རྒྱལ་ཁབ་གཞན་དག་གི་ཡ་མཚན་གོམས་སྲོལ།

 
རྒྱ་གར་གཉེན་སྒྲིག་གི་དུས་སྟོན་སྐབས་མག་པའི་ལྷམ་བརྐུ་ཐུབ་ན་དངུལ་སློང་བའི་སྲོལ་ཞིག་ཡོད།
དབྱིན་ཇི་དང་ཨ་རིའི་མིས་མི་མང་པོ་འཛོམས་སར་མྱ་ངན་དང་སེམས་སྡུག་ཆེན་པོ་བྱས་ན་དེ་ནི་གུས་ལུགས་མི་ཤེས་མཁན་ཞིག་ཏུ་བརྩི་གི་ཡོད་པ་རེད། དེར་བརྟེན་མྱ་ངན་གྱི་བྱེད་སྒོའི་སྐབས་ངུ་འབོད་བྱེད་ཀྱི་མེད་པ་རེད། ཧིན་རྡུའི་མིའི་གོམས་སྲོལ་ནི་དེ་ལས་ལྡོག་པ་ཞིག་ཡིན་པས་མྱ་ངན་གྱི་བྱེད་སྒོའི་སྐབས་རྐང་འཁྲབ་ལག་རྡབ་ཀྱིས་ངུ་འབོད་བྱེད་ཅིང། དེ་འདྲ་མ་བྱས་ན་གུས་ལུགས་དང་འགལ་བར་བརྩི་གི་ཡོད་པ་རེད།

ནུབ་ཕྱོགས་ཀྱི་མི་མང་པོ་སྤྱི་དང་ལྷག་པར་དུ་ཆོས་པ་ཚོས་ཚེས་"13" ནིི་བཀྲ་མི་ཤིས་པའི་ཚེས་གྲངས་ཤིག་ལ་བརྩིས་ཏེ་སྤྱོད་པ་འཛེམས་ནས་ཆེས་བཅུ་གཉིས་དང་ཕྱེད་ཀས་དེའི་ཚབ་བྱེད་ཀྱི་ཡོད་པ་རེད། དེའི་རྒྱུ་མཚན་ནི་ཚེས་ 13 ནི་ཏག་ཏག་གཟའ་པ་སངས་ཉིན་འཁེལ་གྱི་ཡོད་ལ། ཡེ་ཤུ་མ་ཤི་ཀ་བརྒྱང་ཤིང་སྒང་ལ་བརྒྱངས་པའི་དུས་ཚོད་དེའང་ཏག་ཏག་གཟའ་པ་སངས་ཡིན་པས་དེ་བཀྲ་མི་ཤིས་པའི་ཉིན་ཞིག་ལ་བརྩི་གི་ཡོད་པའི་རྐྱེན་གྱིས་རེད།

ཧྥ་རན་སི་མིས་ཅུས་ཧྭ་མེ་ཏོག་མི་གཞན་ལ་ལག་རྟགས་སུ་སྤྲོད་པའི་ལུགས་སྲོལ་མེད་པ་རེད། དེའི་རྒྱུ་མཚན་ནི། ཅུས་ཧྭ་མེ་ཏོག་ནི་མྱ་ངན་གྱི་བྱེད་སྒོའི་སྐབས་སུ་བེད་སྤྱོད་གཏོང་གི་ཡོད་པའི་རྐྱེན་གྱིས་རེད།

ཀྲུང་ཏུང་ས་ཁུལ་གྱི་མིས་ལག་པ་གཡོན་མ་དེ་གཙང་མ་མིན་པར་བརྩི་གི་ཡོ་པས་ལག་པ་གཡོན་མས་མི་ལ་ཅ་ལག་སྤྲོད་རྒྱུར་འཛེམས་ཀྱི་ཡོ་པ་རེད།

ཁྱུའུ་པཱའི་ ཧྲེན་རེ་ན་ཧོ་ཆུ་བོ་འབབ་ཡུལ་གྱི་ཡུལ་མི་ཕོ་མོ་རྒན་གཞོན་ཚང་མས་ནང་མི་སྤུན་མཆེད་གྲོངས་ཚེ་ཞག་བདུན་ཕྲག་གཅིག་གི་རིང་ཞྭ་མོ་གྱོན་ནས་མྱ་ངན་ཞུ་བ་ལས། དེ་མིན་ལོ་གཅིག་དུས་བཞིའི་ནང་ཆར་བབ་རླུང་འཚུབ་ག་འདྲ་ཞིག་བྱུང་ནའང་ཞྭ་མོ་གྱོན་པའི་ལུགས་སྲོལ་ཡོད་པ་མ་རེད།

ཞིང་ཤི་ལན་གླིང་ཕྲན་སྒང་གི་ཡུལ་མི་ཚོ་ཐུག་འཕྲད་བྱུང་སྐབས་ཕན་ཚུན་སྣ་ཁུག་གཏུག་རེས་བྱས་ནས་འཚམས་ཞུ་བྱེད་ཀྱི་ཡོད་པ་རེད། ཧྥེ་གླིང་ནུབ་རྒྱུད་ཀྱི་མི་རིགས་འགའ་ཤས་ཀྱིས་གྲོགས་པོ་སྤུན་མཆེད་ཕན་ཚུན་ཐུག་སྐབས་ལག་པའི་སྦར་མཐིལ་བྲང་ཁོག་ལ་གཞུས་ཙམ་བྱས་ནས་འཚམས་ཞུ་བྱེད་ཀྱི་ཡོད་པ་རེད།

ལེ་ཊིན་མེ་གླིང་གི་རྒྱལ་ཁབ་ཏུ་ལག་རས་ནི་མིག་ཆུ་དང་འབྲེལ་བའི་དངོས་པོ་བཀྲ་མི་ཤིས་པ་ཞིག་ཏུ་བརྩི་གི་ཡོད་པར་བརྟེན་མི་ལ་ལག་རྟགས་སུ་སྤྲོད་ཀྱི་མེད་པ་རེད། ཡིན་ནའང་ཉི་ཧོང་གི་མིས་ལོ་གསར་ལ་གཉེན་གྲོགས་ཐུག་པར་འགྲོ་སྐབས་ངེས་པར་དུ་རང་ཉིད་ཀྱི་མིང་བྲིས་པའི་ལག་རས་ཕན་ཚུན་སྤྲོད་རེས་བྱེད་ཀྱི་ཡོད་པ་རེད།

ཉི་རི་ལི་ཡའི་མིས་སྒོ་ང་ནི་བུ་བཙའ་རྩ་གཅོད་བྱེད་པའི་རྟགས་མཚན་དུ་བརྩི་གི་ཡོད་པས་ཕྲུ་གུ་སྐྱེ་འདོད་ཅན་གྱི་བུད་མེད་རྣམས་ཀྱིས་སྒོ་ང་ཟ་རྒྱུར་འཛེམས་ཀྱི་ཡོད་པ་རེད། ཡིན་ནའང་ཐུར་ཆིའི་མིས་སྒོ་ང་ནི་སྐྱེ་འཕེལ་ཡོང་བའི་རྟགས་མཚན་དུུ་བརྩི་གི་ཡོད་པས་ཁེར་རྐྱང་དུ་འཙོ་བ་སྐྱེལ་འདོད་ཡོད་པའི་བུ་མོ་ཚོས་མི་ཚེ་གཅིག་གི་རིང་སྒོ་ང་ཟ་ཕོད་ཀྱི་མེད་པ་རེད། ཡ་མཚན་དགོས་པ་ཞིག་ནི་ཧྥ་རན་སི་གྲོང་གསེབ་ཏུ་གཉེན་སྒྲིག་བྱེད་པའི་ཉིན་མོ་དེར་བུ་མོ་ཚང་མས་གྱོན་ཆས་ཀྱི་ནང་ལྐོག་ཏུ་སྒོ་ང་ཁ་ཤས་རེ་བླུག་ནས་ཁང་པ་གསར་པའི་ནང་འཛུལ་སྐབས་ཆེད་མངགས་རྐང་འདྲེད་ཤོར་ཁུལ་བྱས་ཏེ་སྒོ་ང་ཕྱིར་དོན་ཐབས་བྱེད་ཀྱི་ཡོད་པ་རེད། དེའི་རྒྱུ་མཚན་ནི་སྒོ་ང་དོན་པ་དེ་བཀྲ་ཤིས་པའི་དོན་ཡིན་པར་བརྩི་སྲོལ་ཡོད་པའི་རྐྱེན་གྱིས་རེད།

སཱི་པན་གྱི་བུད་མེད་ཚོ་ཕྱི་ལོགས་སུ་འགྲོ་སྐབས་ངེས་པར་དུ་རྣ་ལོང་འདོགས་དགོས་ཤིང། གལ་ཏེ་རྣ་ལོང་མ་བཏགས་ན་ལུས་ལ་གྱོན་ཆས་མ་གྱོན་པ་ལྟ་བུའི་ཞབས་འདྲེན་ཞུས་པར་བརྩི་གི་ཡོད་པ་རེད།

རོ་མངར་སྐོར་གླེང་བ།

 

བྱིས་པ་མངར་ཆར་དགའབའི་རྒྱུ་མཚན་ཅི་རེད།

སྤྱིར་ན་བྱིས་པ་ཚང་མས་མངར་ཆ་ཟ་རྒྱུར་ཧ་ཅང་དགའ་པོ་ཡོད་པ་རེད། བྱིས་པ་མངར་ཆར་དགའ་བའི་རྒྱུ་མཚན་ཅི་རེད་ཅེས་ཁྱེད་ལ་དྲིས་ན་ཁྱེད་ཀྱིས་མངར་ཆའི་རིགས་ཞིམ་པོ་ཡོད་ོཔས་རེད་ཅེས་གསུང་ངེས་རེད། འོན་ཀྱང་དེ་ཕུད་པའི་རྒྱུ་མཚན་གཞན་དག་ཇི་ཡོད་ཁྱེད་ཀྱིས་ཤེས་ཀྱི་ཡོད་དམ།

དོན་དམ་དུ་མངར་ཆའི་རིགས་ཀྱི་དངོས་པོ་ནི་མིའི་ལུས་ཁམས་འཚར་བར་མེད་དུ་མི་རུང་བ་ཞིག་ཡིན་ཞིང་།  ཕྲུ་གུ་དམར་འབྱར་གྱིས་ཨ་མའི་འོ་མ་འཐུང་དགོས་པའི་རྒྱུ་མཚན་ནི་དེའི་ནང་ལ་མངར་ཆ་ཡོད་པས་ཡིན་ཞིང་།  དེ་བཞིན་ང་ཚོའི་བཟའ་བཅའ་གཙོ་བོ་དཔེར་ན་འབྲས་དང་གྲོ་ཞིབ་སོགས་ཚང་མའི་ནང་དུ་མངར་ཆའི་རིགས་ཀྱི་དགོས་པོ་ཧ་ཅང་མང་པོ་ཡོད་པ་རེད་།

མངར་ཆའི་བྲོ་བ་ནི་མངར་མོ་རེད།་མིའམ་སྲོག་ཆགས་གཟན་དག་གི་ལྕེའི་དབང་པོས་རོ་མངར་ཚོར་བར་ཆ་རྐྱེན་གཉིས་འཛོམ་དགོས་པ་སྟེ། གཅིག་ནི་སྲོག་ཆགས་ཀྱི་ལྕེའི་ཏོག་ལ་རོ་མངར་ཚོར་བའི་དབང་པོ་ཡོད་དགོས་པ་དང། གཅིག་ནི་རོ་མངར་ཚོར་བའི་དབང་པོ་དེ་མངར་ཆའི་རིགས་ཀྱི་དངོས་པ་དང་འབྲེལ་གཏུག་བྱེད་དགོས་ཤིང། བྱི་བ་དང། སྤྲེའུ་སོགས་སྲོག་ཆགས་ཀྱི་ལྕེའི་ཐོག་ལ་རོ་མངར་ཚོར་བའི་དབང་པོ་ཡོད་སྟབས། དེ་ཚོར་མིའི་རིགས་དང་འདྲ་བར་རོ་མངར་གྱི་ཚོར་བ་ཡོད་ཅིང། བྱ་དེ་དང། ཞི་མི་སོགས་སྲོག་ཆགས་ཀྱི་ལྕེའི་ཐོག་ལ་རོ་མངར་ཚོར་བའི་དབང་པོ་མེད་པས་དེ་ཚོར་བཟའ་བཅའ་མངར་ཤོས་ཀྱི་རིགས་སྟེར་ནའང་རོ་མངར་གྱི་ཚོར་བ་ཡོང་ཐབས་མེད་པ་རེད།

