སྤྱོད་བྱས་པ་མང་དྲགས་པས་དྲ་ཚིགས་ཀློག་མཁན་མང་པོར་རང་བཞིན་གྱིས་དཀའ་ངལ་ཞིག་འཕྲད་བཞིན་ཡོད། དེ་ནི་དྲ་རྒྱའི་བརྒྱུད་ལམ་ཡག་པོ་མེད་ཚེ་དྲ་ཚིགས་སྔོགས་མི་ཐུབ་པའམ། སྔོགས་སྐབས་ཆུ་ཚོད་མང་པོ་ཆུད་ཟོས་གཏོང་བ་སོགས་རེད། དེ་བས་དྲ་ཚིགས་བཟོ་སྐབས་པར་རིས་སོགས་ཉུང་རུ་གཏོང་དགོས་པ་དང་། བོད་ཀྱི་དྲ་ཚིགས་ལ་བོད་རང་གི་ཁྱད་ཆོས་ཡོད་དགོས་པར་མ་ཟད། བོད་ཡིག་དྲ་ཚིགས་ཤིག་ཡིན་ན་དྲ་ཚིགས་ཀྱི་གཙོ་ངོས་དང་། ཟིན་བྲིས། མཆན་བུ་ཡོངས་རྫོགས་བོད་ཡིག་ཏུ་ཡོད་དགོས་པར་འདོད།

༤༽ དྲ་རྩོམ་གྱི་སྐོར།

ད་ལྟའི་ཆར་བོད་ཀྱི་དྲ་རྩོམ་མང་ཆེ་བ་སྤེལ་མཁན་ན་གཞོན་ཉུང་ཤས་ཤིག་ཡིན་པ་ལས་བོད་ཀྱི་མཁས་པ་མང་པོ་ཞིག་གི་རྩོམ་ཡིག་དྲ་ཚིགས་སུ་སྤེལ་གྱི་མེད། དེ་བས་དྲ་ཚིགས་རྩོམ་སྒྲིག་པ་རྣམས་ཀྱིས་རྩོམ་ཡིག་ལ་སྒུག་ནས་མི་སྡོད་པར་དྲ་ ཚིགས་སོ་སོའི་བརྗོད་བྱ་དང་འབྲེལ་ཡོད་ཆེད་མཁས་པ་དང་རྩོམ་པ་པོར་འབྲེལ་བ་བྱས་ཏེ་རྩོམ་ཡིག་འབྲི་བ་དང་སྤེལ་བའི་རེ་སྐུལ་བྱེད་དགོས་པར་འདོད།

༥༽ ཟིན་བྲིས་པའི་སྐོར།

བོད་ཕྱི་ནང་གི་ཟིན་བྲིས་པ་མང་པོ་ཞིག་གིས་ཟིན་བྲིས་སྤེལ་སྐབས་ཡིག་ནོར་མང་བ་དང་། བརྡ་སྤྲོད་དང་མི་མཐུན་པ། ཁ་སྐད་སོགས་ཀྱི་ལམ་ནས་འབྲི་བཞིན་ཡོད། ཤུགས་རྐྱེན་དེས་ཟིན་བྲིས་དྲ་ཚིགས་རྣམས་ཡི་གེའི་རྙིགས་རོ་གསོགས་ས་ལྟ་བུར་གྱུར་ཡོད། དེ་བས་ཟིན་བྲིས་པ་ཚོས་ཟིན་བྲིས་སྤེལ་བ་དང་མཆན་བུ་འདེབས་པ་གང་གི་སྐབས་སུའང་ཐུགས་སྣང་བྱེད་དགོས་པར་མ་ཟད། དྲ་ཚིགས་སོ་སོའི་རྩོམ་སྒྲིག་པ་རྣམས་ཀྱི་བདེ་འཇགས་དང་། ཐོབ་ཐང་། ཆ་རྐྱེན་སོགས་ལ་བརྩི་བཀུར་གྱིས་རང་སྣང་གང་དྲན་མི་བྱེད་པར་འཚལ།

༦༽ དྲ་རྒྱ་བེད་སྤྱོད་བྱེད་སྟངས་སྐོར།

སྤྱིར་དྲ་རྒྱ་འདི་མི་མང་པོས་ཤེས་ཡོན་སློབ་སྦྱོང་དང་། སྤྱི་ཚོགས་འབྲེལ་མཐུད། བསམ་ཚུལ་སྤེལ་རེས་སོགས་ཀྱི་ཆེད་བེད་སྤྱོད་གཏོང་གི་ཡོད་ལ། ཡང་འགའ་ཞིག་རྩེད་མོ་རྩེ་བ། རྒྱན་འཇོག་པ། གང་བྱུང་དགའ་རོགས་སྒྲིག་པ། འཆལ་གཏམ་འདྲ་མིན་སྤེལ་བ་སོགས་ཀྱི་ལམ་ནས་བེད་སྤྱོད་བྱེད་མཁན་ཡང་ཡོད། ང་ཚོ་བོད་ལ་ཡང་དེ་བཞིན་རེད། པོད་ཁུག་དང་མཆན་བུ་སོགས་སུ་འཆལ་གཏམ་སྤེལ་ཏེ། ཆོལ་ཁ་དང་། ཆོས་ལུགས། ལུང་ཚན་དཀྲུགས་མཁན་ཡོད་ལ། ངོ་དེབ་དང་། ( Facebook )ཁེས་ཁེས( QQ )སོགས་ནས་དགའ་རོགས་སྒྲིག་མཁན་ཡང་ཡོད། དེ་བཞིན་རྒྱན་འཇོག་དང་རྩེད་མོས་དུས་འདའ་མཁན་ཡང་མང་པོ་རེད། དེའི་ཕྱིར་ང་ཚོ་སུ་ཡིན་ཡང་དྲ་རྒྱ་འདི་བེད་སྤྱོད་ཡག་པོ་གཏོང་རྒྱུ་ནི་ཤིན་ཏུ་ནས་ཀྱང་གལ་ཆེ་བར་སེམས་སོ།

དེ་ལས་མང་བ་གཟིགས་འདོད་ན། གློག་ཀླད་སློབ་གླིང་དུ་ཕེབས་རོགས། www.loklad.com

ePub Maker : ཡིག་ཚང་མཉེན་ཆས་ word ནས་ epub འཕྲུལ་དེབ་བཟོ་ཆེད།

 

དེང་བོད་མི་མང་པོ་ཞིག་ལ་དྲ་ཐོག་ནས་འཕྲུལ་དེབ་འདྲ་མིན་ཕབས་ལེན་དང་ཀློག་རྒྱུ་བྱུང་བར་ཧ་ཅང་དགའ་འཚོར་སྐྱེས་ཀྱི་ཡོད། དེ་བས་མི་མང་པོ་ཞིག་གི་སེམས་སུ་རང་ངོས་ནས་ཀྱང་འཕྲུལ་དེབ་གཅིག་བཟོ་ཐུབ་ན་སྙམ་པའི་རེ་བ་ཞིག་བྱས་མྱོང་ཡོད་ཤས་ཆེ། དེ་སྔོན་འཕྲུལ་དེབ་བཟོ་མཁན་ཁ་ཤས་ཀྱི་འཕྲུལ་དེབ་མི་ཉུང་བ་ཞིག་བཟོས་ཡོད་ཀྱང་། འཕྲུལ་དེབ་དེ་དག་བཟོ་སྐབས་གོ་རིམ་མང་པོ་རྒྱུད་དགོས་པ་དང་། དམིགས་བསལ་གྱི་མཉེན་ཆས་ Indesign དེ་འདྲ་ཡང་སྤྱད་དགོས་ཀྱི་ཡོད།

འོན་ཀྱང་དེ་རིང་དེར་གུས་པས་ཁྱེད་ལ་ངོ་སྤྲོད་བྱེད་པའི་མཉེན་ཆས་ ePub Maker ཟེར་བ་དེས་ཁྱེད་ཀྱིས་རྒྱུན་པར་གོམས་དྲིས་ཡོད་པའི་ཡིག་ཚང་མཉེན་ཆས་ Word ཞིག་གི་ནང་དེབ་ཀྱི་ནང་དོན་ཆ་ཚང་བཀོད་ཟིན་པ་རྣམས་མགོ་རྙོགས་དང་དཀའ་ཚེགས་གང་ཡང་མེད་པར་འཕྲུལ་དེབ་ལམ་སེང་བཟོ་སྒྲུབ་ཐུབ་ཀྱི་ཡོད།

མཉེན་ཆས་དེ་སྟབས་བདེ་པོ་དང་འཕྲུལ་དེབ་བཟོ་སྐབས་འཕྲུལ་དེབ་ཀྱི་སྒྲིག་སྲོལ་ཆ་ཚང་བརྩི་སྲུང་བྱེད་པ་དང་། འཕྲུལ་དེབ་ལེགས་པོ་དང་ཆ་ཚང་པོ་ཞིག་ཡོང་བའི་ཁྱད་ཆོས་ལྡན་ཡོད། དཔེར་ན།

  • ཁ་ཤོག་(རྒྱབ་ཤ) དང་ དེབ་ཀྱི་ངོ་སྤྲོད། རྩོམ་པ་པོོ། སྤེལ་དུས་སོགས་བཀོད་བདེ་བ།
  • ནང་དོན་གྱི་ལིའུམ་རབ་བྱེད་དབྱེ་གསེས་བྱེད་པ།
  • དཀར་ཆག་རྣམས་རང་འགུལ་གྱིས་སྒྲིག་པ།
  • འཕྲུལ་དེབ་ཀྱི་སྒྲིག་སྲོལ་ལྡན་པ།
  • ནང་དོན་ནང་དྲ་ཚིགས་དང་དྲ་ཐག་བཀོད་ཐུབ་པ།
  • སྐད་ཡིག་དང་ཡིག་གཟུགས་གང་ཡང་བཀོད་ཐུབ་པ།
  • བཟོས་ཟིན་པའི་འཕྲུལ་དེབ་རྣམས་ Adobe དང་ ཀུ་ཤུ་རྟགས་ཅན་ནང་བལྟ་ཐུབ་པ།
  • སྐར་ཁུང་མ་ལགས་ windowXP, Vista, Win7, Win8 ནང་མཉེན་ཆས་འགྲོ་ཐུབ།
  • ཡིག་ཚང་མཉེན་ཆས་ Word2003 དང་ Word2007, Word2010, Word2013 སྤྱད་དེ་བཟོས་པའི་ཡིག་ཆ་རྣམས་འཕྲུལ་དེབ་ཀྱི་ངོ་བོར་བསྒྱུར་ཐུབ་པ།

གློག་ཀླད་ནང་སྒྲིག་འཇུག་བྱེད་སྟངས།

༡༽ ཡིག་ཁུག་ནང་སྐར་ཁུང་ bit64 དང་ bit 32 ཅན་གཉིས་ཀའི་ཆེད་དུ་བཙིར་ཆས་ལོགས་སུ་ཡོད་པས་རང་ཉིད་ཀྱི་གློག་ཀླད་ལ་གཞིགས་ཏེ་ནང་འཇུག་བྱེད་དགོས།
༢༽ ནང་འཇུག་སྒྲུབ་པ་དང་། key ཟེར་བའི་ཡིག་ཁུག་ནང་ཡོད་པའི་ཡིག་ཆ་ rarreg.key དེ་གློག་ཀླད་ཀྱི་ C:\Program Files\WinRAR\ ནང་བཤུ་འཇོག་བྱེད་ན་ད་བཟོད་གསང་ཟ་བསྟོར་ཟིན་པ་དང་། མཉེན་ཆས་དེ་བེད་སྤྱོད་གཏོང་ཐུབ།

གཤམ་གྱི་བརྙན་ཟློས་ལ་གཟིགས།

གལ་ཏེ་འཕྲུལ་དེབ་བཟོ་སྟངས་ཤེས་འདོད་ན། འདིར་གཟིགས།
བཟོས་ཟིན་པའི་འཕྲུལ་དེབ་རྣམས་དྲ་མྱུལ་མཉེན་ཆས་ firefox དང་ chrome ནས་བལྟ་སྟངས་་་འདིར་གཟིགས།

མཉེན་ཆས་ཕབ་ལེན།

ཡིག་ཆ་ཆེ་ཆུང་ 1.8 MB
ePub Maker version1.8
མཉེན་ཆས་ཕབ་ལེན་གནང་།

ཨན་ཌོའི་གློག་ཆས་ཀྱི་ཡིག་གཟུགས་བརྗེ་བསྒྱུར་མཉེན་ཆས་ iFont པར་གཞི་ 5.1 གསར་ཐོན།

 

iFont མཉེན་ཆས་དེ་ནི་རང་ཉིད་ཀྱི་ཨན་ཌོའི་ཁ་པར་དང་། ཨན་ཌོའི་གློག་ཆས་སོགས་ཀྱི་ནང་ཤར་བའི་ཡིག་གཟུགས་བརྗེ་བསྒྱུར་བྱེད་ཆས་ཞིག་ཡིན། མཉེན་ཆས་དེས་དབྱིན་ཡིག་གི་ཡིག་གཟུགས་བརྗེ་ཐུབ་པ་མ་ཚད། ཀོ་རི་ཡ་དང། ཉི་ཧོང་། ཨེ་རབ། ཨུ་རུ་སུ། ཧྥ་རན་སི། སེ་པན། ཝེ་ཊི་ནམ། བོད་ཡིག་སོགས་ཀྱི་ཡིག་གཟུགས་བརྗེ་ཐུབ། རང་ཉིད་ཀྱི་ཨན་ཌོའི་ཁ་པར་ནང་བོད་ཡིག་མི་ཤར་བ་དེ་འདྲ་ཡོད་ན། iFont མཉེན་ཆས་དེ་སྒྲིག་འཇུག་བྱེད་ནས་ཚོད་ལྟ་ཞིག་བྱེད་ན། བོད་ཡིག་མི་ཤར་བའི་དཀའ་ངལ་དེ་སེལ་ཐུབ་ངེས་རེད།

ཕྱི་ཟླ་ ༩ ཚེས་ ༤ ཉིན་ iFont པར་གཞི་གསར་པ་ཞིག་ཐོན་ཡོད་པ་དང་། མཉེན་ཆས་དེའི་ནང་དེ་སྔོན་གྱི་བོད་ཡིག་ཡིག་གཟུགས་ ༡༦ དེ་རང་ལས་དེའི་སྟེང་ཡིག་གཟུགས་གསར་པ་ཁ་སྣོན་དམིགས་བསལ་བྱེད་མིན་འདུག །འོན་ཀྱང་མཉེན་ཆས་ཀྱི་སྒྲོམ་གཞི་དང་། འདེམས་ག་ཁ་གསལ་དུ་བཏང་ཡོད་པ་མ་ཚད། Samsung Galaxy S3, S4, Notee, Note II, XiaoMi, Meizu, HuaWei, སོགས་ཀྱི་ནང་ཡིག་གཟུགས་བརྗེད་བསྒྱུར་བྱེད་པའི་སྐབས་ རུ་ཊི (root) བྱེད་མི་དགོས། HTC, Sony, Motorola, Karbonn, Micromax ཀྱི་ཁ་པར་ཡིན་ན་ རུ་ཊི (rooted phone) བྱེད་དགོས་པ་དང་། དེ་ནས་ iFont སྒྲིག་འཇུག་བྱེད་ན་ཡིག་གཟུགས་བརྗེད་པོ་བརྒྱག་ཐུབ།

མཉེན་ཆས་ཕབ་ལེན།

iFont ཡིག་ཆ་ཆེ་ཆུང་ 5.1MB

སློབ་ཆེན་པ་ཞེས་པའི་མཉེན་ཆས་གསར་བ་ཞིག་ངོ་སྤྲོད།

 
གནས་ཚུལ་ཡོངས་ཁུངས། བཙན་པོའི་འགར་གྱི་དྲ་བ།

མཛའ་ཤིང་བརྩེ་བའི་གྲོགས་པོ་རྣམས་པ། ཡང་ན་རྩོམ་པོ་རྣམས་པ། སློབ་ཆེན་པ་ཞེས་པའི་ཁ་པར་མཉེན་ཆས་འདི་ཟླ་༤བའི་ཚེས་༡༩་ཉིན་དངོས་སུ་བཀྲམས་པ་རེད། མཉེན་ཆས་འདི་ནི་ཀུ་ཤུ་དང་ཨན་ཏྲོ་མ་ལག་གཉི་ཀར་འཇུག་ཐུབ་པའི་བོད་ཡིག་རྩོམ་འབྲིའི་ཡོ་ཆས་ཤིག་ཡིན་པར་མ་ཟད། དྲྭ་ཐོག་སྨྱན་བྱེད་དཔེ་མེད་ཅིག་ཡིན་པ་དང་། དྲྭ་ཐོག་རྩོམ་དེབ་ལེགས་པོ་ཞིག་ཏུ་འགྱུར་བཞིན་པ་ན། འདིར་ཆེད་དུ་སློབ་ཆེན་པའི་མཉེན་ཆས་ངོ་སྤྲོད་དང་འབྲེལ་གསལ་བརྡ་ཞིག་གཏོང་དགོས་བསམ།