མངར་ཆ་ཟེར་བ་དེ་རོ་མངར་དངོས་པོ་ཡིན་ནམ།

མི་རྣམས་ཀྱིས་བྲོ་བ་མངར་མོ་ཡིན་པའི་དངོས་པོ་ཡོད་ཚད་ལ་རོ་མངར་དངོས་པོ་ཟེར་གྱི་ཡོད་པ་རེད། རོ་མངར་དངོས་པོའི་སྐོར་བརྗོད་མ་ཐག་མི་ཚང་མས་ལམ་སང་བྱེ་མ་ཀ་ར་དང་ཤེལ་ཀ་ར་སོགས་དྲན་གྱི་རེད། དོན་དུ་ང་ཙོས་སྤྱིར་བཏང་བཤད་པའི་མངར་ཆ་ནི་བཟའ་བྱའི་མངར་ཆ་དང་མངར་ཆས་བཟོས་པའི་བཟའ་བཅའི་རིགས་ཀྱི་སྤྱི་མིང་རེད། འོན་ཀྱང་རྫས་འགྱུར་རིག་པ་བ་རྣམས་ཀྱིས་བལྟས་ན་མངར་ཆ་ཟེར་བ་དེ་ནི་མངར་ཆའི་རིགས་ཀྱི་ཐོན་ཆུའི་འདྲེས་སྦྱོར་དངོས་པོའི་སྤྱི་མིང་ཡིན་ཞིང་། དེའི་ཁོངས་སུ་རྒུན་འབྲུམ་གྱི་མངར་ཆ་དང་། ཤིང་འབྲས་ཀྱི་མངར་ཆ། བུ་རམ་ཤིང་གི་མངར་ཆ། ཕིང་རྩམ་སོགས་གཏོགས་ཡོད་པ་དེ་དག་ཐུན་མོང་ལས་མངར་ཆའི་རིགས་ཀྱི་འདྲེས་སྦྱོར་དངོས་པ་བྱུང་བ་རེད།

མངར་ཆའི་རིགས་ཀྱི་འདྲེས་སྦྱོར་དངོས་པོ་མིན་པའི་རོ་མངར་དངོས་པོ་ད་དུང་སྣ་ཁ་མང་པོ་ཡོད་པ་དཔེར་ན། ང་ཚོ་ཚང་མསར་རྒྱུས་མངའ་ཡོད་པའི་རྒྱ་སྐད་དུ་ཐང་ཅིང་ཞེས་པའི་མངར་བཅུད་དེ་བྲོ་བ་ཧ་ཅང་མངར་མོ་ཡིན་ཡང་མངར་ཆའི་རིགས་ཀྱི་འདྲེས་སྦྱོར་དངོས་པོ་མིན། ད་ཕན་ལོ་བཅུ་ལྷག་ཙམ་རིང་འཛམ་གླིང་ཐོག་རོ་མངར་དངོས་པོའི་སྣ་རིགས་འཕེལ་རྒྱས་ཧ་ཅང་མགྱོགས་པོ་བྱུང་སྟེ། 1970 ལོར་སྣ་ཁ་ 200 ལྷག་ཙམ་ལས་མེད་ཀྱང། 1983 ལོར་སྣ་ཁ་ 1000 ལྷག་ཙམ་བར་འཕེལ་རྒྱས་བྱུང་བར་མ་ཟད། ཚན་རིག་པ་རྣམས་ཀྱིས་ད་བར་ད་དུང་རོ་མངར་དངོས་པའི་གསར་པརྒྱུན་ཆད་མེད་པར་འདྲེས་སྦྱོར་བྱེད་བཞིན་ཡོད། གོང་གསལ་རོ་མངར་དངོས་པོ་སྣ་ཁ་ 1000 ལྷག་ཙམ་དེ་ཚོ་རིགས་ 50 ལྷག་ཙམ་དུ་བགོས་ཅོག་ཅིང། མངར་ཆའི་རིགས་ཀྱི་འདྲེས་སྦྱོར་དངོས་པོ་ནི་དེ་ཚོའི་ནང་གི་རིགས་གཅིག་ཙམ་རེད།

མངར་ཆའི་ནང་གི་རྒྱལ་པོ་དེ་སུ་རེད།

དངོས་པོའི་བྲོ་བ་མངར་ལོད་ཀྱི་ཚད་ལ་མངར་ཚད་ཟེར། ཚན་རིག་པས་གཏན་འབེབས་བྱས་པ་ལྟར་ན། བུ་རམ་ཤིང་གི་མངར་ཚད་ 100 ཐམ་པ་ཡིན་པ་གཞིར་བཞག་སྟེ། སྒར་ཚད་འདྲ་མཚུངས་ཡིན་ཡང་བུ་རམ་ཤིང་ལས་ལྡབ་ 5 མངར་བའི་མངར་ཚད་ནི་ 500 ཡིན་པ་དང། བུ་རམ་ཤིང་ལས་ལྡབ 10 མངར་བའི་མངར་ཚད་ནི་ 1000 ཡིན་པ་དེ་ལྟར་ཚད་འཇལ་ནས་ཤེས་གསལ་དུ། ཤིང་འབྲས་ཀྱི་མངར་ཚད་ནི་ 173 ཡིན་པས་བུ་རམ་ཤིང་ལས་མངར་བ་ཡོད་པ་དང། རྒུན་འབྲུམ་གྱི་མངར་ཆའི་མངར་ཚད་ནི་ 64 ཡིན་པས་བུ་རམ་ཤིང་ནང་བཞིན་མངར་མོ་ཡོད་པ་མ་རེད།

མངར་བཅུད་ཐང་ཅིང་བུ་རམ་ཤིང་ལས་ལྡབ་བརྒྱ་ཕྲག་ཁ་ཤས་ཀྱིས་མངར་བ་ཡོད་ཀྱང། དངོས་པོ་མངར་ཤོས་དེ་མང་རེད། ལོ་ཤས་ཀྱི་སྔོན་དུ་ཚན་རིག་པ་རྣམས་ཀྱིས་ཤིང་ནགས་ཀྱི་ནང་ནང་ཀོ་ཅིང་ཁོ་ཞེས་པའི་རྩི་ཤིང་ཞིག་རྙེད་ཡོད་པ་དེའི་འབྲས་བུའི་ནང་དུ་སོ་མ་ཏིང་ཞེས་པའི་དངོས་པོ་ཞིག་ཡོད་པ་དེ་བུ་རམ་ཤིང་ལས་ལྡབ་ 3000 གིས་མངར་བ་ཡོད་པདང་། ད་བར་རྙེད་པའི་དངོས་པོ་མངར་ཤོས་ནི་ "ཨེར་ཐའེ-2 མོན་ཏུང་ཞན་ལིའོ་པིན་ཨེར་སོན་ཙ་ཧྥེང་ཀྲི" ཞེས་པའི་སྤྲི་དཀར་རིགས་སིག་ཡིན་ཞིང། དེའི་མངར་ཚད་ནི་བུ་རམ་ཤིང་གི་ལྡབ་ཁྲི་ 3 ཡིན་པས། "མངར་ཆའི་ནང་གི་རྒྱལ་པོ" མིང་དོན་མཚུངས་པ་ཞིག་རང་རེད།

བསོད་གཡང་གིས་བསྒྱུར།
[ཤེས་བྱའི་ཟེགས་མ། དེབ་གྲངས་ཨང་ 30 ལས་བཏུས།]

རིན་མེད་དྲ་ཚིགས་བཟོ་ས་ལེགས་ཤོས་ལྔ།

 
ད་ལྟའི་ཆར་རིན་མེད་ཐོག་དྲ་ཐོག་གི་ཟིན་བྲིས་བཀོད་ས་དང་དྲ་ཚིགས་གཉེར་ས་གྲངས་ལས་ལས་པ་ཡོད། དེ་དག་ལ་རྩོམ་འབྲིའི་མཐུན་རྐྱེན་སོགས་སྤྱི་སྙོམ་གྱི་ཆ་རྐྱེན་དང་། དེ་དག་སོ་སོར་གཞན་དང་མི་འདྲ་བའི་ཁྱད་ཆོས་ཀྱང་ཡོད། གཤམ་ལ་ང་ཚོས་རིན་མེད་ཀྱི་ཟིན་བྲིས་སམ་དྲ་ཚིགས་གཉེར་སའི་ཞབས་ཞུ་སྐད་གྲགས་ཡོད་པ་ཁག་ལྔ་ངོ་སྤྲོད་བྱེད་ཀྱི་ཡིན།

01) Blogger.com

འདི་ནི་དུས་ཡུན་རིང་ཤོས་སུ་རིན་མེད་ཐོག་ཡོད་པའི་ཟིན་བྲིས་བཀོད་སའི་སྟེགས་བུ་ཞིག་ཆགས་ཡོད། གུ་གུལ་གློག་འཕྲིན་ཁ་བྱང་སྤྱད་ནས་སྐར་ཆ་གཅིག་གཉིས་ནང་དྲ་གནས་དིའི་སྟེང་ཟིན་བྲིས་དྲ་ཚིགས་ཤིག་གཉེར་ཐུབ་པ་མ་ཟད། སྒྲིག་བཀོད་བྱེད་སའི་སྟེགས་སྒྲོམ་ནང་ཟིན་བྲིས་དྲ་ཚིགས་ཀྱི་ཇུས་འགོད་ཆ་ཚང་རང་འདོད་ལྟར་བྱེད་རྒྱུ་ཡོད། ཁྱེད་ཀྱི་ལྟ་ཀློག་བྱེད་བཞིན་པའི་དྲ་གནས་འདིར་ཡང་གུ་གུལ་ཟིན་བྲིས་ཞབས་ཞུའི་ཐོག་བཟོས་པ་ཞིག་རེད།

02) Wordpress.com / Wordpress.org

ཁྱེད་ཀྱིས་ཡིད་ཆེད་དགོས་པ་ཞིག་ནིི་ད་ལྟའི་ཆར་འཛམ་གླིང་གི་དྲ་ཚིགས་ཁ་གྲངས་མང་ཤོས་ཨང་ལྔ་པར་སོན་པ་ནི་ ཝོརཌ་ཕིརེསི་ ཐོག་ཡོད་པའི་དྲ་ཚིགས་དེ་དག་རེད། ཁྱེད་ཀྱིས་ ཝོརཌ་ཕིརེསི་ ནང་དྲ་ཚིགས་ལས་ལྷ་པོར་བཟོ་ཐུབ་པ་དང་། རིན་མེད་ཀྱི་ཞབས་ཞུའི་ཁོངས་སུ་དྲ་རྒྱའི་ཇུས་འགོད་གང་ཙམ་བྱེད་རྒྱུ་ཡོད།

03) Tumblr
ཊོམ་བྷལར་ ནི་ཝོརཊ་ཕིརེསི་དང་ ཊིའུ་ཊར་ གཉིས་ལས་འདུས་པའི་ཟིན་བྲིས་ཞབས་ཞུ་འདྲ་པོ་ཞིག་ཆགས་ཡོད། དེང་དུས་ཀྱི་ལག་ཐོག་ཁ་པར་རྒྱུད་དྲ་གནས་དེའི་ཐོག་ཟིན་བྲིས་སྤེལ་སླ་བ་དང་། དྲ་ཚིགས་ཀྱི་བཟོ་བཀོད་རྣམས་རང་འདོད་ལྟར་ཇུས་བཀོད་ཐུབ་ཀྱི་ཡོད།

04) Weebly

དྲ་གནས་འདིའི་ཐོག་ཁྱེད་ཀྱིས་ཟིན་བྲིས་སྤེལ་ཐུབ་པ་མ་ཟད། དྲ་ཚིགས་ཇུས་བཀོད་ཀྱི་སྐད་ཡིག་ html དང་ css དེ་རིགས་རྩ་བ་ནས་མ་ཤེས་མཁན་ཞིག་གི་ཀྱང་དྲ་ཚིགས་ཀྱི་སྒྲོམ་གཞི་ཆ་ཚང་ལ་བཀོད་སྒྲིག་སྟབས་བདེ་པོའི་ངང་བྱེད་རྒྱུ་ཡོད།

05) Pen.io

དྲ་གནས་དེའི་ཐོག་དེབ་སྐྱེལ་བྱེད་མི་དགོས་པར་དྲ་ཚིགས་ཞིག་གཉེར་ཐུབ། ཁྱེད་ཀྱི་བློ་འདོད་ཀྱི་དྲ་ཚིགས་ཁ་བྱང་ཞིག་དང་། གསང་ཨང་འདེམས་རྗེས་ནང་དོན་ཐད་ཀར་བཀོད་ཆོག གལ་ཏེ་འདྲ་པར་བཅུག་དགོས་ན་ཕྱི་ལོག་ནས་དྲ་ངོས་སུ་འཐེན་ན་འགྲིགས།

སྨོན་ལམ་ཟབ་སྦྱོང། A07

 

སློབ་ཁྲིད་ཀྱི་ནང་དོན།

  • དཀར་ཆག་བཟོ་སྟངས།
    • Layout> Table of Content [Title=དཀར་ཆག] [Style=heading1] [Include Paragraph Style=heading1_heading2] [Style:heading1>Entry Style= boody text0] [Option=Create PDF Bookmarks] > OK
  • དཀར་ཆག་སྒྲིག་འགོད་བྱེད་ཐབས།
  • Create a Paragraph Style called Content1 for Table of Content
  • Applying this style by going through: Layout> Table of Content [Style:heading1>Entry Style= Content1] 
  • In order to make this page no. align at right margin go in More: Style heading>Between Entry and Number>^y
  • རྗེས་ཕྱོགས་དཀར་ཆག་སྒྲིག་འདི་འདྲ་བསྐྱར་སྒྲིག་བྱེད་མི་དགོས་པར་ད་ལྟ་དཀར་ཆག་གི་སྒྲིག་བཀོད་ལེགས་པོ་དེ་ཉར་གསོག་བྱེད་རྒྱུ་ཡོད།
  • ཟུར་མཆན་བཀོད་སྟངས།
    • Notes>New Note

བརྙན་ཟློས་འདི་ནི། ཕྱི་ལོ་ ༢༠༡༣ ལོའི་ཟླ་ ༢ ཚེས་ ༢༦ ནས་ ཟླ་ ༣ ཚེས་ ༤ བར། སྐུ་ཞབས་སྨོན་ལམ་གྱིས་བོད་ཡིག་དང་འབྲེལ་བའི་དཔེ་དེབ་ཇུས་འགོད་ཟབ་སྦྱོང་ཞིག་སྐོར་རེད་འདུག །བརྙན་ཟློས་དེ་བོད་ཡིག་དཔེ་དེབ་དང་ indesign ནང་ལས་ཀ་བྱེད་མཁན་ཡོངས་ལ་ཕན་ཐོག་ཆེན་པོ་མཐོང་བས། དེ་དག་དྲ་སྟེང་དུ་སྤེལ་ཏེ་ཀུན་ལ་ཕན་པའི་རེ་བ་ཡོད། གློག་གླད་ཀྱི་བརྙན་ཟློས་ཆ་ཚང་ཡུ་ཊུབ་དྲ་གནས་ཐོག་ཡོད། འདིར་གནོན།

ངོ་དེབ་སོགས་ཀྱི་བོད་ཡིག་ཡིག་གཟུགས་ཆེ་ཆུང་སྒྲིག་སྟངས།

 
མཁྱེན་ཡངས་གྲོགས་པོ་བསོད་ནམས་ཟླ་བ་ལགས།  ཁམས་བཟང་།  ཉིན་ཤས་གོང་ལ་གུས་པའི་གློག་ཀླད་གློ་བུར་དུ་འཕྲོ་བརླག་ཏུ་ཕྱིན་པར་བརྟེན།  གློག་ཀླད་གསར་བ་ཞིག་ཉོ་དགོས་བྱུང་།  གློག་ཀླད་གསར་བའི་སྒེའུ་ཁུང་བརྒྱད་ཚེག་གཅིག་ཅན་དེ་ཡིན་པས་ཡིན་ནམ།  ངོ་དེབ་དང་gmail སོགས་ཀྱི་དྲ་ངོས་སུ་བོད་ཡིག་ཡིག་གཟུགས་ཆུང་ཆུང་ཞིག་ལས་མི་ཤར་བས་དེར་ཐབས་ཤེས་ཡོད་དམ།  དེ་མིན་ཁྱེད་ཀྱི་དྲ་ངོས་སུ་བཀོད་པའི་དུག་འགོག་མཉེན་ཆས་རིན་མེད་ESET ཞེས་པ་དེ་གློག་ཀླད་དུ་ནང་འཇུག་ཚོད་ལྟ་བྱས་མོད།  གློག་ཀླད་རྦད་དེ་ཁེགས་འགྲོ་བས་བེད་སྤྱོད་བྱ་ཁག་པོ་འདུག   གཞན་འདྲི་རྒྱུ་ཞིག་ལ།  གུས་པའི་གློག་ཀླད་ཀྱི་སྒེའུ་ཁུང་བརྒྱད་ཚེག་གཅིག་ཅན་དང་མཉམ་དུ་དུག་འགོག་མཉེན་ཆས་ McAfee ཞེས་པ་ཞིག་ཡོད་པ་འདིའི་དུག་འགོག་གི་ནུས་པ་ག་འདྲ་ཡོད་དམ།  ཡང་ན་དུག་འགོག་མཉེན་ཆས་གང་ཞིག་སྤྱད་ན་ལེགས་མིན་སོགས་ཀྱི་སྐོར་ནས་ལམ་སྟོན་ཞིག་གནང་བའི་རེ་བ་ཡོད།

ལན་དང་པོ།

ངོ་དེབ་དང་ཇི་མཱལ་སོགས་ཀྱི་དྲ་ངོས་སུ་བོད་ཡིག་ཆུང་ཆུང་ཤར་བ་ནི་སྐར་ཁུང་བརྒྱད་ཚགས་གཅིག་ཅན་ (Window8.1) ཡིན་པའི་རྒྱུ་ཚན་གཙོ་བོ་མིན། ངོ་དེབ་དང་ཇི་མཱལ་གྱི་བོད་ཡིག་ཡིག་གཟུགས་ཚད་རན་པོ་སྒྲིག་དགོས་ན་སོ་སོའི་དྲ་མྱུལ་མཉེན་ཆས་ཀྱི་སྒྲིག་བཀོད་སྡེ་ཚན་ setting ནང་འགྲོ་དགོས།

གུ་གུལ་ཁཱོ་རོམ་ (Chrome) ནང་སྒྲིག་སྟངས་ནི།
༡༽ གཤམ་གྱི་རི་མོའི་ནང་གསལ་བ་ལྟར། དང་པོ་ setting ཐོག་གནོན། དེ་ནས་སྒྲིག་བཀོད་སྟེགས་བུའི་གཤམ་འོག་གི་ Show advanced settings ཟེར་བ་དེར་གཅིག་གནོན་དགོས།

༢༽ སྒྲིག་བཀོད་སྟེགས་བུ་རྒྱས་པ་ཞིག་ཤར་ངེས། དེ་དག་ལས་ནང་གསེས་ Web content ཟེར་སའི་ནང་གསེས་ Customize fonts... ཟེར་བ་དེའི་སྟེང་གཅིག་གནོན།

༣༽ དྲ་ཚིགས་ཤར་ཆས་སམ་དྲ་མྱུལ་མཉེན་ཆས་འདིའི་སྟེང་དུ་ཡོད་པའི་སྤྱིར་བཏང་ཡིག་གཟུགས་དང་ཡིག་གཟུགས་ཆེ་ཆུང་སྒྲིག་ས་དེར་སླེབས་པ་རེད། དེར་སླེབས་ནས་ངོ་དེབ་དང་ཇི་མཱེལ་སོགས་ཀྱི་ཡིག་གཟུགས་དེ་རང་གི་འདོད་པ་ལྟར་སྒྲིག་མཆོག་མོད། འོན་ཀྱང་དེར་གུས་པས་དབྱིན་ཡིག་དང་བོད་ཡིག་གཉིས་ཀར་བསམ་བློ་བཏང་བའི་སྐབས་སྤྱི་ཡོངས་ལ་གཞིག་ན་ཡིག་གཟུགས་ "Monlam Uni Ouchan1" དང་ཆེ་ཆུང་ཨང་ 14 ཐོག་འཇོག་ན་ལེགས་པ་མཐོང་། དེ་ནས་མཇུག་གི་ Encoding ཟེར་སའི་ཐོག་ Unicode (UTF-8) འཇོག་དགོས། དེས་བོད་ཡིག་ཙམ་དུ་མ་ཟད་དབྱིན་ཡིག་མིན་པའི་སྐད་ཡོད་དོ་ཅོག་ལེགས་པར་འཆར་ཐུབ་པའི་དགེ་མཚན་ལྡན་འདུག །མཐའ་མ་ Done ཟེར་བ་དེར་གཅིག་གནོན་ན་འགྲིགས་སོ།
ངོ་དེབ་ཐོག་སྤེལ་བའི་གནས་ཚུལ་དང་མཆན།

ཇི་མཱེལ་ (gmail) ནང་གི་ཡི་གེ་

ཊིའུ་ཊར་ངོས་ཀྱི་བོད་ཡིག་ལེགས་པོ་འཆར་ཐུབ་པ།

གོང་གི་ཐབས་ཇུས་དེས་ངོ་དེབ་དངཇི་མཱེལ་ནང་བོད་ཡིག་ཡིག་གཟུགས་ཆུང་ཆུང་རྣམས་ཆེ་རུ་གཏོང་ཐུབ་པ་མ་ཟད། དྲ་ཚིགས་དང་ཟིན་བྲིས་(དཔེར་ན་ Wordpress དང་ Blogger དེ་རིགས་) རྒྱུད་རྩོམ་སྤེལ་སའི་སྟེགས་བུའི་ཐོག་ཡོད་པའི་བོད་ཡིག་ཀྱང་ལེགས་པོ་ཤར་ཐུབ་ཀྱི་ཡོད། གཤམ་གྱི་དཔེ་རིས་གཟིགས།

ཟིན་བྲིས་སྤེལ་སའི་སྟེགས་བུ།

ལན་གཉིས་པ།

དེང་སང་གློག་ཀླད་གསར་པ་ཞིག་ཉོས་པ་དང་དེའི་ནང་ལོ་དུས་གཅིག་ཅན་གི་དུག་འགོག་མཉེན་ཆས་ལེགས་པོ་ཞིག་རང་སྒྲིག་ཡོད། དེར་བརྟེན་ McAfee ལྟ་བུ་དེ་གཅིག་གིས་འགྲིག་བསྡད་པ་རེད། གལ་ཏེ་དེའི་སྟེང་དུག་འགོག་མཉེན་གཉིས་པ་ཞིག་བཅུག་ན་གློག་ཀླད་མི་འགྲོ་བ་ཆགས་སྲིད། དེའི་རྒྱུ་མཚན་ནི་དཔེར་ན། དྲ་འབུ་གཏོར་འགོལ་ཆེད་དུ་དམག་སྡེ་མི་འདྲ་བ་གཉིས་གློ་བུར་དུ་གདོང་ཐུག་བྱུང་བ་ལྟར་རེད། དམག་སྡེ་གཉིས་པོས་དྲ་འབུར་ཐབས་འཛིང་གཏོང་རྒྱུའི་ཚབ་ཏུ། དམག་སྡེ་གཉིས་ཕན་ཚུན་སྐད་ཡིག་དང་གཤིས་ལུགས་མི་མཐུན་པར་ཕན་ཚན་དམག་འཐབ་བྱུང་བ་འདྲ་པོ་རེད། དེར་བརྟེན་གློག་ཀླད་གཅིག་གི་ནང་དུག་འགོག་མཉེན་ཆས་གཅིག་ལས་བླུགས་རྒྱུ་མེད།

ལན་གསུམ་པ།

དུག་འགོག་མཉེན་ཆས་མང་པོ་ཡོད་པ་དང་། དེ་དག་ལ་སོ་སོའི་ཁྱད་ཆོས་དང་ནུས་པ་མི་འདྲ། དེ་དག་ལ་གློག་ཀླད་ཀྱི་དྲན་ཤེས་(memory)དང་གསོག་སྡེར་གྱི་ས་ཆ་ཇི་དགོས་མི་འདྲ། དེ་དག་ལ་དྲ་དུག་བཤེར་མྱུར་དང་གཙང་སེལ་ཐུབ་མིན་མི་འདྲ། འོན་ཀྱང་ད་ལོའི་སྤྱི་ཡོངས་ཀྱི་དཔྱད་བསྡུར་བྱེད་པའི་སྙན་ཐོའི་ནང་དུག་འགོག་མཉེན་ཆས་ལེགས་ཤོས་ཇི་ཡིན་ཤེས་འདོད་ན་འདི་ལོའི་སྤྱི་ཟླ་གཉིས་པའི་ནང་སྤེལ་བའི་རྩོམ་ཡིག་འདིར་ http://www.sonamdawa.com/2015/02/anti-virus-2015.html གཟིགས་རོགས།

ལག་ཐོག་ཁ་པར་ནང་བོད་ཡིག་དྲ་ཚིགས་བཙན་གྲོལ་གཏོང་།

 
དེང་ཁ་པར་གྱི་དར་སོ་ཆེ་ཆེར་སོང་ཡོད་པ་དང་། དྲ་ཐོག་ཏུ་བཞུག་མཁན་བརྒྱ་ཆ་ 25% ནི་ལག་ཐོག་ཁ་པར་ནང་ནས་ཡིན། བརྒྱ་ཆ་ 25% ནི་ཧ་ཅང་མཐོ་པོ་ཡིན་པ་དང་། ཚོང་ལས་ལ་མཉེར་མཁན་ཀུན་གྱིས་གནད་ཀ་དེ་མཐོང་བའི་ཐོག་ཚོང་ལས་ཀྱི་དྲ་ཚིགས་ཡོད་དོ་ཅོག་ཁ་པར་ནང་དཀའ་ངལ་མེད་པར་འཆར་ཐུབ་པ་བྱེད་ཀྱི་ཡོད། འདིར་རང་ཅག་བོད་ཡིག་དང་བོད་ཡིག་དྲ་ཚིགས་ནི་གྲངས་ཚད་མཐོ་པོ་སླེབས་ཡོད་ཀྱང་། དུས་དང་མཐུན་པའི་འགྱུར་བཅོས་དང་ཡར་རྒྱས་བཏང་དགོས་པ་མང་དག་ཞིག་མཆིས། གཅིག་ནི་དྲ་ཚིགས་བཟོ་ཐུབ་པ་ཙམ་མིན་པར་དྲ་ཚིགས་ནང་ཉིན་རེ་དང་བདུན་རེའི་མཚམས་སུ་ནང་དོན་གསར་འཇུག་བྱེད་དགོས། དེ་མིན་དྲ་ཚིགས་གཅིག་ཡོད་ཀྱང་ལོ་ནས་ལོ་བར་དེ་མུར་གཡུག་བཞག་པ་མང་དག་ཞིག་མཐོང་། བོད་ཕྱི་ནང་གཉིས་ཀར་དེའི་སྐྱོན་ཆ་ཆེན་པོ་ཞིག་མཐོང་།