མཉེན་ཆས་འདི་བསྒྲུབས་པའི་དམིགས་ཡུལ།

མཉེན་ཆས་འདི་བསྒྲུབས་པའི་དམིགས་ཡུལ་ནི་འདི་ལྟ་སྟེ། ཆེད་དུ་སློབ་ཆེན་པ་ཞེས་མིང་ཆེན་པོ་དེ་ཁོལ་དུ་བྱུང་ནས། བོད་ཀྱི་སྐད་ཡིག་དང་རིག་གནས་སྦྱངས་ཏེ་གྲོང་ཁྱེར་དང་གྲོང་ཁྱེར་མྱུལ་ནས། ཆེད་ལས་དང་ཐོབ་ཐང་གླེང་ཞོར་རང་དོན་འབའ་ཞིག་ལ་གཞོལ་བའི་སློབ་ཆེན་པ་དང་། སྤྱི་ཚོགས་དངོས་ཀྱི་ངོ་གདོང་ནས་རང་ཉིད་ཀྱི་འཚོ་གནས་ཙམ་མ་ཟད་མིའི་འཚོ་གནས་གླེང་བར་སྤྲོ་བའི་ལང་ཚོ་དང་དཔའ་སྐད་ཡོད་པའི་སློབ་ཆེན་པ་རེ་ཟུང་། ད་དུང་རིག་གནས་ཤིག་དང་བསམ་བློ་ཞིག ལྟ་བ་ཞིག་དང་ལྟ་ཚུལ་ཞིག  མདོར་ན་མི་སྒེར་གྱི་ལྟ་བ་ཞིག་འདོན་ལ་མཁས་པའི་སློབ་ཆེན་པ་ཁ་ཅིག་བཅས་ལ། ཤར་ལྷོ་ནུང་བྱང་གང་ན་བསྡད་ཀྱང་། མདོ་དབུས་ཁམས་གསུམ་གང་དུ་གནས་ཀྱང་། སློབ་ཆེན་པ་ཞེས་པའི་མིང་བྱང་འདི་བླངས་པ་ནས་བཟུང་ང་ཚོར་བགྲོ་གླེང་བྱེད་ས་ཞིག་དང་། འབྲེལ་འདྲེས་བྱེད་ས་ཞིག མཉམ་འུར་བྱེད་ས་ཞིག རྒྱུས་ལོན་བྱེད་ས་ཞིག་ངེས་པར་མཁོ་བ་རེད། དེས་རྐྱེན་གྱིས་གཞུང་ཕྱོགས་ཀྱི་སློབ་གྲྭ་ཆེན་མོ་ཡིན་དང་མ་ཡིན་གང་རུང་ཀྱང་། ཤེས་རིག་དང་དཔྱོད་ཤེས་ལ་དུངས་པའི་མི་བུ་བྱེ་བྲག་པ་རེ་རེ་ནས་འདིར་ལེགས་རྩོམ་གྱི་གཟི་བརྗིད་ལེན་ཆོག་ལ། བོད་ཁུལ་གྱི་སློབ་གྲྭ་ཆེན་མོ་བཅུ་གཉིས་ཙམ་གྱི་བྱ་ར་དང་གཞན་མཉམ་འུར་གླེང་ཀ་བདུན་ཙམ་ཡོད་པ་འདི་དག་གིས་ང་ཚོར་སྐྱོན་ཡོད་ན་དམར་འདོན་དང་། གནད་དོན་ཡོད་ན་མཉམ་གསེས། ལེགས་རྩོམ་ཡོད་ན་མཉམ་མྱོང་བྱེད་སའི་སྟེགས་བུ་ཤིག་བསྐྲུན་པ་ཡིན།

ཁྱེད་ཅག་གིས་རྒྱབ་སྐྱོར་དང་ཐུགས་ཁུར་འོག་ནས། ངེད་སློབ་ཆེན་པའི་རྩོམ་འབྲིའི་གླིང་དེ་མུ་མཐུད་ནས་དར་ཁྱབ་དང་བཀོལ་ཆེར་འགྲོ་བཞིན་པ་འདི་ལྟར་རེད། འདི་ནི་ཁྱེད་རྣམ་པའི་ཐུགས་བསོད་ཡིན་པ་སུ་ལའང་དོགས་པ་མེད། འོན་ཀྱང་རྩོམ་གྱི་སྤུས་ཀ་དང་བརྗོད་བྱའི་ཐད་ནས་ངས་ཀྱང་མནོ་བསམ་རེ་མ་བཏང་རང་བཏང་ཡིན་པས། དེ་དོན་རྣམ་པ་ཚོའི་ཐུགས་འཇགས་ཡོང་རེ་ཡོད། ཉེ་སྔོན་རྩོམ་མཁན་མང་པོས་རྩོམ་ཡིག་གིས་གནང་སྤྱིན་མཛད་པ་ལས་འགའ་ཤས་རེ་བཀོད་མེད་པ་ཡང་དོན་དེ་ཡིན། དེ་བས་གཞུག་ཕྱོགས་ནས་རྩོམ་སྤུས་ཀྱི་ཚད་གཞི་མུ་ནས་མུར་ལེགས་པར་ཡོང་བའི་རེ་བ་ཡོད།

 སྤྱིར་ན་མཉེན་ཆས་འདི་ཡང་དུས་དེབ་ཞིག་དང་འདྲ་བར་ཁོ་བོའི་དམིགས་ཡུལ་དང་ཁ་ཕྱོགས་ཡོད་པ་ཡིན་ན། རྩོམ་ཡིག་གང་བྱུང་བྱུང་དུ་འགོད་པར་མི་བྱེད་ལ། འབོལ་རྩོམ་གཙོ་བྱས་ནས་བོད་ཀྱི་སྤྱི་ཚོགས་ལ་གདོང་གཏད་པའི་གནད་དོན་གླེང་བར་སྤྲོ་བ་ཡིན། དེ་ལས་གཞན་པའི་རོལ་རྩེད་ཀྱི་རྣམ་པ་ཅན་གྱི་གསར་འགྱུར་ཐུང་བ་དང་། སྙན་ངག་འཆལ་འཆོལ་དག་འགོད་གི་མིན་ལ། ཆང་གི་སྙན་ངག་དང་བརྩེ་བ་དམར་བརྗོད་ཀྱི་ངོས་སུ་བཀོད་པའི་སྙན་ངག་དག་ཀྱང་ལེགས་འདེམས་ཀྱི་ཚུལ་དུ་བསུབ་ཞོར་སྤེལ་ཞོར་བྱེད་ཀྱི་ཡིན། འདི་དག་ནི་ཤེས་པར་བྱ་བའོ།།

མཉེན་ཆས་འདིའི་བཀོད་སྒྲིག་ངོ་སྤྲོད།

འདིའི་དཀར་ཆགས་ནང་དུ་ལེ་ཚན་བྱ་ར་ཉི་ཤུ་ཡོད། དེ་ཡང་ཐོག་མར་མཉེན་ཆས་འདིའ་དམིགས་ཡུལ་ལས་གླེང་བྱ་གཙོ་བོར་གྱུར་བའི་མཉམ་འུར་གྱི་དགོས་པ་དང་བསྟུན་ནས། འཛམ་གླིང་ཡོངས་ཁྱབ་དང་། རིག་གནས་གསར་རྙིང་། བསམ་བློའི་འཐབ་རྭ་ལྟ་བུའི་ལེ་ཚན་བྱ་ར་བདུན་ཡོད་ལ། དེའི་གཤམ་དུ་བོད་ཀྱི་རིག་གནས་བསླབ་བཞིན་པའི་སློབ་གྲྭ་ཆེན་མོ་བཅུ་གཅིག་དང་། གཞན་སློབ་ཆེན་གཞན་དག་ཞེས་འཕར་མ་ཞིག་བཅས་ཡོད། ཆེས་མཐའ་མར་རྩོམ་རིག་སུ་གཏོགས་ཤིང་བོད་ཡུལ་དུ་དར་ཁྱབ་ཆེ་བའི་བོད་བརྙན་སྐོར་ཀྱི་ལེ་ཚན་ཞིག་བཅས་ཡོད། (དམིགས་བསལ་དུ་ཞུ་རྒྱུ་ཞིག་ལ།  རྩོམ་པ་པོའི་སྒྲིག་གཞི་ནི་ངེད་སློབ་ཆེན་པའི་ཁ་ཕྱོགས་དང་འཕེལ་ཕྱོགས་ཀྱི་ཤུགས་རྐྱེན་གཙོ་བོ་ཞིག་ཡིན་པས། ལེ་ཚན་གྱི་བྱ་ར་དག་ཉེ་བར་འགྱུར་བའི་ངེས་པ་ཡོད་ཀྱང་། ཆེས་སྤྱིར་བཏང་གི་རྩོམ་རང་གིས་བཞག་པའི་སྤྱི་ཚོགས་ཀྱི་འགན་ཁུར་ལ་ནང་ཡང་འགྱུར་བ་མི་འབྱུང་བ་ཡིན། )སྤྱོད་མཁན་གྱིས་ཐད་ཀར་ཁ་པར་ཨང་གྲངས་དང་ཝེ་པོ་གང་རུང་གིས་གི་ཐོ་འགོད་བྱས་རྗེས་ཐད་ཀར་རྩོམ་སྤེལ་ཆོག་ལ། ལེགས་རྩོམ་དག་སྐད་འཕྲིན་དང་གླེང་མོལ་ནས་མཉམ་སྤྱོད་དང་འོས་སྦྱོར་བྱས་ཀྱང་ཆོག

ནང་དུ་ཞུགས་རྗེས་ཀྱི་ཤེས་བྱ།

  1. འདིའི་ནང་དུ་ཞུགས་ཚད་སློབ་ཆེན་པ་རྐྱང་རྐྱང་ཡིན་དགོས་པའི་ངེས་པ་མེད་ཀྱང་། ཡི་གེའི་སྦྱོར་བ་དང་ཚིག་གི་དག་ཆ། ནང་དོན་ཀྱི་ཞིབ་ཆ་སོགས་ངེས་པར་ཐོན་དགོས། དེ་ལྟར་མིན་ན་རྩོམ་འགོད་ཀྱི་མིན།
  2. ཐོག་མའི་མཉམ་འུར་ཀྱི་བྱ་ར་དག་དུ་ཆང་གི་སྙན་ངག་དང་བརྩེ་བ་དམར་བརྗོད་ལས་གཞན་པར་སྙན་ངག་གཅིག་ཀྱང་མི་འགོད།
  3. རང་ཉིད་ཀྱི་རྩོམ་གྱི་ནང་དོན་ཅི་ལྟ་བ་བཞིན་དུ་བྱ་ར་འདེམས་དགོས་པ་སྟེ། ཡོངས་ཁྱབ་རིན་ཐང་གི་སྐོར་ལྟ་བུ་ཡིན་འཛམ་གླིང་ཡོངས་ཁྱབ་འདེམས་པ་དང་། རིག་གནས་ཡིན་ན་རིག་གནས་གསར་རྙིང་སོགས་མ་ནོར་བར་གྱིས། གལ་ཏེ་ནོར་ཡོད་ན་ལྟ་དཔྱོད་པས་བརྗེ་རྒྱུ་ཡིན།
  4. གཤམ་གྱི་སློབ་གྲྭ་སོ་སོའི་བྱ་རའི་ནང་དུ་། དེ་སྔར་སློབ་གྲྭ་ངོ་སྤྲོད་ཙམ་བཞག་ཡོད་ལ། གཞུག་མར་སློབ་གྲྭའི་ནང་གི་རིག་གནས་བགྲོ་གླེང་དང་། རིག་གཞུང་འཆད་ཁྲིད་དང་། རིག་རྩལ་འཁྲབ་སྟོན་དང་། སྐབས་དོན་གནས་ཚུལ་སོགས་སློབ་གྲྭའི་གནས་ཚུལ་བཀོད་ཆོག
  5. སློབ་ཆེན་གཞན་དག་གི་ལེ་ཚན་བྱ་རའི་ནང་དུ་ལེ་ཚན་བྱ་རའི་ནང་དུ་མ་འདུས་པའི་བོད་རིགས་སློབ་ཆེན་པ་དག་གི་རྩོམ་ཡིག་འགོད་ངེས། ངེས་པར་དུ་སློབ་གྲྭ་ཆེན་མོ་བ་ཡིན་དགོས་པའི་ངེས་པ་མེད།
  6. བོད་བརྙན་གྱི་ལེ་ཚན་བྱ་རའི་ནང་དུ། TEDབོད་འགྱུར་གཏམ་བཤད་དང་། བོད་དང་བོད་འབྲེལ་གློག་བརྙན། བོད་ཡིག་བརྙན་ཡིག་ཅན་གྱི་གློག་བརྙན་གྲགས་ཅན་བཅས་ཀྱི་སྦྲེལ་ཐག་འཇོག་རྒྱུ་ཡིན།
  7. འདིའི་ནང་ཞུགས་པའི་གྲོགས་པོ་ཚོས་མཉམ་འཇོག་བྱེད་དགོས་པ་དག་གོང་ནས་བཤད་པ་ལྟར་རོ། གཞན་ཁྲིམས་འགལ་རིགས་མི་གླེང་བར་མཁྱེན།

ཡང་འདིར་རྒྱུ་རྐྱེན་གང་རུང་ཞིག་གིས་ངེད་ཀྱི་མཉེན་ཆས་འདི་དྲྭ་ཐོག་ཏུ་ཁྱབ་འཇོག་བྱེད་མ་ཐུབ་པས།གྲོགས་པོ་ཚོར་མི་འོས་པའི་དཀའ་ཁག་གང་མང་ཞིག་བཟོས་སོང་། དེས་ཕྱིར་འདིར་ནང་འཇུག་བྱེད་ཐབས་འགའ་བཤད། སྦྲེལ་ཐག་

འདི་ལས་ཐད་ཀར་ཨན་ཊོ་ཁ་པར་ནང་དུ་མཉེན་ཆས་ཀྱི་ཐུམ་དེ་ཕབ་ལེན་བྱེད་ཐུབ། http://www.cutt.com/app/down/532348 གཞན་འདི་ལས་ཕབ་ལེན་བྱས་དེ་ཀུ་ཤུ་ཁ་པར་གྱི་ནང་དུ་ནང་འཇུག་བྱས་ཆོག   

[video] མེ་ནང་གི་ཐར་པ། (Nirvana in Fire)

 

ཧྲང་ཏོང་གློག་བརྙན་བཟོ་སྒྲིག་པ་དང། གཟུགས་མཐོང་རླུང་འཕྲིན་ཚན་པས་དེ་སྔོན་ 《མེ་ནང་གི་ཐར་པ།》 ཞེས་པའི་བརྙན་འཕྲིན་གློག་བརྙན་དེ་ནི་ ཧྥ་རན་སི་ བརྩམས་སྒྲུང་གྲགས་ཅན་ "The Count of Monte Cristo" ལ་གཞི་བཅོལ་བའི་རང་གི་དགྲ་བོར་དགྲ་ལན་སློག་པ་སྐོར་ཡིན་སྐོར་བརྗོད་ཡོད། སྒྲུང་གི་ནང་དོན་ ཧྥ་རན་སིའི་བརྩམས་སྒྲུང་ཡིན་པ་དང་། ད་ལྟ་རྒྱ་ནག་གི་གློག་བརྙན་ཐོག་བསྒྱུར་དགོས་པར་བརྟེན། དང་ཐོག་ཕྲན་གྱི་བློ་ངོར་མི་བཤོང་པའམ་ཇི་ལྟར་ཡིན་ནམ་བསྙམས་མྱོང་། འོན་ཏེ་ཉེ་ཆར་རྒྱ་ནག་གི་གློག་བརྙན་དེའི་འཁྲབ་གཞི་མདོར་བསྡུས་ཞིག་ཁྱབ་བསྒྲགས་སུ་བཀོད་འདུག་པ་དང་། དེར་བལྟ་སྐབས་ད་བཟོས་གཞི་ནས་ གློག་བརྙན་འདི་དང་ ཧྥ་རན་སི་གློག་བརྙན་དེ་གཉིས་བར་གྱི་ཁྱད་པར་དང་། མི་འདྲ་ས་གཉིས་ཀ་མངོན་གསལ་འདོད་པོ་བྱུང་སོང་།

《མེ་ནང་གི་ཐར་པ།》 དེ་ཐོག་མར་བལྟ་སྐབས་རྟོགས་སྒྲུང་ཁོ་ན་འདྲ་པོ་འདུག །སྒྲུང་གི་ནང་རྒྱ་ནག་གི་རྒྱལ་པོའི་རིང་ལུགས་ཀྱི་སྐབས་སུ། རྒྱལ་པོས་རྒྱལ་སྲས་ལ་མཁོན་སེམས་བྱེད་པ་དང། བུ་སྤུན་དང་བུ་སྤུན་བར་ལ་ཡང་དབང་ཆའི་ཆེད་ཐབས་རྩོད་སྣོ་ངར་ཅན་ཞིག་བྱེད་ཀྱི་འདུག །དེས་རྒྱལ་པོའི་ཁྱིམ་ཚང་ནང་གཞི་འཇགས་མེད་པ་དང་ཁ་འཐོར་དུ་འགྲོ་བཞིན་ཡོད་ཀྱང་། དེའི་ནང་གི་བུ་སྤུན་གཉིས་ཀྱི་བརྩེ་གདུང་དང་ལ་རྒྱ་ཟབ་མོ་ཇི་ཙམ་ཡོད་པ་འཁྲབ་སྟོན་པ་གཙོ་བོ་གཉིས་ཀྱིས་བསྟོན་འདུག

[video] ངོ་དེབ་ཀྱི་གློག་བརྙན་ཕབས་ལེན་བྱེད་སྟངས།

 

བརྙན་ཟློས་འདིའི་ནང་ངོ་དེབ་(facebook) ཀྱི་གློག་བརྙན་རིགས་རང་ཉིད་ཀྱི་གློག་ཀླད་ནང་ཕབས་ལེན་ཇི་ལྟར་བྱེད་དགོས་མིན་གྱི་ཐབས་འཇུས་ཞིག་ཡིན།

ཚིག་མཛོད་ཕྱོགས་བསྒྲིགས་ཤིག་དབུ་འབྱེད་གནང་སོང་།

 
གནས་ཚུལ་ཡོངས་ཁུངས། ཤམ་བྷ་ལའི་ཕོ་ཉ།
༢༠༡༤།༠༩།༠༤ཉིན་སྤེལ། དེ་བས་ལོ་༡༥ལྷག་གི་དུས་ཚོད་བཏང་ནས་ཉམས་ཞིབ་དང་གསོག་སྒྲུབ་བྱས་པར་དུས་ཚོད་མང་པོ་ཞིག་འགོར་སོང་། མཐའ་མ་དེར་ཤེས་རིག་ལས་ཁུངས་ཀྱི་རྒྱབ་སྐྱོར་ཐོབ་པར་བརྟེན་འགྲུབ་པ་ཞིག་ཡིན།
ཁ་སང་ཉིན་རྒྱབ་ཚོུད་༣།༣༠སྟེང་། ཤེས་རིག་དང་དཔེ་མཛོད་ཟུང་འབྲེལ་གྱི་གོ་སྒྲིག་འོག བོད་ཀྱི་དཔེ་མཛོད་ཁང་གི་ཚོགས་ཁང་དུ་ངམ་རིང་བློ་བཟང་བསྟན་དར་ལགས་ཀྱིས་ཕྱོགས་བསྒྲིགས་བྱས་པའི་ཚིག་མཛོད་ཅིག་སྒོ་འབྱེད་བྱས་སོང་།