སྐབས་ཐོག་ངས་འདིར་ཆད་འདོད་པ་ནི། ད་ཡོད་བོད་ཡིག་དྲ་ཚིགས་དེ་དག་ལ་ངེས་པར་དུ་ཡར་རྒྱས་གཏོང་དགོས་པ་གཅིག་ཡོད་པ་ནི། བོད་ཡིག་དྲ་ཚིགས་དེ་དག་ལག་ཐོག་ཁ་པར་ཆ་ཚང་ན་དཀའ་ཚིགས་དང་རྒྱུ་རྐྱེན་གང་ལ་ཡང་རེ་མི་དགོས་པར་འཆར་ཐུབ་པ་བྱེད་དགོས་པ་དེ་རེད་འདུག །ཡང་བསྐྱར་གཅིག་ལབ་ན། ལག་ཐོག་ཁ་པར་ནང་བོད་ཡིག་ཡོད་ཀྱང་རུང་མེད་ཀྱང་རུང་། ལག་ཐོག་ཁ་པར་དེ་ཀུ་ཤུ་རྟགས་ཅན་ནམ། ཨན་ཌོའམ། དེ་མིན་གྱི་ཁ་པར་གང་ཞིག་ཡིན་རུང་བོད་ཡིག་དྲ་ཚིགས་གཙང་མ་ཤར་ཐུབ་པ་བྱེད་རྒྱུ་དེ་ཆགས་འདུག །བོད་ཡིག་བཏགས་ཐུབ་མིན་ནི་གནད་དོན་གཞན་ཞིག་རེད།

དེ་ལྟར་ངས་དུས་ཡུན་རིང་པོ་ཞིག་རྒྱུད་པའི་ནང་བོད་ཡིག་དྲ་ཚིགས་མི་ཉུང་བ་ཞིག་བཟོས་ཟིན་ལ། དྲ་ཚིགས་རེ་རེ་བཟོས་ཟིན་པ་དང་དྲ་ཚིགས་འདི་ངས་ལག་ཐོག་ཁ་པར་ནང་ཇི་ལྟར་ཤར་ཐུབ་པ་དང་དམིགས་བསལ་བོད་ཡིག་ཡི་གེ་དེ་དག་འཆར་ཐུབ་མིན་ཉམས་ཞིབ་དང་ཚོད་ལྟ་གྲངས་མེད་ཞིག་བྱས། ངའི་དམིགས་ཡུལ་གཙོ་བོ་གོང་དུ་བཤད་ཟིན་པ་ལྟར་། བོད་ཡིག་དྲ་ཚིགས་དེ་ལག་ཐོག་ཁ་པར་ཚང་མའི་ནང་གཅིག་འགྱུར་ཏུ་ཤར་ཐུབ་པ་དང་། ལག་ཐོག་ཁ་པར་ནང་བོད་ཡིག་ཡོད་མེད་ལ་མ་གཏོས་པར་བོད་ཡིག་དྲ་ཚིགས་ཤར་ཐུབ་པ་བྱེད་རྒྱུ་དེ་ཡིན། སྟབས་འཁེལ་བ་ཞིག་ལ་གདང་ནུབ་གང་བློ་ལ་འཆར་བ་དེ་གློ་བུར་དུ་རྙེད་སོང་། ངས་འདིར་ལྷ་སྒྲུང་ངམ་གྲུབ་མི་ཐུབ་པའི་བསམ་ཚུལ་ཞིག་བཤད་པ་མིན། ཁྱེད་ཀྱི་ལག་ཐོག་ཁ་པར་ནང་བོད་ཡིག་མེད་ཀྱང་གཤམ་འོག་གི་བོད་ཡིག་དྲ་ཚིགས་དེ་དག་འཆར་ཐུབ་པ་བཟོ་ཐུབ་སོང་། ཁྱེད་ཀྱིས་ཚོད་ལྟ་ཞིག་གྱིས་དང་།

http://www.gyama.org
http://www.scienceintibetan.org
http://lhaktsek.blogspot.com
http://tehorsonam.blogspot.com
http://muthak.blogspot.com
http://thoepaga.blogspot.com

བོད་ཀྱི་གློག་བརྙན་སྒྲིག་བཟོ་ལྟེ་གནས་ཆེ་ཤོས་དེ་འཛུགས་སྐྲུན་བྱེད་མགོ་བརྩམས་པ།

 
ཁྱུང་ཆེན་བརྙན་གླིང་གི་ཇུས་འགོད་རི་མོ།
མིག་སྔའི་བོད་ཁུལ་ཡོངས་ནས་གཞི་རྒྱ་ཆེས་ཆེ་བའི་གློག་བརྙན་སྒྲིག་བཟོ་ལྟེ་གནས་ཏེ་ཁྱུང་ཆེན་བརྙན་གླིང་ཞེས་པ་མཚོ་སྔོན་མཚོ་ལྷོ་འབའ་རྫོང་ནས་དངོས་སུ་འཛུགས་སྐྲུན་བྱེད་མགོ་བརྩམས་འདུག འདི་ཉིད་ལེགས་པར་གྲུབ་རྗེས་བོད་ཁུལ་གྱི་གློག་བརྙན་སྒྲིག་བཟོ་དང་བོད་ཀྱི་བརྙན་ཟློས་ལས་རིགས་ཐད་ཀྱི་མི་སྣ་སྐྱེད་སྲིང་དང་བརྙན་ཟློས་རིག་གནས་ཀྱི་འཕེལ་རྒྱས་ལ་སྨན་པའི་ཞབས་ཞུ་མཁོ་འདོན་བྱེད་རྒྱུ་རེད།

ཤེས་རྟོགས་བྱུང་བ་ལྟར་ན། བརྙན་གླིང་འདིར་མ་དངུལ་བྱེ་བ་གཅིག་ལྷག་བཏང་ཡོད་ཅིང་འབའ་རྫོང་སྲིད་གཞུང་གིས་རོགས་སྒྲུབ་གནང་། འདིའི་སྤྱིའི་རྒྱ་ཁྱོན་ལ་རྨིད་གྲུ་བཞི་མ་༨༠༠༠་ལས་བརྒལ་ཡོད་ཅིང་རྨིད་གྲུ་བཞི་མ་༦༠༠ཅན་གྱི་བརྙན་ལེན་ཁང་སོགས་ཡོད།

བརྙན་གླིང་གི་འགན་འཁུར་པ་བསོད་ནམས་རིན་ཆེན་རྒྱལ་ལགས་ཀྱིས་མཚམས་སྦྱོར་གནང་བ་ལྟར་ན། བརྙན་གླིང་གི་གནས་གཞིའི་མཐའ་འཁོར་གྱི་ལེ་བར་ཆིག་བརྒྱའི་ནང་ཚུན་དུ་རང་བྱུང་ཡུལ་ལྗོངས་དང་མིས་བཟོས་ཡུལ་ལྗོངས་མཉམ་གནས་ཡིན་ཏེ། དེའི་ནང་འབའ་ཡུལ་གྱི་རྩྭ་ཐང་དང་རྨ་ཆེན་གངས་རི། མང་རྫོང་གི་བྱེ་སྣ་སོགས་ཚུད་ཡོད་ལ། བརྙན་གླིང་འདི་ག་ཞིང་ལས་དང་འབྲོག་ལས་ཀྱི་སྤེལ་རྒྱུག་མཚམས་དཀྱིལ་དུ་ཆགས་པ་དང་། རྒྱལ་ཁབ་རིམ་པའི་གེ་སར་རིག་གནས་སྐྱེ་ཁམས་སྲུང་སྐྱོབ་ཚོད་ལྟའི་ཁུལ་སོགས་སུ་གཏོགས་པས་ཁོར་ཡུག་ཐད་ཀྱི་ཁྱད་འཕགས་དགེ་མཚན་ཡང་ལྡན་ཡོད།

འདི་ནི་བོད་བརྙན་ལས་རིགས་ཐད་ཀྱི་ཐོལ་བརྒལ་གསར་བ་ཞིག་དང་འཕེལ་རྒྱས་སྒང་གི་སྐྱ་རེངས་གསར་བ་དེ་ཡིན་ཕྱིར་ཀུན་གྱིས་རེ་ལྟོས་བཅངས་ཡོད།
འགན་འཁུར་རྩོམ་སྒྲིག་པ། ཚེ་རྡོར།

བོད་ཡིག་ལཱེ་ཊིན་ཡི་གེར་ཕབ་འབྲི་བྱེད་ཚུལ་སྐོར་མདོར་ཙམ་གླེང་བ།

 

Wylie ནི་ལཱེ་ཊིན་ latin ཡང་ན་དབྱིན་ཡིག་གི་abcdསྤྱད་དེ་བོད་ཀྱི་རིག་གནས་ལ་ཞིབ་འཇུག་འཚོལ་བསྡུ་བྱེད་མཁན་ཚོས་བོད་ཡིག་བཏགས་ཐབས་ཀྱི་རྒྱལ་སྤྱི་ཚད་ལྡན་འགྲོ་སྟངས་ཤིག་ཆགས་ཡོད། སྔོན་ཁ་པར་ནང་བོད་ཡིག་མ་སླེབས་པའི་སྐབས་ང་དང་གྲོགས་པོ་འགའ་ wylie བརྒྱག་དེ་ཕན་ཚུན་འཕྲིན་ཐུང་བསྐུར་རེས་བྱས་མྱོང། wylie ཡི་ཁྱད་ཆོས་ལེགས་ཤོས་ནི་བཏགས་ཐབས་ལས་ལྷ་བ་དང་། དག་ཆ་ལ་ནོར་འཛོལ་མེད་པ་དེ་རེད། གཤམ་ལ་དགའ་རོགས་གཉིས་ཀྱི་ཕན་ཚུན་ལ་བསྐུར་བའི་འཕྲིན་ཐུང་ཞིག་ཡིན་ཁུལ་རེད། ཁྱེད་ཀྱིས་རྟོགས་ཐུབ་བམ། གལ་ཏེ་ཁྱེད་ཀྱི་ wylie ཤེས་ཀྱི་ཡོད་ན་གཤམ་གྱི་གསང་བ་དེ་ཁྱེད་ཀྱི་རྟོགས་ཐུབ་ངེས་རེད།
  • བསམ་གཏན་གྱིས། (sang nyin glog brnyan gsar pa zhig slebs 'dug nga dang mnyam du 'gro khom yod pas.)
  • སྒྲོལ་མས། (sng dror blta bar 'gro na ma gtog phyi dror nga gzhas sbyong bsdar yod)

སྤྱི་ལོའི་དུས་རབས་ཉི་ཤུ་པའི་འགོ་ནས་བཟུང་། མདོ་དབུས་མཐོ་སྒང་དུ་འཚོ་སྡོད་བྱེད་པའི་བོད་མི་རིགས་དང་། དེའི་ཐུན་མོང་མ་ཡིན་པའི་ཆོས་དང་རིག་གཞུང་ལ་དབྱིན་ཇི་དང་ཨ་རིས་གཙོས་པའི་ནུབ་ཕྱོགས་ཀྱི་རྒྱལ་ཁབ་མང་པོའི་ནང་དོ་སྣང་ཆེན་པོ་བྱུང་སྟེ། བོད་ཀྱི་ཤེས་རིག་ལ་ཞིབ་འཇུག་བྱེད་པའི་ཚ་རླབས་ཤིག་འཕྱུར་བ་རེད། ལྷག་དོན་དུ་ཏུན་ཧོང་ནས་ཐོན་པའི་བོད་བཙན་པོའི་རྒྱལ་རབས་སྐབས་ཀྱི་གནའ་བོའི་ཤོག་དྲིལ་མང་དག་ཅིག་ནུབ་གླིང་ལ་ཁྱར་རྗེས། དེ་དག་ལ་ཞིབ་འཇུག་བྱེད་མཁན་ཉིན་རེ་བཞིན་ཇེ་མང་དུ་སོང་། འོན་ཀྱང་། བོད་ཡིག་ནི་བརྡ་སྤྲོད་དང་སྒྲ་འདོན་སྟངས་སོགས་གང་གི་ཆ་ནས་བལྟས་ཀྱང་ནུབ་གླིང་གི་ལཱེ་ཊིན་ཡིག་རིགས་ Latin alphabet ཁག་དང་ཅིས་ནས་ཀྱང་མི་འདྲ་བས་ཁོང་ཚོའི་རྒྱལ་ཁབ་ནང་དུ་བོད་ཡིག་དེ་ལཱེ་ཊིན་ཡི་གེར་ཕབ་འབྲི་བྱེད་ཚུལ་རིགས་མི་འདྲ་བ་མང་པོ་ཞིག་གསར་དུ་ཐོན་ཡོད། དེ་དག་ལས་ཅུང་ཟད་ཆ་ཚང་བ་དང་ཞིབ་ཚགས་པའི་ཕབ་འབྲི་བྱེད་ཚུལ་ཐོག་མ་དེ་ནི་རྒྱ་གར་གྱི་མཁས་པ་སྐུ་ཞབས་ ཅཱན་དྷ་ར་ དྷ་སི་ Rai Sarat Chandra Das ཡིས་གསར་དུ་གཏོད་པ་ཡིན། དེ་རྗེས་སྤྱི་ལོ་ 1959 ལོར་ཨ་རིའི་ཝ་ཤིང་ཀྲོན་སློབ་གྲྭ་ཆེན་མོའི་ the university of washington སློབ་དཔོན་ཟུར་པ་སྐུ་ཞབས་ ཁྲུའུ་རེལ་ ཝེ་ལེས་ Turell Wylie སྔོན་མའི་ཕབ་འབྲི་བྱེད་ཚུལ་ཁག་གི་ལེགས་ཆ་མཁོ་བསྡུས་དང་། རང་ཉིད་ཀྱི་ཞིབ་འཇུག་ཟུར་དུ་སྦྲེལ་ཏེ་ཝེ་ལེའི་ཕབ་འབྲི་ Wylie Transliteration བྱེད་ཚུལ་ཞེས་པ་ཞིག་གཏན་འབེབས་གནང་། ཝེ་ལེའི་ཕབ་འབྲི་བྱེད་ཚུལ་དེ་ཁ་གསལ་ཞིང་གོ་བདེ་ལ། ཧ་ཅང་སྟགས་བདེ་ཡོད་པས་དུས་ཕྱིས་བོད་རིག་པའི་ཁྱབ་ཁོངས་དང་ཁྱད་པར་ཨ་རིའི་རྒྱལ་ཁབ་ནང་ཕབ་འབྲི་བྱེད་ཚུལ་དེ་ཤིན་ཏུ་གྲགས་ཆེ། ཞིབ་འཇུག་ཁྱབ་ཁོངས་ནང་བོད་ཡིག་ལཱེ་ཊིན་ཡི་གེར་ཕབ་འབྲི་བྱེད་པའི་གཅིག་གྱུར་གྱི་ཚད་གཞི་ཞིག་ཡོད་པ་དེའང་ཝེ་ལེའི་ཕབ་འབྲི་བྱ་ཚུལ་ལ་གོའོ།