འདིར་ཕེབས་སྐུ་མགྲོན་གཙོ་བོ་ཤེས་དྲུང་ཆེ་སྟོབས་རྒྱལ་ཚེ་རིང་མཆོག དམིགས་བསལ་དཔེ་མཛོད་ཁང་གི་འགན་འཛིན་དགེ་བཤེས་ལྷག་རྡོར་མཆོག ཤེས་རིག་ཐ་སྙད་གཏན་འབབ་ལས་འཆར་འགན་འཛིན་ཀརྨ་སྨོན་ལམ་མཆོག ཚིག་མཛོད་ཕྱོགས་བསྒྲིག་གནང་མཁན་ངམ་རིང་བློ་བཟང་བསྟན་དར་ལགས།
དེ་བཞིན་སྐད་བསྒྱུར་གསབ་སྦྱོང་གི་སློབ་ཕྲུག་རྣམས་དང་གཞུང་ཞབས་ལྷན་ཁང་གི་མི་སྣ་ཁག དེ་མིན་གཞུང་འབྲེལ་མིན་པའི་ལས་ཁང་ཁག་གི་མི་སྣ། གསར་འགོད་པ་བཅས་ཁྱོན་བསྡོམས་མི་གྲངས་༡༠༠ལྷག་ཅིག་འདུར་འཛོམས་ཐོག

ཤེས་རིག་ཐ་སྙད་གཏན་འབབ་ལས་འཆར་འགན་འཛིན་ཀརྨ་སྨོན་ལམ་ལགས་ཀྱིས་གསུངས་དོན།

དབྱིན་བོད་ཚིག་མཛོད་གསར་བ་དེ་༢༠༠༠ལོར་པར་རྒྱབ་པའི་རྗེས་སུ། སོ་སོའི་ཉམ་མྱོང་གི་ཆ་ནས་དབྱིན་བོད་ཚིག་མཛོད་གསར་བར་བསྐྱར་ཞིབ་དང་ཁ་སྣོན་གྱིས་ཡར་རྒྱས་སུ་གཏོང་རྒྱུ། དེ་ལས་གལ་ཆེ་བ་ཞིག་ནི་ཚིག་མཛོད་འདིའི་ནང་ཏུ། ཚིག་མང་པོི་ཞིག་དབྱིན་ཇིའི་ཚིག་གི་སྐད་དོད་འདྲ་བ་ཞིག་བཞག་ཡོད་པའི་སྐབས་སུ། མང་པོ་ཞིག་ར་འཕྲོད་ཀྱི་ཡོད་ལ། མང་པོ་ཞིག་དོག་པའི་ངང་དུ་ཡོད་པ། མང་པོ་ཞིག་གསར་དུ་བཟོས་པ་ཡང་ཡོད་པ་རེད། དེ་བས་དང་པོ་དབྱིན་ཇིའི་ཚིག་ལ་བལྟས་ནས་དེ་ནས་བོད་པའི་ཐ་སྙད་ག་འདྲ་ཞིག་ཡིན་པར་སྐོར་བ་རྒྱབ་ནས་སླེབས་པ་རེད་མ་གཏོགས། དང་པོི་ནས་བོད་པའི་ཚིག་མཛོད་ཅིག་སྔོགས་ནས་བོད་པའི་ཚིག་ཅིག་རག་པའི་ལམ་ཁ་དེ་ཡོད་པ་མ་རེད། ང་རང་ཚོར་ད་ལྟ་བར་དུ་ཡོད་བསྡད་པ་སྟེ་མང་ཆེ་བས་དག་ཡིག་ཟེར་གི་ཡོད་པ་དེའི་ནང་དུ། དག་ཆ་དང་དུས་གསུམ་གྱི་འགྲོ་སྟངས། ཚིག་གི་བེད་སྤྱོད་སོགས་དེ་འདྲའི་ཐ་ཐོར་ཞིག་མ་གཏོགས་ཆ་ཚང་བའི་ཚིག་མཛོད་ཅིག་དཀོན་པོ་རེད། དེ་བས་ངས་ཤེས་རིག་ལས་ཁུངས་སུ་རེ་སྐུལ་བྱས་བ་ཡིན།

ད་ལྟ་དབྱིན་བོད་ཚིག་མཛོད་གསར་མ་འདིའི་ནང་དུ་ཡོད་བསྡད་པའི་ཚིག་དང་གསར་བ་བཟོས་པའི་ཚིག ར་འཕྲོད་བྱུང་བ་སོགས་བོད་ཡིག་གི་ཚིག་མཛོད་ཅིག་གི་ནང་དུ་འཛུལ་ནས་བོད་ཡིག་གི་འགྲེལ་བཤད་མེད་པ་ཞིག་ཡིན་ན། བོད་པའི་ཚིག་གི་སྐད་དོད་ནང་དུ་མ་ཚུད་པར་ཁོ་རང་ཁོ་རང་ཟུར་དུ་དབྱིན་ཇི་དང་སྐད་ཡིག་གཞན་པ་ཞིག་གི་མིང་ཐོག་ལ་འགྲོ་བ་མ་གཏོགས་པས། བོད་པའི་ཚིག་མཛོད་ཅིག་སྔོགས་ནས་དེའི་ཚིག་དོན་ཉིས་ཆ་ཏག་ཏག་རག་པའི་འགྲོ་སྟངས་ད་ལྟ་བར་དུ་མེད་པ་སོང་ཙང། མ་འོིངས་པར་ང་ཚོས་ཚིག་གསར་བ་བཟོ་གི་ཡོད་ན་རེད། ཚིག་གཞན་པར་གཡར་གྱི་ཡོད་ན་རེད། མཐའ་མ་དེར་བོད་ཡིག་གི་ཚིག་མཛོད་ཅིག་ཀློག་ནས་དེའི་ནང་དུ་རྙེད་ཡ་ཡོད་པ་ཞིག་བྱེད་དགོས་པར་འཆར་གཞི་དང་ལྡན་པ་ཞིག་ཤེས་རིག་ནས་༢༠༠༡ལོར་ཡར་ཕུལ་བ་ཡིན། ཕལ་ཆེར་དེའི་སྐབས་ཀྱི་བཀའ་བློན་རིན་ཆེན་མཁའ་འགྲོ་དང་དྲུང་ཆེ་ནི་གཅིག་བྱས་ན་ད་ལྟའི་ཚེ་རིང་དོན་འགྲུབ་ལགས་ཡིན་རྒྱུ་རེད། ཡིན་ནའང་། དུས་ཚོད་རིང་པོ་ཞིག་ཕྱིན་པའི་རྗེས་སུ་བཟང་ངན་གང་ཡིན་གྱི་བཀའ་གནང་མཁན་མི་འདུག དགོས་པ་རྒྱུ་མཚན་ཞིག་གཟིགས་ཀྱི་མེད་ན་ནི་ཨུ་ཚུགས་རྒྱབ་དང་མ་རྒྱབ་གལ་མི་འདུག་པས། སོ་སོའི་ངོས་ནས་ལས་གཞི་དེ་ཆུང་ཆུང་ཞིག་མ་གཏོགས་རག་མེད་པ་དེས་འགྲིག་ཡ་མེད་པས། ཚིག་མཛོད་འབོར་ཆེན་པོི་ཞིག་མ་བྱུང་བ་ཡིན་ན་བོད་ཀྱི་སྐད་ཡིག་ཡར་རྒྱས་སུ་ཞེ་དྲག་ཕན་གྱི་མ་རེད་བསམ་པའི་མོད་ལ། བློ་བཟང་བསྟན་དར་ལགས་ཀྱིས་བཀའ་ཤག་ལ་ཕུལ་བའི་དཔེ་མཚོན་གྱི་ཚུད་དེར་བལྟ་རྒྱུ་རག་སོང་། ཁོའི་ལས་འཆར་གྱི་སྒྲོམ་གཞི་དང་ངའི་བསམ་བློིའི་ནང་གི་འཆར་གཞི་གཅིག་པ་རེད།

དེ་ནས་ང་གཉིས་ནང་ཚགས་ཀྱིས་གོ་བསྡུར་བྱས་ཏེ་བཀའ་བློན་ཐུབ་བསྟན་ལུང་རིག་ལགས་སུ་དགོས་པ་རྒྱུ་མཚན་ཞུས་པ་ཡིན། དེའི་རྗེས་སུ་ཚིག་མཛོད་འདིའི་བདག་དབང་ཤེས་རིག་ལས་ཁུངས་སུ་ཡོད་དགོས་པ་དང་པར་ཕུལ་གྱི་འགྲོ་སོང་ཤེས་རིག་ལས་ཁུངས་ནས་གནང་རྒྱུ། བློ་བཟང་བསྟན་དར་ཁོ་རང་ངོས་ནས་ཚིག་མཛོད་འདི་ཁྲོམ་ལ་བཀྲམས་ནས་སྒེར་གྱི་ཁེ་ཕན་ཡོང་བའི་དམིགས་ཡུལ་མེད་པས་ཤེས་རིག་ལས་ཁུངས་ནས་རིན་མེད་འགྲེམས་སྤེལ་བྱེད་ཐུབ་པའི་གནས་སྟངས་ཤིག་ཆགས་ཀྱི་ཡོད་རེད།