རྒྱལ་ནང་དུ་གཙོ་བོ་གཙོ་བོ་ཀྲུང་དབྱང་མི་རིགས་སློབ་གྲྭ་ཆེན་མོའི་སློབ་དཔོན་ཟུར་པ་སྐུ་ཞབས་ཡུས་ཏའོ་ཆོན་ 于道泉 གྱིས་གཏན་འབེབས་མཛད་པའི་ཕབ་འབྲི་བྱེད་ཚུལ་ཞིག་དང་། ཀྲུང་གོ་ཚན་རིག་གླིང་མི་རིགས་ཞིབ་སོའོ་ 中国科学院民族研究所 ཡི་ཕབ་འབྲི་བྱེད་ཚུལ་སོགས་མང་དུ་མཆིས་པས་ཞིབ་པར་མི་སྤྲོ། གོང་བཀོད་ཕབ་འབྲི་བྱེད་ཚུལ་དང་ཡུས་ཏའོ་ཆོན་གྱི་ཕབ་འབྲི་བྱེད་ཚུལ་གཉིས་ཡིན། དེ་གཉིས་དབར་དུ་ཁྱད་པར་ཆེན་པོ་མེད་དེ། གཙོ་བོའི་ཁྱད་པར་ནི་བོད་ཡིག་གི་འ་ཡིག་དེ་ཝེ་ལེས་ལཱེ་ཊིན་ཡི་གེ་ 'a ཏུ་ཕབ་ཡོད་ཅིང་། ཡུས་ཏའོ་ཆོན་གྱིས་ va ལ་ཕབ་ཡོད་། ཁོ་བོའི་རྩོམ་ཐུང་ནང་དུ་འཁོད་པའི་དཔེར་བརྗོད་ཁག་དང་ཞར་བྱུང་གི་ནང་དོན་ཁག་ཚང་མའི་ནང་འ་ཡིག་ va གྱིས་མཚོན་པར་བྱས་ཡོད། བོད་ཡིག་ལཱེ་ཊིན་ཡི་གེར་ཕབ་འབྲི་བྱེད་ཚུལ་ལ་སྒྲ་ཡངས་འཇུག་དང་རོག་འཇུག་གཉིས་ཀྱི་གོ་དོན་ཡོད་དེ། སྒྲ་ཡངས་འཇུག་ངོས་ནས་བཤད་ན་ཡིག་འབྲུ་ཕབ་འབྲི་བྱེད་ཚུལ་དང་། ཡི་གེའི་སྒྲ་ཕབ་འབྲི་བྱེད་ཚུལ་ཁག་གཉིས་ལ་གོ་དགོས་ཤིང་། སྒྲ་དོག་འཇུག་ངོས་ནས་བཤད་ན་ཡིག་འབྲུ་ཕབ་བྱེད་ཚུལ་ཁོར་ནང་གོ་དགོས་སོ།

དང་པོ། བོད་ཡིག་ལཱེ་ཊིན་ཏུ་ཕབ་འབྲི་བྱེད་ཚུལ་བཤད་པ།

བོད་ཡིག་ལཱེ་ཊིན་དུ་ཕབ་འབྲི་བྱེད་ཚུལ་ལ་ཡིག་འབྲུ་ཕབས་འབྲི་བྱེད་ཚུལ་ཡང་ཟེར་ཏེ། དེ་ནི་བོད་ཡིག་གི་ཡིག་འབྲུ་དག་སུག་བྲིས་ཀྱི་གོ་རིམ་བཞིན་རིམ་པས་ཕབ་བྲིས་བྱས་པ་ཞིག་ཡིན། དཔེར་ན། བསྒྲིགས་ལྟ་བུ་ཕབ་འབྲི་བྱེད་སྐབས། སྔོན་འཇུག་བ་དང་། མགོ་ཅན་ས། མིང་གཞི་ག །འདོགས་ཅན་ར་བཏགས། དབྱངས་ཡིག་གི་གུ། རྗེས་འཇུག་ག །ཡང་འཇུག་ས་བཅས་རིམ་པས་ཕབ་ན་འཐུས།

བ➜b ས➜s ག➜g ར➜r ི➜i ག➜g ས➜s = བསྒྲིགས་➜bsgrigs ལྟ་བུའོ། །

ཕབ་འབྲི་བྱེད་སྟངས་འདིའི་ཁྱད་ཆོས་གཙོ་བོ་ནི་གང་ཕབ་པའི་ཡི་གེ་དེ་སྔོན་རྗེས་ཡང་འཇུག་དང་བཅས་པ་དག་ཆ་མ་ནོར་བར་ཆ་ཚང་ལཱེ་ཊིན་དུ་ཕབ་ཐུབ་པ་དེ་ཡིན་པས། དེ་ཞིབ་འཇུག་གི་ཁྱབ་ཁོངས་ནང་དུ་རྒྱ་ཁྱབ་ངང་སྤྱོད་བཞིན་ཡོད། འོན་ཀྱང་བོད་ཡིག་གི་ཆུ་ཚད་དེ་ཙམ་མཐོ་པོ་མེད་ཚེ་དེ་བཀོལ་སྤྱོད་དང་སྦྱོར་ཀློག་བྱ་རྒྱུ་ཅུང་ཟད་དཀའ་ཙམ་ཡོད། ང་ཚོས་བོད་རིགས་ཚོས་རྒྱུན་དུ་ལག་ཐོག་ཁ པར་དང་གློག་ཡིག་ Email ནང་དུ་ཡིག་འཕྲིན་བསྐུར་སྐབས་རྒྱ་ཡིག་འབྲི་བའི་ཚབ་ཏུ་ལཱེ་ཊིང་གི་ཕབ་འབྲི་བྱེད་སྟངས་ཇི་བཞིན་བོད་ཡིག་བྲིས་ཚེ་ཅིས་ནས་ནང་མི་བཟང་ངམ། དེ་ལྟར་བོད་ཡིག་གི་གསལ་བྱེད་སུམ་ཅུ་དང་། དབྱངས་ཡིག་བཞི་པོ། མགོ་ཅན་དང་འདོགས་ཅན་སོགས་ལཱེ་ཊིན་ཡི་གེ་གང་དུ་ཕབ་འབྲི་བྱེད་དགོས་སམ་ཞེ་ན། གཤམ་གསལ་རེའུ་མིག་ལས་གསལ་བ་ལྟར་ལགས།

རེའུ་མིག་དང་པོ། གསལ་བྱེད་སུམ་ཅུ།
ཀ ka
ཁ kha
ག ga
ང nga
ཅ ca
ཆ cha
ཇ ja
ཉ nya
ཏ ta
ཐ tha
ད da
ན na
པ pa
ཕ pha
བ ba
མ ma
ཙ tsa
ཚ tsha
ཛ dza
ཝ wa
ཞ zha
ཟ za
འ ‘a
ཡ ya
ར ra
ལ la
ཤ sha
ས sa
ཧ ha
ཨ a



རེའུ་མིག་གཉིས་པ། དབྱངས་བཞི་པོ།
ཨི i
ཨུ u
ཨེ e
ཨོ o

རེའུ་མིག་གསུམ་པ། མགོ་ཅན་དང་འདོགས་ཅན་སོགས།
མགོ་ཅན་ཡི་གེ
འདོགས་ཅན་ཡི་གེ
ར་མགོ
ལ་མགོ
ས་མགོ
ར་བཏགས་
ལ་བཏགས་
ཡ་བཏགས་
ཝ་ཟུར་
r
l
s
r
l
y
w

འོ་ན། ཕབ་འབྲི་བྱེད་སྟངས་ཇི་ལྟར་ཡིན་ནམ་ཞེ་ན། གཤམ་གསལ་གྱི་ངེས་སྲོལ་དག་ངེས་པར་དུ་ཤེས་དགོས།

ངེས་སྲོལ་དང་པོ། ཕབ་བྱའི་ཡི་གེ་དེ་སྦྱོར་ཀློག་གི་གོ་རིམ་དང་སུག་བྲིས་ཀྱི་གོ་རིམ་ལྟར་སྔ་ཕྱི་མ་ལྡོག་པར་རེ་རེ་བཞིན་ཕབ་འབྲི་བྱ་དགོས། གལ་སྲིད་གོ་རིམ་འཛོལ་ན་ཕབ་འབྲི་མི་ཐུབ་བོ། །དཔེར་ན།
གངས་ལྗོངས་
གga➜ ངng➜ སs = གངས gangs
ལl➜ ཇj➜ ོo➜ ངng➜ སs➜ ལྗོངས་ljongs ལྟ་བུའོ། །

ངེས་སྲོལ་གཉིས་པ། དབྱངས་ཡིག་ཞུགས་མེད་པའི་མིང་གཞིའི་རྗེས་སུ་ངེས་པར་དུ་ a འབྲི་དགོས་པ་དང་། དེ་ནས་རྗེས་འཇུག་དང་ཡང་འཇུག་སོགས་རིམ་པས་འབྲི་དགོས། གལ་སྲིད་མིང་གཞིར་དབྱངས་ཡིག་བཞི་པོ་ལས་གང་རུང་ཞུགས་ཡོད་ཚེ། མིང་གཞི་རྗེས་སུ་ a འབྲི་མི་དགོས་པར་དབྱངས་ཡིག་གིས་དེའི་ཚབ་བྱས་ན་འཐུས། དཔེར་ན།
དབྱངས་ཞུགས་མེད་པའི་མིང་གཞིའི་ཡི་གེ
དབྱངས་ཞུགས་པའི་མིང་གཞིའི་ཡི་གེ
ཀང [ཀka+ངng] = ཀང kang
ཀིང [ཀk+i+ངng] = ཀིང king
སགས [སsa+གga+ སs] = སགས sags
སུགས [སs+ུu+གg+སs] = སུགས sugs
ཛར [ཛdza+རr] = ཛར dzar
ཛེར [ཛdz+ེe+རr] = ཛེར dzer
བྱན [བb+ྱya+ནn] = བྱན byan
བྱོན [བb+ྱy+ོo+ནn] = བྱོན byon

ངེས་སྲོལ་གསུམ་པ། མགོ་ཅན་ཞུགས་པའི་ཡི་གེ་ཕབ་འབྲི་བྱེད་སྐབས། མགོ་ཅན་མཚོན་པའི་ལཱེ་ཊིན་གི་ཡིག་འབྲུ་དེ་ཐད་ཀར་མིང་གཞིའི་མདུན་དུ་འབྲི་དགོས། འདོགས་ཅན་ཞུགས་པའི་ཡི་གེ་ཕབ་འབྲི་བྱེད་སྐབས། འདོགས་ཅན་མཚོན་པའི་ལཱེ་ཊིན་གི་ཡིག་འབྲུ་དེ་ཐད་ཀར་མིང་གཞིའི་རྗེས་སུ་འབྲི་དགོས་ཤིང་། ཡང་། འདོགས་ཅན་ཞུགས་པ་གང་ཞིག་ལ་དབྱངས་ཞུགས་མེད་པའི་ཡི་གེ་དཔེར་ན། ཀྲ་ལྟ་བུ་ཕབ་འབྲི་བྱེད་སྐབས། མིང་གཞིའི་རྗེས་སུ་ a ཡིག་སྣོན་དགོས། དབྱངས་ཡིག་ཞུགས་པའི་མིང་གཞི་ཡིན་ཚེ་གོང་མཚུགས་ལྟར་དབྱངས་ཡིག་མཚོན་པའི་ལཱེ་ཊིན་གི་ཡིག་འབྲུ་དེ་འདོགས་ཅན་གྱི་རྗེས་སུ་འབྲི་དགོས། དེ་ལྟར་མ་ཡིན་ན་ཕབ་འབྲི་བྱས་པའི་ཡི་གེ་དེ་གཞན་དང་ནོར་ཉེན་ཆེའོ། །དཔེར་ན།
མགོ་ཅན་ཡི་གེ
ནོར་ཉེན་ཆེ་བའི་ཡི་གེ
རྒས [རr+གga+སs] = རྒས rgas
རགས [རra+g+སs] = རགས rags
ལྔ [ལl+ངng] = ལྔ lnga
ལང [ལla+ངng] = ལང lang
སྣ [སs+ནna] = སྣ sna
སན [སsa+ནn] = སན san

འདོགས་ཅན་ཡི་གེ
ནོར་ཉེན་ཆེ་བའི་ཡི་གེ
ཀྲ [ཀk+རra] = ཀྲ kra
ཀར [ཀka+r] = ཀར kar
གློག [གg+ལl+ོo+གg] = གློག glog

བྱང [བb+ྱya+ངng] = བྱང byang


ངེས་སྲོལ་བཞི་པ། སྔོན་འཇུག་ག་ g དང་མིང་གཞི་ཡ་ ya མཉམ་དུ་ཡོད་པའི་ཡི་གེ་སྟེ། དཔེར་ན། གཡང་ལྟ་བུ་ཕབ་འབྲི་བྱེད་སྐབས། སྔོན་འཇུག་དང་མིང་གཞིའི་བར་དུ་ཚེག་གཅིག་སྣོན་དགོས། དེ་ལྟར་མ་ཡིན་ན་གྱང་ལྟ་བུའི་ཡི་གེ་གཞན་དང་ནོར་ཉེན་ཆེའོ། ། དཔེར་ན།
ཚེག་སྣོན་དགོས་པའི་ཡི་གེ
ནོར་ཉེན་ཆེ་བའི་ཡི་གེ
གཡང [གg+ཡya+ངng]=གཡང g.yang
གྱང [གg+ya+ng] = གྱང gyang
གཡུང [གg+ཡy+ུu+ངng]=གཡུང g.yung
གྱང [གg+y+ུu+ng] = གྱང gyung

ངེས་སྲོལ་ལྔ་པ། ཡིག་འབྲུའི་དབར་གི་ཚེག་དང་ཤད་སོགས་ཕབ་འབྲི་བྱེད་སྐབས་ཚེག་དེ་བར་སྟོང་空格/space གིས་མཚོན་པ་དང་། ཆིག་ཤད་ཚེག་ཆུང་ . གཅིག་གིས་མཚོན་པ། གཉིས་ཤད་ཚེག་ཆུང་གཉིས་ .. ཀྱིས་མཚོན་པ་སོགས་དེ་ལྟར་རིགས་བསྒྲེ་ན་འཐུས། གོང་དུ་འཁོད་པ་ནི་བོད་ཡིག་ལཱེ་ཊིན་ཡི་གེར་ཕབ་འབྲི་བྱེད་པའི་རྩ་བའི་ངེས་སྲོལ་དག་ཡིན། དེ་དག་ཕུལ་གཞན་ཡང་མཐུག་པོའི་ཡི་གེ་ལྔ་དང་། ལེགས་སྦྱར་གྱི་ཡི་གེ། རྣམ་བཅད་སོགས་སྣ་ཚོགས་ཕབ་འབྲི་ཇི་ལྟར་བྱ་དགོས་པའི་ངེས་སྲོལ་རིམ་པས་མཆིས་ཀྱང་། འདིར་སྐབས་བབ་ཏུ་བརྗོད་པར་མི་སྤྲོ། དེའི་སྐོར་ཞིབ་ཆ་མཁྱེན་འདོད་ན་ཁོ་བོའི་རྩོམ་ཐུང་གི་འོག་ཏུ་འཁོད་པའི་དཔྱད་གཞིའི་ཡིག་ཆ་ཁག་ལ་གཟིགས་ན་འགྲིག

དཔེར་བརྗོད་ཁ་ཤས།

སྦྲང་རྩིའི་རོ་ལ་སྲེད་པའི་རྐང་དྲུག་བཞིན། །
sbrang rtsivi ro la sred pavi rkang drug bzhin. .
ལེགས་བཤད་འཚོལ་རྣམས་མཁས་པའི་མདུན་སར་རྒྱུ། །
legs bshad vtshol rnams mkhas pavi mdun sar rgyu. .
ལེགས་བཤད་དོན་དུ་གཉེར་བ་དེ་རྣམས་བཞིན། །
legs bshad don du gnyer ba de rnams bzhin. .
སྦྲང་བུ་རྣམས་ནི་པད་མའི་ཚལ་དུ་འགྲོ། །
sbrang bu rnams ni pad mavi tshal du vgro. .

བརྩེ་ལྡན་ཁྱེད་ཀྱི་མཁྱེན་རབས་འོད་ཟེར་གྱིས།།
btse ldan khyed kyi mkhyen rabs 'od zer gyis..
དག་བློའི་གཏི་མུག་མུན་པ་རབ་གསལ་ནས།།
dag blo'i gti mug mun pa rab gsal nas..
བཀའ་དང་བསྟན་བཅོས་གཞུང་ལུགས་རྟོགས་པ་ཡི།།
bka' dang bstan bcos gzhung lugs rtogs pa yi..
བློ་གྲོས་སྤོབས་པའི་སྣང་བ་བསྩལ་དུ་གསོལ།།
blo gros spobs pa'i snang ba btsal du gsol..

གཉིས་པ་བོད་ཡིག་དབྱིན་ཡིག་ཏུ་ཕབ་འབྲི་བྱེད་ཚུལ་བཤད་པ།

བོད་ཡིག་དབྱིན་ཡིག་ཏུ་ཕབ་འབྲི་བྱེད་ཚུལ་ལ་ཡི་གེའི་སྒྲ་ཕབ་འབྲི་བྱེད་ཚུལ་ཡང་ཟེར་ཏེ། དེ་ནི་བོད་ཡིག་གི་ཡིག་འབྲུ་དག་སྒྲའི་འདོན་ཚུལ་ཇི་བཞིན་རིམ་པས་ཕབ་འབྲི་བྱས་པ་ཞིག་ཡིན། ཕབ་འབྲི་བྱེད་ཚུལ་འདི་བོད་ཡིག་ལཱེ་ཊིན་དུ་ཕབ་འབྲི་བྱེད་ཚུལ་དང་མི་འདྲ་བར། ཕབ་བྱའི་ཡི་གེ་འདི་སྔོན་རྗེས་ཡང་འཇུག་སོགས་ཚང་མ་ཕབ་དགོས་པའི་ངེས་པ་མེད་དེ། ཕབ་བྱའི་ཡི་གེའི་སྒྲ་གཙོ་བོར་བཟུང་ནས་ཕབ་དགོས། དཔེར་ན། བསྟན་པ་ཞེས་དེ་ལཱེ་ཊིན་་ཡི་གེར་ bstan pa ཞེས་ཕབ་ཀྱང་། དབྱིན་ཡིག་ཏུ་ Tenpa ཞེས་ཕབ་པ་ཡིན།

བོད་ཡིག་དབྱིན་ཡིག་ཏུ་ཕབ་འབྲི་བྱེད་ཚུལ་ཤེས་དགོས་ན། དེའི་གཤམ་གསལ་གྱི་ཁྱད་ཆོས་དག་ངེས་པར་དུ་རྟོགས་དགོས།

དང་པོ། བོད་ཡིག་དབྱིན་ཡིག་ཏུ་ཕབ་འབྲི་བྱེད་ཚུལ་རྒྱ་གར་དབྱིན་སྐད་ཀྱི་ཤུགས་རྐྱེན་ཆེན་པོ་ཐེབས་ཡོད་དེ། དེའང་རྒྱ་གར་དབྱིན་སྐད་ནང་དུ་དབྱིན་ཡིག་ d /di:/ དང་ t /ti:/ གཉིས་ལ་ /dri:/ དང་ /tri:/ ཞེས་ཀློག་བཞིན་ཡོད་པས། བོད་ཡིག་ ཀྲ སྐྲ སྒྲ ཏྲ པྲ སྤྲ སྦྲ ལ་སོགས་པ་ཕབ་འབྲི་བྱེད་སྐབས་ dra ཞེས་ཕབ་དགོས་ཀྱང་། རྒྱུན་དུ་ da ཞེས་པར་ཕབ་ཡོད་པ་དང་། ཡང་བོད་ཡིག་ ཁྲ གྲ དྲ ཐྲ ཕྲ བྲ ལ་སོགས་ཕབ་འབྲི་བྱེད་སྐབས་ tra ཞེས་ཕབ་འབྲི་བྱེད་དགོས་ཀྱང་། རྒྱུན་དུ་ ta ཞེས་པར་ཕབ་ཡོད། དཔེར་ན།
སྒྲོལ་མ་ཞེས་པ་ drolma ཞེས་ཕབ་དགོས་ཀྱང་། རྒྱུན་དུ་ dolma ཞེས་ཕབ་ཡོད།
འཕྲིན་ལས་ཞེས་པ་ trinley ཞེས་ཕབ་དགོས་ཀྱང་། རྒྱུན་དུ་ tinley ཞེས་ཕབ་ཡོད།

འོན་ཀྱང་། ལམ་སྲོལ་དེ་ཕྱིས་ཡོངས་གྲགས་སུ་གྱུར་སྟབས། དེང་སྐབས་ཚང་མས་དེ་ལྟར་སྤྱོད་བཞིན་མཆིས་པས། ཁོ་བོའི་བསམ་པར་ང་ཚོས་ཀྱང་དེ་ལྟར་ལག་ལེན་བསྟར་ན་ཕབ་འབྲི་བྱེད་ཚུལ་གཅིག་གྱུར་ཡོང་བའི་དགེ་མཚན་ཆེ་སྙམ།

གཉིས་པ། བོད་ཡིག་དབྱིན་ཡིག་ཏུ་ཕབ་འབྲི་བྱེད་སྐབས་ཕལ་མོ་ཆེ་ཁ་སྐད་གཙོར་བཟུང་ནས་ཕབ་འབྲི་བྱེད་པ་ལས། ཡིག་སྐད་གཙོར་འཛིན་གྱི་མེད་དེ། དཔེར་ན།
དགྲ་འདུལ་ཞེས་པ་དེ་ཡིག་སྐད་ལྟར་ཀློག་ན་ dadul ཞེས་ཕབ་དགོས་ཀྱང་། རྒྱུན་དུ་ཁ་སྐད་གཞིར་བཟུང་སྟེ་ damdul ཞེས་ཕབ་ཡོད།
ངག་དབང་ཞེས་པ་དེ་ཡིག་སྐད་ལྟར་ཀློག་ན་ ngagwang ཞེས་ཕབ་དགོས་ཀྱང་། རྒྱུད་དུ་ཁ་སྐད་གཞིར་བཟུང་སྟེ་ ngawang ཞེས་ཕབ་ཡོད།
རྟ་མགྲིན་ཞེས་པ་དེ་ཡིག་སྐད་ལྟར་ཀློག་ tadrin ཞེས་ཕབ་དགོས་ཀྱང་། རྒྱུན་དུ་ tamdin ཞེས་ཕབ་ཡོད།

འོན་ཀྱང་། བོད་ཡིག་འགའ་ཤས་དབྱིན་ཡིག་ཏུ་ཕབ་སྐབས་དེ་ལྟར་ངེས་པར་དུ་ཁ་སྐད་གཞིར་བཟུང་ནས་ཕབ་འབྲི་བྱེད་དགོས་དོན་མེད་དེ། དཔེར་ན།
དཔལ་འབྱོར་ཞེས་པ་དེ་ཁ་སྐད་ལྟར་ཀློག་ན་ panjor ཞེས་ཕབ་དགོས་ཀྱང་། རྒྱུན་དུ་ཡིག་སྐད་ཇི་བཞིན་ paljor ཞེས་ཕབ་པ་ལྟ་བུའོ།

གསུམ་པ། བོད་ཡིག་དབྱིན་ཡིག་ཏུ་ཕབ་འབྲི་བྱེད་ཚུལ་དེ་སྒྲ་གདངས་ལྷ་སའི་སྐད་ཚད་གཞིར་བཟུང་ཡོད་པ་ལས། ཁམས་སྐད་དང་ཨ་མདོའི་སྐད། རྒྱ་རོང་སྐད་སོགས་ཧ་ལམ་ཚད་གཞིར་གཟུང་མེད་དེ། དཔེར་ན།
ཚེ་རིང་ཞེས་པ་ཨ་མདོའི་སྐད་ཇི་བཞིན་ཕབ་འབྲི་བྱས་ན་ tserang ཞེས་ཕབ་དགོས་ཀྱང་། རྒྱུན་དུ་ལྷ་སའི་སྐད་ཇི་བཞིན་ tsering ཞེས་ཕབ་ཡོད་པ་ལྟ་བུའོ།

ཕབ་འབྲི་བྱེད་ཚུལ་དེ་དུས་རྒྱུན་མིའི་མིང་དང་། ས་མིང་སོགས་དབྱིན་ཡིག་ཏུ་བསྒྱུར་སྐབས་ཡོངས་ཁྱབ་ཏུ་བཀོལ་བའི་ཕབ་འབྲི་བྱེད་ཚུལ་ཞིག་ཡིན། བོད་དང་འབྲེལ་བའི་ཕྱི་རྒྱལ་གྱི་ཚགས་པར་དང་དྲ་ངོས། ཡིག་ཆ་སོགས་ཀྱི་ནང་དུ་བོད་ཀྱི་ས་མིང་དང་མིའི་མིང་ཐོན་ཡོད་དངག་ལཱེ་ཊིན་ཡི་གེར་ཕབ་འབྲི་བྱས་པ་ཉུང་ཞིང་། དབྱིན་ཡིག་ཏུ་ཕབ་འབྲི་བྱས་པ་ཤས་ཆེའོ། །དཔེར་ན།
གཞིས་ཀ་རྩེ་ཞེས་པ་ Shigatse ཞེས་བྱིན་ཡིག་ཏུ་ཕབ་པ་མང་བ་ལས་ gzhis ka rtse ཞེས་ལཱེ་ཊིན་ཡི་གེར་ཕབ་པ་ཉུང་ངོ། །
ཨ་མདོ་ཞེས་པ་ Amdo ཞེས་པ་དབྱིན་ཡིག་ཏུ་ཕབ་པ་མང་བ་ལས་ a mdo ཞེས་ལཱེ་ཊིན་དུ་ཕབ་པ་ཉུང་བ་ལྟ་བུའོ།