ཚིག་མཛོད་ཕྱོགས་སྒྲིག་མཁན་ངམ་རིང་བློ་བཟང་བསྟན་དར་ལགས་ཀྱིས་གསུངས་དོན།

ཚིག་མཛོད་འདིའི་ནང་དུ་ཆེ་ཆུང་མ་འདྲ་བའི་ཚིག་མཛོད་༡༣ཡོད། དེའི་ནང་གི་གཙོ་བོ་ནི་བོད་ཀྱི་ཚིག་མཛོད་ཆེན་མོ་ཡིན་པ་དང་འདིའི་ནང་དུ་ཕལ་ཆེར་ཚིག་སྟོང་ཕྲག་༦༠ ཙམ་ཡོད།  འདི་ནི་༡༩༩༠ནས་ཚིག་བསགས་ཏེ་གྲུབ་པ་ཞིག  བོད་ནང་ནས་དོན་པའི་ཚིག་མཛོད་ཡག་ཤོས་དེ་ནི་བོད་རྒྱ་ཚིག་མཛོད་ཆེན་མོ་རེད་དེའི་ནང་ནས་གནས་ཚུལ་མང་པོ་ཞིག་བདེན་པ་མ་ཡིན་པ་དང་། ང་ཚོ་རང་དབང་ལུང་པར་ཡོད་མཁན་རྣམས་ཀྱིས་གནས་ཚུལ་གསལ་བཤད་བྱེད་དགོས་པའི་གོ་སྐབས་ཤིག་དང་བྱེད་དགོས་པ་ཞིག་སྔོན་མ་ནས་མཐོང་གི་ཡོད།

དེ་བས་ལོ་༡༥ལྷག་གི་དུས་ཚོད་བཏང་ནས་ཉམས་ཞིབ་དང་གསོག་སྒྲུབ་བྱས་པ་རེད། བཀའ་ཤག་དང་དཔེ་མཛོད་འགན་འཛིན་སྔོན་མ། ཤེས་རིག བོད་ཕྲུག་ཁྱིམ་སྡེ་སོགས་སུ་འདི་འདྲའི་ཚིག་མཛོད་ཅིག་བཟོས་ན་ག་འདྲ་འདུག་པ་ཞུས་མྱོང་ཡོད་ཀྱང་། ལམ་སང་རྒྱབ་སྐྱོར་ཐོབ་པ་དཀའ་ལས་ཁག་པོ་ཡིན་པས་དུས་ཚོད་མང་པོ་ཞིག་འགོར་སོང་། མཐའ་མ་དེར་ཤེས་རིག་ལས་ཁུངས་ཀྱི་རྒྱབ་སྐྱོར་ཐོབ་པ་བྱས་ནས་འགྲུབ་པ་ཞིག་རེད།

གློག་ཀླད་ཀྱི་བརྡ་འཕྲིན་ཁྱབ་བརྡལ་འགྲོ་བའི་སྐབས་དང་བསྟུན། ལོ་བཞི་ལྔ་ཞིག་གི་གོང་ནས་མཉེན་ཆས་བཟོས་ཏེ་གློག་ཀླད་ནང་དུ་བལྟ་རྒྱུ་ཡོད་པ་ཞིག་བཟོས་པ་ཡིན། འདི་བཟོས་ནས་རྒྱ་གར་ལྷོ་ཕྱོགས་ཀྱི་མི་མང་པོ་ཞིག་ལ་བཀྲམས་པས་ཁོ་ཚོས་ཡག་པོ་འདུག་པའི་དགོངས་འཇག་མང་པོ་ཞིག་འདུག་པར་བརྟེན། སློབ་གྲྭ་ཁག་ཏུ་ཚོད་ལྟ་བྱས་ནས་ཡག་པོ་སྤུས་དག་པོི་འདུག་པས་རྒྱ་ཆེ་རུ་གཏོང་རོགས་ཀྱི་འབོལ་སྐུལ་ཞུས་སོང་། མཐའ་མ་དེར་དཔེ་མཛོད་འགན་འཛིན་དགེ་བཤེས་ལྷག་རྡོར་དང་བཀའ་མོལ་ཞལ་བཞེས་གནང་སྟེ་དཔེ་མཛོད་དྲ་རྒྱའི་ཕྱག་ལས་གནང་མཁན་བསོད་ནམས་ཟླ་བ་ལགས་དང་མཉམ་རུབ་ཀྱིས་དུས་ཚོད་མང་པོ་ཞིག་བཏང་ཡོད།
མཉེན་ཆས་འདི་ window 7སྐར་ཁུང་བདུན་པར་དམིགས་ནས་བཟོས་ཡོད། ཡིན་ཡང་། འོད་སྡེར་དང་མཐེབ་སྡེར་ནས་ཁ་ཐུག་གིས་བེད་སྤྱོད་བྱེད་ཐུབ་ཀྱི་ཡོད་ཅེས་བརྗོད་སོང་།

དཔེ་མཛོད་འགན་འཛིན་དགེ་བཤེས་ལྷག་རྡོར་ལགས་ཀྱིས་གསུངས་དོན། 

དེང་སང་འཛམ་གླིང་ནང་འཐབ་རྩོད་མང་པོ་ཞིག་ཡོང་གི་ཡོད་རེད། འཐབ་རྩོད་བྱེད་སྟངས་དེ་ལ་ hard power and soft power ། གྲི་དང་མེ་མདའ། མེ་སྒྱོགས་འཁུར་ནས་དབང་ཆ་བེད་སྤྱོད་བྱས་ནས་འཐབ་རྩོད་བྱེད་པའི་ལམ་ཁ་ཞིག་དང་། འཇམ་པོ་ཟེར་ན་རེད། རིག་གཞུང་གིས་འཐབ་རྩོད་བྱས་བསྡད་ཡོད་པ་བཅས་གཉིས་ཀྱི་སྒང་ལ་འགྲོ་གི་ཡོད་རེད། དྲག་པོའི་འཐབ་རྩོད་བྱེད་སྟངས་དེ་གནའ་སྔ་མོའི་བྱེད་སྟངས་ཡིན་པ་དང་དེང་སང་དེའི་དུས་ཚོད་ཡོལ་ཚར་བ་རེད་ཟེར་གི་ཡོད་རེད།

དེང་སང་རྒྱལ་ཁ་ཐོབ་དགོས་ན་མི་མང་ཤེས་ཡོན་ཡོད་པའི་སྒང་ནས་རྒྱལ་ཁ་ཐོབ་དགོས་རེད་ཟེར་བ་གནད་འགག་ཆེན་པོ་མཐོང་གི་འདུག ང་ཚོའི་བོད་པའི་མི་འབོར་མི་ཉུང་ཉུང་ཞིག་ལ་འཛམ་གླིང་གིས་མཐོང་ཆེན་ཡོིང་བསྡད་ཡོད་དུས་སོ་སོའི་ཆོས་དང་རིག་གཞུང་ལ་བདག་པོ་རྒྱགས་དགོས་པའི་གནད་འགག་ཅིག་མཐོང་སོང་།

དེ་ལྟར་ལབ་ཡོང་དུས་ཆོས་དང་རིག་གཞུང་ལ་དགའ་བ་དང་ཞེན་ཁོག་ཡོད་པ་གཅིག་པས་ཕན་ཐོག་ཡོད་མ་རེད། གང་ཡིན་ཟེར་ན། དངོས་ཡོད་གནས་ཚུལ་ལ་བལྟས་ཡོང་དུས་སྐྱབས་བཅོལ་ལ་སླེབས་པའི་མི་འབོར་ཉུང་ཉུང་ཞིག་ག་ས་གང་དུ་བཀྲམས་བསྡད་ཡོད་པས། བོད་ཡིག་སྦྱང་ས་མེད་པ་ཞིག་ཆགས་པ། བོད་ནང་དང་ཕྱི་ལོག་གི་དཀའ་ངལ་བོད་ཡིག་དགེ་རྒན་ཚད་ལྡན་ཞིག་མ་རག་པའི་དཀའ་ངལ་སོགས་དངོས་ཡོད་གནས་ཚུལ་རེད།

དེ་ནས་བོད་པའི་ནང་གི་ཚིག་མཛོད་ཐོག་མ་དེ་སྒྲ་བྱེ་བྲག་རྟོགས་བྱེད་ཆེན་མོ་དེ་ཡིན་ས་རེད། དེའི་མིང་གི་ངོ་གདོང་ཁོ་རང་ལ་བལྟ་ཡོང་དུས་སམ་སྐྲི་ཏའི་ཚིག་བྱེ་བྲག་པའི་དོན་དག་ག་རེ་ཡིན་པ། ནང་པའི་ཐ་སྙད་བྱེ་བྲག་པའི་དོན་ག་རེ་ཡིན་པའི་མིང་སྦྱར་སྟངས་ཤིག་དང་། དེའི་ནང་གི་ཤུགས་ཆེ་ཤོས་དེ་ནང་པའི་ཐ་སྙད་མང་པོ་དང་ཆབས་ཆིག་སྨན། དེ་མིན་པའི་རིག་གཞུང་མང་པོ་ཞིག་གི་ཐ་སྙད་སླེབས་ཡོད་ཙང་དེ་ལ་མ་དཔེ་ཞིག་བླངས། དེ་བཞིན་མ་འོངས་པར་ཚིག་མཛོད་གསར་བ་མང་པོ་ཞིག་བཟོ་དགོས་པ་དང་། རྒྱུ་མཚན་ད་ལྟའི་ཚིག་མཛོད་འདི་རིགས་ཕན་ཐོག་ཆེན་པོ་ཡོད་ཀྱང་། འདི་དག་ནང་ནས་མ་རག་པའི་ཚིག་མང་པོ་ཞིག་སླེབས་དགོས་པ་ཆགས་ཡོད་པ་བཅས་ཀྱི་སྐོར་ནས་བརྗོད་སོང་།