དེར་བརྟེན་ང་ཚོས་ཀྱང་རང་ཉིད་ཀྱི་མང་དག་དབྱིན་ཡིག་ཏུ་འབྲི་སྐབས་རྒྱ་ཡིག་སྒྲ་སྦྱོར་ཡི་གེ་拼音ཇི་བཞིན་འབྲི་མི་དགོས་པར། དབྱིན་ཡིག་ཏུ་ཕབ་འབྲི་བྱེད་ཚུལ་ལྟར་བྲིས་ན་འཛམ་གླིང་གི་འགྲོས་དང་མཐུན་ཐུབ་བོ།

ཤར་གཞོན་ཚེ་རིང་ཟླ་བ། ཀྲུང་དབྱང་མི་རིགས་སློབ་ཆེན་བོད་རིག་པ་ཞིབ་འཇུག་གླིང་ 2006ཞིབ་འཇུག་སློབ་མ།

དཔྱད་གཞིའི་ཡིག་ཆ།

  1. Wylie transliteration. From: http://en.wikipedia.org/ Wylie_transliteration
  2. A standard system of Tibetan Transcription (Turell wylie, Harvard Journal of Asiatic
  3. Studies,22<1959>261-7)
  4. 统一藏文的拉丁转写 促进藏文的信息化建设. 《藏文软件开发专项专刊》
  5. 王贵.藏族人名研究.民族出版社.1991 年版
  6. 陈丽娜等.藏文拉丁转写的研究与实现.《计算机工程与设计》2006 年第1 期
  7. 牛飞等.藏文拉丁转写的概貌.《青海师范大学学报》(自然科学版)2006 年第3 期
  8. 江荻.藏文的拉丁字母转写方法--兼论藏文语料的计算机转写处理.《民族语文》2006 年第1 期

ཁྱེད་ཀྱིས་ OTG ཇི་ལྟར་བེད་སྤྱོད་གཏོང་གི་ཡོད།

 
ཨན་ཌོའི་ཁ་པར་བཟོ་གྲྭ་མང་པོ་ཞིག་གིས་རྙོག་ཁྲལ་གང་ལ་ཡང་མ་བསམ་པར་ USB On-the-Go ཟེར་བའམ་བསྡུས་ཚིག་ཏུ་ OTG ཟེར་བའི་བེད་སྤྱོད་ཅན་གྱི་ཁྱད་ཆོས་གསར་པ་ཞིག་སྦྱར་བཞིན་ཡོད། གལ་ཏེ་མཐུན་རྐྱེན་འདི་ཡོད་ན། ཁྱེད་ཀྱི་ལག་ཐོག་ཁ་པར་འདི་གཙོ་འཁོར་ཞིག་ཏུ་འགྱུར་ཐུབ་པ་དང་། ཡན་ལག་གི་གློག་ཆས་དཔེར་ན། མཐེབ་སྡེར་ (pendrive) དང་ མཐེབ་གཞོང་ལ་སོགས་པ་དེ་དག་འདིར་མཐུད་དེ་བཀོལ་སྤྱོད་ཐུབ་ཀྱི་ཡོད།

OTG ནི་ "On the go" ཟེར་བ་དང་བསྡུས་ཚིག་རེད། གློག་ཆས་གཉིས་ OTG ཐོག་ཡོད་ན། གློག་ཆས་དེ་གཉིས་བར་འབྲེལ་ལམ་བཙུག་ཐུབ་པ་དང་། དེ་གཉིས་བར་ལས་ཀ་སྒྲུབ་ཐུབ་པའི་བྱ་ནུས་གསར་པ་རགས་ཀྱི་ཡོད། དེར་དཔེ་མཚོན་ལེགས་ཤོས་ནི། དེ་སྔོན་ང་ཚོས་མཐེབ་སྡེར་ནང་གི་ཡིག་ཆ་དེ་རིགས་གློག་ཀླད་རྒྱུད་རང་ཉིད་ཀྱི་ལག་ཐོག་ཁ་པར་ནང་བཤུ་དགོས་ཀྱི་ཡོད། ད་ཆ་ལག་ཐོག་ཁ་པར་མང་པོའི་ནང་ OTG གྱི་མཐུན་རྐྱེན་དེ་ཡོད་པར་བརྟེན་གློག་ཀླད་མི་དགོས་པར་ལག་ཐོག་ཁ་པར་གྱིས་མཐེབ་སྡེར་ཁ་བསྔོག་ཐུབ་པ་དང་གཞན་ཡང་ལག་ཐོག་ཁ་པར་དང་དཔར་སློག་འཕྲུལ་ཆས་(printer)གཉིས་མཐུད་དེ་ཡི་གེ་དཔར་སློག་བརྒྱག་ཐུབ་པ་སོགས་ཆགས་ཡོད་པ་ལྟ་བུ་རེད། ཁྱེད་ཀྱི་ལག་ཐོག་ཁ་པར་དེ་ OTG ཡིན་མིན་ཤོག་སྒམ་གྱི་ངོས་སུ་གཤམ་གྱི་རྟགས་དེ་ཡོད་མེད་ནས་ཤེས་ཐུབ
ཁ་པར་ཉོ་སྐབས་ཕྱི་ཤོག་ལ་ལས་རྟགས་འདི་འདུག་ན་ཁྱེད་ཀྱི་ཁ་པར་དེ་ OTG ཡིན་པ་རེད།

OTG ཆ་རྐྱེན་དང་དགོས་མཁོ།

སྤྱིར་བཏང་བྱས་ན་ OTG གྱི་མཐུན་རྐྱེན་ལྡན་པའི་ལག་ཐོག་ཁ་པར་དང་ཊེབ་ལེཊ་ཚང་མས་མཐེབ་སྡེར་དང། མཐེབ་གཞོང་། ཙི་ཙི། སྲ་སྡེར་སོགས་བེད་སྤྱོད་ཡོང་ཐུབ་ཀྱི་ཡོད་ཀྱང་། སྐབས་རེ་མཐུད་ས་དང་མཐུད་མཁན་གཉིས་བར་ལ་མཐུན་སྦྱོར་དང་འབྲེལ་ཆགས་ཐུབ་མིན་ལ་ཡང་རགས་ལས་ཡོད། ཁྱེད་ཀྱིས་སོ་སོའི་ཁ་པར་དེར་ OTG ཡོད་མེད་ཤེས་འདོད་ན། Play Store རྒྱུད་ USB Host Diagnostics ཞེས་པའི་ཨེཔྶ་དེ་བླུགས་ནས་བལྟ་དགོས།

གལ་ཏེ་ཁྱེད་ཀྱི་ཁ་པར་རམ་ཊེབ་ལེཊ་དེ་ OTG གི་མཐུན་རྐྱེན་ཡོད་པ་ཞིག་ཡིན་ན། དེ་ནས་ཁྱེད་ལ་ OTG གི་ཏར་སྐུད་ཆུང་ཆུང་ཞིག་ངེས་པར་དུ་ཡོད་དགོས། ཏར་སྐུད་དེ་ཁྲོམ་རྭ་ནས་ལས་ལྷ་པོར་རག་ཐུབ་པ་དང་གོང་ཚད་ཕལ་ཆེར་རྒྱ་གར་སྒོར་ 50/- ཙམ་རེད། གཤམ་གྱི་དཔེ་རིས་ལས་གསལ།
OTG ཏར་སྐུད།

OTG བེད་སྤྱོད་གཏོང་སྟངས།

༡༽ ལག་ཐོག་ཁ་པར་ལ་མཐེབ་སྡེར་མཐུད་ནས་ཡིག་ཆ་བལྟ་བསྔོག་བྱེད་པ།
 ༢༽ མཐེབ་སྡེར་མང་པོ་དུས་གཅིག་ལ་ཁ་པར་ནང་ནས་བསྔོག་པ།
 ༣༽ དྲ་རྒྱའི་ཏར་སྐུད་ RJ45 དེ་ usb ethernet རྒྱུད་ཁ་པར་ལ་དྲ་རྒྱའི་མཐུན་རྐྱེན་སྤྲོད་ཐུབ་པ། དེ་ལས་ཀ་བྱེད་ཐུབ་རྒྱུར་ཁ་པར་ནང་དམིགས་བསལ་གྱི་མཉེན་ཆས་བཅུག་དགོས།
 ༤༽ སྒྲ་གཙང་བཟོ་ཐུབ་པའི་ USB headphone དེ་ཚོད་ལྟ་ཞིག་བྱས་པ་ཡིན། ང་ལ་ཡོང་མ་སོང་།
 ༥༽ རི་མོ་འབྲི་བྱེད་ཀྱི་ Bamboo Tab དང་ལག་ཐོག་ཁ་པར།
 ༦༽ གསོག་སྡེར་ 1TB ཅན་ཞིག་ལག་ཐོག་ཁ་པར་དང་མཐུད་ཐུབ། གསོག་སྡེར་ལ་གློག་ངེས་ཅན་ཞིག་དགོས་ཀྱི་འདུག །དེར་བརྟེན་ OTG with USB Power དེ་ཡོད་ན་འགྲིགས་ཀྱི་འདུག
 ༧༽ ཡིག་བཏག་མཐེབ་གཞོང་ཁ་པར་ལ་མཐུད་དེ་ཡི་གེ་མྱུར་པོ་བརྒྱག་ཐུབ་པ།
 ༨༽ སྐུད་མེད་ཀྱི་ཙི་ཙི་ཞིག་དང་ལག་ཐོག་ཁ་པར་མཐུད་དེ་ལག་ཐོག་ཁ་པར་སྟངས་འཛིན་ཐུབ་པ།
 ༩༽ SD-Card, Micro-SD སོགས་ཁ་བསྔོག་བྱེད་ USB-Adapter དང་ཁ་པར་མཐུད་ཐུབ་པ།
 ༡༠༽ ཁ་པར་གཞན་ཞིག་གི་ཡིག་ཆ་རང་ཉིད་ཀྱི་ཁ་པར་ནང་བལྟ་ཀློག་ཐུབ་མིན་ཚོད་ལྟ་ཞིག་བྱས་པ་ཡིན། དེ་ཡོང་གི་མིན་འདུག །དྲ་ཚིགས་ཞིག་གི་ངོས་སུ་མི་ཞིག་གིས་ཚོད་ལྟ་བྱས་པའི་རྒྱུད་ OTG དེ་ལྟར་བྱས་ན། གློག་མེ་ཕར་གཏོང་ཚུར་གཏོང་བྱེད་ཐུབ་ཟེར་འཁོད་འདུག ། འདིར་གཟིགས།
༡༡༽ Xbox Game Controller དང་ཁ་པར་མཐུད་དེ་གློག་རྩེད་རྩེ་ཐུབ་པ།
༡༢༽ ལག་ཐོག་ཁ་པར་ནས་ཡིག་ཆ་དཔར་བརྒྱག་ཐུབ་པ།
༡༣༽ External DVD དང་ཁ་པར་གཉིས་བར་མཐུད་སྦྱོར་དང་ལས་ཀ་བྱེད་ཐུབ་མིན་ངས་ད་ལྟ་བཤད་ཐུབ་ཀྱི་མིན་འདུག །སང་ཉིན་ཚོད་ལྟ་ཞིག་བྱེད་ནས་འདིར་བཀོད་མཆོག
༡༤༽ དེང་སང་གི་ LCD དང་ LED གཟུགས་མཐོང་གློག་འཕྲིན་དང་ལག་ཐོག་ཁ་པར་གཉིས་མཐུད་དེ་ཁ་པར་གྱི་མདོང་ངོས་ཆ་ཚང་ཤར་ཐུབ། དེ་ལ་ Micro USB to HDMI MHL Adapter ཏར་སྐུད་གཞན་ཞིག་དགོས་པ་མ་ཚད་ HDMI གྱི་ཏར་སྐུད་ལ་གློག་མཐུད་ས་ཡང་ཡོད་དགོས། དེ་མིན་ཏག་ཏག་མི་ཡོང་།