ཤེས་རིག་དྲུང་ཆེ་སྟོབ་རྒྱལ་ཚེ་རིང་ལགས་ཀྱིས་གསུངས་དོན།

ང་ཚོའི་མི་རིགས་ཀྱི་ངོ་བོ་སྐད་དང་ཡི་གེ རིག་བཞུང་སོགས་ཛ་དྲག་གི་གནས་སུ་ལྷུང་ཡོད་པའི་སྐབས་སུ། མ་འོངས་པར་ང་ཚོས་ཉར་ཚགས་ཇི་ལྟར་བྱེད་པར་བོད་མི་རེ་ངོ་རེ་ནས་དགོངས་པ་བཞེས་རྒྱུ་གལ་ཆེན་རེད་བསམ་གྱི་འདུག
ད་ལྟའི་ང་ཚོའི་བཙན་བྱོལ་སྤྱི་ཚོགས་ནང་ལ་བལྟས་ན། ང་རང་གི་ཁྱིམ་ཚང་དང་གཡས་གཡོན་གྱི་ཁྱིམ་མཚེས་སོགས་ཀྱིས་སྐྱིད་པོ་དང་སྤྲོ་བོ་བྱེད་པར་དགའ་བོ། ལྟད་མོ་འདྲ་མི་འདྲ་ལ་དགའ་བོ། བརྙན་འཕྲིན་ནང་གི་ལྟད་མོ་རྫོགས་རྒྱུ་མེད་པ་དེར་ལྟ་རྒྱུ་དགའ་བ་སོགས་ཀྱིས་ཉི་མ་འགྲོ་བཞིན་འདུག ང་ཚོས་བོད་པའི་རིག་གཞུང་དང་བོད་ཀྱི་སྐད་ཡིག་མི་བརླག་པའི་སྐོར་ལ་བསམ་གཞིགས་རྒྱ་ཆེར་བཏང་ནས་འབད་བརྩོན་བྱེད་པ་དེ་གལ་ཆེན་རེད་ཅེས་བརྗོད་སོང་།
མཐར་དོན་དཔེ་མཛོད་འགན་འཛིན་དགེ་བཤེས་ལྷག་རྡོར་ལགས་ཀྱིས་ངམ་རིང་བློི་བཟང་བསྟན་དར་ལགས་སུ་རྔན་པ་དང་ཁ་ཏག་ཕུལ་གྲུབ་མཚམས་གསོལ་ཇ་དང་ཞལ་ཟས་འདེགས་འབུལ་བྱས་སོང་བ་བཅས།
གསར་འགོད་པ། ཆོས་ཉིད།

www.democracyoftibet.com དྲ་ཚིགས་གསར་པ།

 
གནས་ཚུལ་ཡོངས་ཁུངས། ཤམ་བྷ་ལའི་ཕོ་ཉ།
༢༠༡༤ལོའི་ཟླ་༩ཚེས༢ཉིན་སྤེལ། འདི་ག་གསར་ཁང་དུ་འབྱོར་བའི་གནས་ཚུལ་ལ་གཞིགས་ན། བོད་ཀྱི་མང་གཙོ་ཞེས་པའི་དྲ་ཚིགས་ཤིག་བོད་ཀྱི་མང་གཙོའི་དུས་དྲན་ཐེངས་༥༤པ་དང་སྟབས་བསྟུན་ནས་དངོས་སུ་དབུ་འབྱེད་གནང་འདུག

དེ་ཡང་གསར་འགོད་གསལ་བསྒྲགས་ཤིག་གི་ནང་དུ། "གནམ་འོག་གི་གསར་འགྱུར་ཞེས་པ་ལས་བོད་ཀྱི་རྒྱལ་ཡོངས་བོད་ཡིག་གསར་འགྱུར་ཡོངས་རྫོགས་བལྟ་ཐུབ་ལ། སྤྱི་སྒེར་གྱི་གསལ་བསྒྲགས་དགོས་རིགས་རིན་མེད་ཀྱི་ལམ་ནས་སྤེལ་ངེས་ཡིན། གནམ་འོག་གི་གསར་འགྱུར་གྱི་བརྒྱུད་ལམ་གཅིག་འཕྲིན་ཕྲན་ (wechat) ནས་གཏོང་བཞིན་པ་དང༌། འཕྲིན་ར་དེར་གཙོ་བོ་ཀ་སྡེ་དང་ཁ་སྡེ་གཉིས་སུ་དབྱེ་ཡོད། དེར་རྒྱལ་ཕྱི་ནང་གི་དོ་སྣང་ཅན་ཤིན་ཏུ་མང་པོ་ཞིག་མཉམ་ཞུགས་ཟིན་པ་ཡིན། དེའང་འཕྲིན་ཕྲན་གྱི་ཚོགས་པ་གཞན་དང་མི་འདྲ་བར་གསར་འགྱུར་ཁོ་ན་གཏོང་སའི་སྡིངས་ཆ་ཞིག་ཡིན་ལ། དེར་དོ་བདག་སུ་ཡིན་ཡང་གསར་འགྱུར་གཏོང་ཆོག་པ་ཡིན། རྩོམ་སྒྲིག་པས། བརྒྱུད་ལམ་དེར་བོད་ཀྱི་མང་གཙོ་དྲ་ཚིགས་ཀྱི་གཙོ་ངོས་གསར་འགྱུར་བསྡུས་གཏོང་བྱེད་པ་དང༌། མི་ཡུལ་གྱི་སློབ་དཔོན་ཆེན་མོ་བཀའ་བློན་ཁྲི་ཟུར་མཁས་དབང་ཟམ་གདོང་རིན་པོ་ཆེའི་གསུང་ཡིག་ཐོག་ནས་ཉིན་རེར་སྐར་མ་༡༠རིང་སྒྲོག་སྦྱང་ཞུ་རྒྱུར་གཏན་འཁེལ་ཏེ་དེ་རིང་ནས་དབུ་འཛུགས་ཞུ་རྒྱུ།" ཞེས་བརྗོད་འདུག

"བོད་ཕྱི་ནང་གཉིས་སུ་དྲ་ཚིགས་ཇི་སྙེད་ཅིག་ཐོན་དང་འདོན་མུས་ཡིན་པ་དེ་ལྟར་ཡང༌། དྲ་བ་མང་པོ་ཞིག་ལུང་ཚན་དང་དགོན་པ། ཚོགས་སྡེ་དང་ཚོང་གི་རུ་ཁག་སོགས་གཙོ་བོ་སྡེ་ཚན་བྱེ་བྲག་པའི་ཐོག་ནུས་ཤུཌ་འདོན་ཆེད་ཡིན་པ་དང་དེའང་དགོས་ངེས་པ་ཞིག་རེད།" ཅེས་དྲ་རྒྱའི་ངོ་སྤྲོད་དུ་འཁོད་འདུག

གཞན་ཡང༌། དྲ་རྒྱ་དེའི་རྩོམ་སྒྲིག་པའམ་ཕྱག་འདེབས་མཁནདགེ་བཤེས་བློ་བཟང་དགའ་བའམ་བློ་དགའ་ལགས་ཀྱིས་དྲ་ཚིགས་དེའི་ཁྱད་གནད་ཁག་ལས་ཟུར་འདོན་གནང་ནས་གསུངས་དོན། "བོད་མི་སྤྱི་ཡོངས་ནས་ལོངས་སྤྱོད་རུང་བ༼འི་དྲ་རྒྱ༽འང་ཉུང་ཤས་ཤིག་ཡོད་པ་དང༌། བོད་ཀྱི་མང་གཙོ། ཞེས་པའི་དྲ་བ་འདིའང་དེ་དག་གི་ཁྱབ་ཁོངས་སུ་གཏོགས་པ་ཡིན།" ཞེས་འགྲེལ་བརྗོད་གནང་སོང༌།

དྲ་བའི་ནང་དོན་ཐད་ཁོང་གིས་གསུངས་དོན། "དྲ་ཚིགས་འདི་སྒེར་གྱིས་འཛིན་སྐྱོང་བྱེད་བཞིན་པ་ཡིན་ནའང༌། ལས་དོན་ཡོངས་རྫོགས་བོད་སྤྱི་པའི་ཞབས་ཞུ་སྒྲུབ་པའི་ལས་གཞི་ཤ་སྟག་ཡིན་པ་དང༌། དྲ་བས་གཙོ་སྒྲུབ་ཀྱི་མིང་གཞུང་ནང༌། མང་གཙོ། བོད་གཞུང༌། རྒྱལ་ཡོངས་གསར་འགྱུར། ཁྲིམས། ཆབ་སྲིད། སློབ་གསོ། བགྲོ་གླེང༌། ཚོགས་འདུ། ཟབ་སྦྱོང༌། ཆོས་ཀྱི་ལམ་ལུགས། ྋགོང་ས་མཆོག་གི་མཛད་འཕྲིན། གསར་འགོད་པའི་གཏམ། རྩོམ་སྒྲིག་པའི་སྐད་ཆ། མང་གཙོའི་དུས་དྲན། གསུམ་བཅུའི་དུས་དྲན། ཞེས་པ་སོགས་སྡེ་ཚན་ཁག་ ༢༤ བཞིར་དབྱེ་ཡོད།" ཅེས་གསུངས་འདུག                                        

ཡང་ཁོང་གིས་དྲ་བའི་ཁྱད་ཆོས་ཐད་གསུངས་དོན། "དྲ་ཚིགས་འདིའི་དམིགས་བསལ་ཁྱད་ཆོས་ནི། མདོར་བསྡུས་ན། བོད་གཞུང་གི་ལྷན་ཁང་ཁག་གི་ངོ་སྤྲོད་གཟིགས་ཐུབ་པ་དང༌། མང་གཙོ་དང་འབྲེལ་བའི་གནས་ཚུལ་འཚོལ་ཞིབ་ཐུབ་པ། བོད་ཕྱི་ནང་གི་བོད་ཡིག་གསར་འགྱུར་ཡོངས་རྫོགས་གཟིགས་ཐུབ་པ། སྤྱི་ཚོགས་ནང་གི་དགོས་ངེས་ཀྱི་ཁ་བྱང་ལས་སླ་པོར་རྙེད་ཐུབ་པ། གསལ་བསྒྲགས་ཀྱི་རིགས་རིན་མེད་ངང་ཐད་གཏོང་བྱེད་པ་བཅས་ཀྱི་ཆ་རྐྱེན་ཡོད།" ཅེས་གསལ་བསྒྲགས་སུ་བཀོད་འདུག

མཐར་དམིགས་ཡུལ་ནི། "ྋགོང་ས་ཡིད་བཞིན་ནོར་བུའི་ཐུགས་ཀྱི་བུམ་བཟང་ལས་ལས་བལྟམས་པའི་བོད་ཀྱི་མང་གཙོ་དེ་ཇི་སྲིད་གནས་པ་དེ་སྲིད་དུ། བོད་ཀྱི་མང་གཙོ་དྲ་ཚིགས་འདི་གནས་རུང་བ་དང་ཡོད་དགོས་པའི་གནད་དོན་ཞིག་ཡིན། དམིགས་ཡུལ་གཙོ་བོ་གསུམ་ཡོད་པ་ནི། ༡༽ བོད་ཀྱི་མང་གཙོ་ཡར་རྒྱས་དང་མི་ཉམས་པ་བྱ་རྒྱུ། ༢༽ བོད་མི་མང་ལ་མང་གཙོའི་གོ་རྟོགས་སྤེལ་བ། ༣༽ མང་གཙོ་ཡར་རྒྱས་ཆེད་གསར་འགྱུར་གྱི་ཤེས་རྟོགས་ཆེ་རུ་གཏོང་རྒྱུ་བཅས་ཡིན།" ཅེས་གོང་གསལ་དོན་ཁག་བཀོད་འདུག་པ་བཅས། 

[video] ངམ་རིང་བསྟན་དར་གྱི་ཚིག་མཛོད་ཕྱོགས་བསྒྲིགས།

 

ངམ་རིང་བསྟན་དར་ཞེས་པའི་ཚིག་མཛོད་ཕྱོགས་བསྒྲིགས་དེ་ནི་མཉེན་ཆས་ mdict (ཨེམ་ཌིག་)ཞེས་པ་ཞིག་བེད་སྤྱད་དེ་བཟོས་པ་ཞིག་ཡིན། ཨེམ་ཌིག་མཉེན་ཆས་དེ་སྐར་ཁུང་གི་གློག་ཀླད་དང་། ཀུ་ཤུ་གློག་ཀླད། དེ་བཞིན་ ཨན་ཌོའི་ཁ་པར་དང་། ཨྱ་ཧྥོན། ཨྱ་པེཊ་སོགས་ཚང་མའི་ནང་སྒྲིག་འཇུག་བྱེད་རྒྱུའི་ཐོན་བརྐྱེན་འདུག །གློག་ཆས་གང་ཞིག་གི་ནང་ཨེམ་ཌིག་མཉེན་ཆས་འཇུག་ཚར་བ་དང་། དེ་ནས་ངམ་རིང་བསྟན་དར་གྱིས་བཟོ་སྒྲིག་བྱས་པའི་ཚིག་མཛོད་ཀྱི་ཡིག་ཆ་དེ་དག་ཕབས་ལེན་གནང་ནས་འཇུག་དགོས་འདུག །ཚིག་མིག་མཛོད་ཀྱི་ཡིག་ཆ་དེ་དག་ད་ལྟ་སྐབས་ཕྲལ་རིང་བོད་ཀྱི་དཔེ་མཛོད་ཁང་གི་དྲ་ཚིགས་ www.ltwa.net དང་དེ་ནས་ཕབས་ལེན་ (Download) གྱི་སྡེ་ཚན་ནང་འཇོག་ཡོད།

སྐར་ཁུང་ནང་ངམ་རིང་བསྟན་དར་ཟེར་བའི་ཚིག་མཛོད་སྒྲིག་འཇུག་བྱེད་སྟངས།

རང་ཉིད་ཀྱི་སྐར་ཁུང་ནང་ཚིག་མཛོད་ཕྱོགས་བསྒྲིགས་འདི་སྒྲིག་འཇུག་བྱེད་སྟངས་གཤམ་གྱི་བརྙན་ཟློས་ཐུང་ངུ་འདིར་གཟིགས་རོགས།

ཨན་ཌོའི་གློག་ཆས་ནང་ངམ་རིང་བསྟན་དར་ཟེར་བའི་ཚིག་མཛོད་སྒྲིག་འཇུག་བྱེད་སྟངས།

གལ་ཏེ་རང་ཉིད་ཀྱི་ཨན་ཌོའི་ཁ་པར་སོགས་ཀྱི་ནང་བོད་ཡིག་ཚིག་མཛོད་ཕྱོགས་བསྒྲིགས་དེ་སྒྲིག་འཇུག་བྱེད་དགོས་ན། དང་པོ། Google Play བརྒྱུད་དེ་ Mdict ཞེས་པའི་མཉེན་ཆས་དེ་ཕབས་ལེན་དང་སྒྲིག་འཇུག་བྱེད་དགོས། དེ་སྒྲུབ་པ་དང་། ད་གིན་གོང་དུ་བཤད་པའི་བོད་ཀྱི་དཔེ་མཛོད་ཁང་གི་ཕབས་ལེན་བྱེད་སའི་ www.ltwa.net -> Download ནས་ བོད་སྨན་ཟེར་བ་དང་། དག་ཡིག་གསར་སྒྲིག །བསྟན་དར་ལོ་ཁམས་དེ་དག་རིམ་པས་ཕབས་ལེན་དང་། དེ་ནས་ཨན་ཌོའི་ཡིག་ཁུག་དོ་དམ་ (Folder Manager) རྒྱུད་དེ་ PhoneStorage/Mdict/Docs/ ནང་དུ་འཇོག་ན། ད་བཟོད་གཞི་ནས་ཚིག་མཛོད་དེ་དག་བེད་སྤྱོད་བྱེད་ཐུབ།

ཨྱ་པེཊ་དངང་ཨྱ་ཧྥོན་ནང་ངམ་རིང་བསྟན་དར་ཟེར་བའི་ཚིག་མཛོད་སྒྲིག་འཇུག་བྱེད་སྟངས།

གལ་ཏེ་ཁྱེད་ཀྱིས་ ཨྱ་ཧྥོན་དང་། ཨྱ་པེཊ་ ནང་ཚིག་མཛོད་ཕྱོགས་སྒྲིག་དེ་ཁ་འབྱེད་རྒྱུ་ཡོད་པ་བཟོ་འདོད་ན། དང་པོ། ituneStore རྒྱུད་ Mdict ཞེས་པའི་མཉེན་ཆས་དེ་ཕབས་ལེན་དང་། སྒྲིག་འཇུག་བྱེད་དགོས། དེ་ནས་ Mdict མཉེན་ཆས་དེ་ཁ་ཕྱེ་ནས་ཕབས་ལེན་བྱེད་སའམ། ཚིག་མཛོད་ཕབས་ལེན་བྱེད་སའི་དྲ་ཚིགས་ཁ་བྱང་བཀོད་ས་ཞིར་ཤར་ངེས། དེར་དྲ་ཚིགས་ཁ་བྱང་བཏགས་སའི་ནང་། ད་གིན་གོང་དུ་བཤད་པའི་བོད་ཀྱི་དཔེ་མཛོད་ཁང་གི་ཕབས་ལེན་བྱེད་སའི་ www.ltwa.net -> Download ནས་ བོད་སྨན་ཟེར་བ་དང་། དག་ཡིག་གསར་སྒྲིག །བསྟན་དར་ལོ་ཁམས་སོགས་ཀྱི་ཕབས་ལེན་བྱེད་སའི་དྲ་བྱང་ (URL) རེ་རེ་བྱེད་ནས་བཀོད་ནས་ཕབས་ལེན་བྱེད་ན། ད་བཟོད་ཕབས་ལེན་ཟིན་པའི་ཚིག་མཛོད་དེ་དག་བེད་སྤྱོད་བཏང་ཐུབ།