༡༥༽ OTG Adapter སྦྱད་དེ་བཤེར་འབེབ་ (Scanner) དང་ལག་ཐོག་ཁ་པར་གཉིས་མཐུད་རྒྱུ་ཡོད་པར་བཤད། ངས་ཚོད་ལྟ་བྱས་པའི་རྒྱུད། གློག་ཆས་གཉིས་མཐུད་པ་ཙམ་གྱི་མི་འགྲིགས་པར། ཁ་པར་ལ་ངེས་པར་དང་བཤེར་འབེབ་དང་འཚམ་པའི་ཨེཔྶ་ (apps) ཤིག་དགོས་འདུག །དེ་སྔོན་ Accusoft USB Scanner གྱི་ཨེཔྶ་དེ་ཡག་པོ་འགྲོ་གི་ཡོད་བཟོ་འདུག་ཀྱང་། ད་ལྟ་དྲ་གནས་དེ་ནས་ཨེཔྶ་དེ་ཕབ་ལེན་ཐུབ་ཀྱི་མིན་འདུག །ད་ལྟ་ང་ལ་ཡོད་པའི་བཤེར་འབེབ་དེར་ཚོད་ལྟ་འགྲོ་བཞིན་ཡོད་ལ་དེ་ལ་འགྲོ་བའི་ཨེཔྶ་འདྲ་འདུག་ན་གཏན་གཏན་བཤེར་འབེབ་དེ་སྤྱོད་ཐུབ་ངེས།
༡༦༽ ཁྱེད་ཀྱི་པར་ཆས་ཀྱང་ཐད་ཀར་ལག་ཐོག་ཁ་པར་དང་མཐུད་དེ་པར་ཆས་ནང་གི་འདྲ་པར་དེ་དག་རང་ཉིད་ཀྱི་ཁ་པར་ནང་དུ་ལེན་ཐུབ།
༡༧༽ ཁྲོམ་གཟིགས་ཁང་ (shopping mall) དང་ཚོང་ཁང་གི་ Bar code Reader མཉེན་ཆས་དེ་ OTG རྒྱུད་ལག་ཐོག་ཁ་པར་དང་མཐུད་ནས་ཚོང་རྩིས་བརྒྱག་ཐུབ་ཀྱི་ཡོད། དྲ་གནས་འདིར་གཟིགས།
ཞོར་དུ་དེང་སང་ཁྲོམ་རྭའི་ནང་ OTG cable མི་དགོས་པར་ལག་ཐོག་ཁ་པར་ལ་ཐད་ཀར་རྒྱུད་རྒྱུའི་མཐེབ་སྡེར་གསར་པ་དེ་འདྲ་ཡང་ཐོན་འདུག གཤམ་གྱི་དཔེ་རིས་ལ་གཟིགས།
དེ་མིན་ OTG གྱི་བེད་སྤྱོད་གཞན་གང་ཡོད་པ་ཁྱེད་ཀྱིས་ཤེས་སམ། གལ་ཏེ་ཁྱེད་ལ་བསམ་ཚུལ་དང་དེ་མིན་བེད་སྤྱོད་ཧ་གོ་བ་འདྲ་ཡོད་ན། འདིར་མཆན་བཀོད་སའི་ནང་མཉམ་བཞུགས་གནང་རོགས།

དྲ་ཚིགས་ནང་རེའུ་མིག་བཀོད་སྟངས།

 
Microsoft Word དང་ Excel ནང་ལས་ཀ་བྱེད་མཁན་ཞིག་གིས་རེའུ་མིག་བཟོ་རྒྱུ་ནི་ཕྲུ་གུའི་རྩེ་མོ་ལྟར་ལས་ལྷ་པོའི་ངང་བཟོ་ཐུབ་ཀྱི་ཡོད། འོན་ཀྱང་དྲ་ཚིགས་ཐོག་རེའུ་མིག་དེ་རིགས་བཟོ་དགོས་བྱུང་ན་དེ་ལྟར་སྟབས་བདེ་པོ་ཞིག་རྩ་བ་ནས་མེད། རྒྱུ་མཚན་ནི་དྲ་ཚིགས་ནང་རེའུ་མིག་བཟོ་དགོས་ན་ངེས་པར་དུ་ HTML གྱི་སྐད་ཡིག་དང་ HTML བརྒྱག་སྟངས་ཤེས་དགོས། HTML གྱི་འགྲོ་སྟངས་ཤེས་མཁན་ཞིག་ཡིན་ནའི་རེའུ་མིག་བཟོ་རྒྱུ་ནི་རྙོག་ཟིང་ཅན་ཞིག་བརྩི་གི་ཡོད། གང་ལྟར་རྒྱུ་མཚན་གང་ལ་ཐུག་ཀྱང་རུང་ངས་དོ་སྣང་བྱུང་བ་ནི་བོད་ཡིག་གི་དྲ་ཚིགས་མང་པོའི་ནང་རེའུ་མིག་བཀོད་བཞག་པའི་རྩོམ་ཡིག་མང་པོ་མཐོང་རྒྱུ་མིན་འདུག།།གལ་ཏེ་རེ་བཟུང་ཡོད་ན་དེ་དག་ཕལ་ཆེ་བ་པར་གྱི་ཡིག་ཆའི་ཐོག་བཟོས་བཞག་པ་ཤ་སྟག་རེད་འདུག།

རེའུ་མིག་ཞིག་གི་ནང་དཔྱད་གཞི་ཚད་བསྡུར་བྱེད་པའི་ཨང་གྲངས་དང་མིང་ཐོ་བཀོད་དེ་ཀློག་མཁན་ལ་གནད་དོན་མང་པོ་ཞིག་ལ་བློ་སྒོ་འབྱེད་ཐུབ་པའི་ཁྱད་ཆོས་དམིགས་བསལ་ཅན་ཞིག་ཡོད། བརྒྱ་བཤད་ཚིག་གི་ཤོག་ལེ་བཀང་པ་ལས་སྐབས་རེ་རེའུ་རེ་གཉིས་ཀྱིས་དོན་གནད་ཆ་ཚང་གསལ་ལེར་སྟོན་ཐུབ་ཀྱི་ཡོད། དེར་དཔེ་མཚོན་ཆེད་གཤམ་ལ་རེའི་མིག་ཞིག་བཀོད་ཡོད། རེའུ་མིག་དེར་ངས་དམིགས་བསལ་འགྲེལ་བཤད་བརྒྱག་གི་མིན། ཁྱེད་ཀྱི་དོན་རྟོགས་ཐུབ་མིན་གཟིགས་དང་། ཁྱེད་ཀྱིས་གཏན་གཏན་ཧ་གོ་ངེས་རེད།
No.
Browser
Usage
1
Chrome
39%
2
Firefox
18%
3
Safari
13%
4
Internet Explorer
7%
5
Opera
5%
6
Others
5%

རེའུ་མིག་ཞིག་པར་བཟོས་ནས་དྲ་ཚིགས་ཐོག་འཇོག་པ་ནི། ཐབས་ཤེས་གཅིག་རེད། འོན་ཀྱང་དེའི་སྐྱོན་ཆ་གཅིག་ནི་རྗེས་སུ་རེའུ་མིག་གི་ཨང་གྲངས་དང་དེའི་ཐོག་བཟོ་བཅོས་བྱེད་དགོས་བྱུང་ན། རེའུ་མིག་དེ་བསྐྱར་དུ་མཉེན་ཆས་ཞིག་གི་ནང་བསྒྲིགས་དགོས་པ་དང་། དུས་ཚོད་ཡང་བསྐྱར་བཏང་དགོས་འཁེལ་སྲིད།

དེར་བརྟེན་བསྐྱར་ཟློས་ཀྱི་ལས་ཀ་བྱེད་མི་དགོས་པ་དང་། བཟོ་དགོས་པའི་རེའུ་མིག་དེ་རང་གི་མོས་པ་དང་མཐུན་པ། བཟོས་ཟིན་པའི་རེའུ་མིག་དེ་དྲ་ཚིགས་ཀྱི་རྣམ་པ་དང་མཚམས་པ་ཞིག །བཟོ་སྟངས་སྟབས་བདེ་པོ་དང་རྒྱུན་གཏན་ངས་སྤྱད་པའི་ཐབས་ཇུས་ལེགས་ཤོས་དེ་ཁྱེད་ལ་སློབ་སྟོན་བྱེད་ཀྱི་ཡིན།

དྲ་ཚིགས་མཁན་པོ་ཞིག་ཡིན་ན། HTML བརྒྱག་ནས་རེའུ་མིག་བཟོ་མཆོག །དེར་ངས་སྟོན་པའི་ཐབས་ཤེས་དེ་ནི་ HTML བརྒྱག་སྟངས་མི་ཤེས་མཁན་དང་། HTML རྒྱག་ཤེས་ཀྱང་དུས་ཚོད་གཅེས་འཛིན་བྱེད་མཁན་ཆེད་དུ་ཡིན་ཟེར་མཆོག །ག་རེ་་་་་དུས་ཚོད་གཅེས་འཛིན་་་་་ཆེད་དུ་་་་། ད་འུར་བཤད་ཀྱི་ཡོད་པའི་བཟོ་འདྲ་པོ་ཆགས་སོང་། ཧཱ་ཧཱ།

རེའུ་མིག་བཟོ་སྟངས།

༡༽ ཚང་མས་ Word མཉེན་ཆས་ཤེས་ཀྱི་ཡོད་ཙང་། རང་གི་འདོད་མོས་ལྟར་རེའུ་མིག་གཅིག་བཟོས། རེའུ་མིག་གི་བཟོ་དབྱིབས་དང་ཁ་མདོག །ནང་ངོས་ཀྱི་གྲངས་ཐོ་སོགས་བཀོད་སྒྲིག་བྱོས།
༢༽ ཡིག་ཆ་དེ་ Web Page, Filtered (*.htm, *html) རྣམ་པའི་ཐོག་ཉར་ཚགས་བྱེད།
༣༽ ཉར་ཚགས་ཟིན་པའི་ཡིག་ཆ་དེ་ Notepad  ནང་ཁ་ཕྱེ་དགོས།
༤༽ Notepad ནང་གཟིགས་པའི་སྐབས་ཁྱེད་ཀྱིས་ HTML གྱི་ code མང་པོ་མཐོང་ཐུབ། དེ་དག་ལས་<table ནས་ </table>བར་བཤུ་(Copy) དགོས། འདི་ནི་རེའུ་མིག་གི་ HTML code ཆ་ཚང་དེ་རེད།

༥༽ དེ་ནས་སོ་སོའི་དྲ་ཚིགས་སམ་ཟིན་བྲིས་བཀོད་སའི་སྒྲོམ་དེ་ཁ་ཕྱེ་ནས། HTML བཀོད་སའི་ནང་གོང་གི་རེའུ་མིག་གི་ཀོཊ་ (code) དེ་འདིའི་ཐོག་འཕབ་ (Paste) དགོས།
༦༽ དེ་རྗེས་ཐད་ཀར་རྩོམ་ཡིག་སྤེལ་བའམ་ཡང་ན་སྔོན་བལྟ་ (Preview) ཞིག་བྱེད་ན་འགྲིགས། blogger སྤྱོད་མཁན་ཚོས་ Compose ཟེར་བ་དེའི་ཐོག་གནོན་ནས་བལྟ་ན་འགྲིགས།
དེ་ལྟར་དྲ་ཚིགས་ངོས་སུ་རེའུ་མིག་བཀོད་སྟངས་བསླབས་ཟིན། གོང་གི་འགྲེལ་བཤད་དེས་ཁྱེད་ལ་གསལ་པོ་ཆགས་ཡོད་པའི་རེ་བ་ཡོད། གལ་ཏེ་དོགས་གཞི་དང་དྲི་བ་འདྲ་ཡོད་ན། གཤམ་གྱི་མཆན་བཀོད་སའི་ཐོག་ངོ་དེབ་ཁ་བྱང་དང་གུ་གུལ་ཁ་བྱང་གང་རུང་སྤྱད་དེ་མཆན་བཀོད་རྒྱུ་མ་བརྗེད་པ་གནང་རོགས།

སྨོན་ལམ་ཟབ་སྦྱོང་། A06

 

སློབ་ཁྲིད་ཀྱི་ནང་དོན།

  • བོད་ཡིག་ནང་མཚོན་རྟགས་དང་རི་མོ་སྔགས་ཡིག་སོགས་བེད་སྤྱོད་གཏོང་སྟངས།
  • Monlam Art Font
  • GREP Manual for advance
  • Meta Character [དཔེར་ན། ^t, ^p, ^n, ^#, ^N, ^X, ^V, ^v,] དང་ GREP [དཔེར་ན། \t, \r, \n, ~#, ~N, ~X, ~V, ~v]བེད་སྤྱོད་སྐོར།
  • More on Find/Change Dialogue Box
    • Edit>Find/Change...[Text/GREP/Glyph/Object]
  • Adobe Indesign Find/Change Link1, Link2
  • gjType>Text Variable...>Define...>

བརྙན་ཟློས་འདི་ནི། ཕྱི་ལོ་ ༢༠༡༣ ལོའི་ཟླ་ ༢ ཚེས་ ༢༦ ནས་ ཟླ་ ༣ ཚེས་ ༤ བར། སྐུ་ཞབས་སྨོན་ལམ་གྱིས་བོད་ཡིག་དང་འབྲེལ་བའི་དཔེ་དེབ་ཇུས་འགོད་ཟབ་སྦྱོང་ཞིག་སྐོར་རེད་འདུག །བརྙན་ཟློས་དེ་བོད་ཡིག་དཔེ་དེབ་དང་ indesign ནང་ལས་ཀ་བྱེད་མཁན་ཡོངས་ལ་ཕན་ཐོག་ཆེན་པོ་མཐོང་བས། དེ་དག་དྲ་སྟེང་དུ་སྤེལ་ཏེ་ཀུན་ལ་ཕན་པའི་རེ་བ་ཡོད། གློག་གླད་ཀྱི་བརྙན་ཟློས་ཆ་ཚང་ཡུ་ཊུབ་དྲ་གནས་ཐོག་ཡོད། འདིར་གནོན།

སྨོན་ལམ་ཟབ་སྦྱོང་། A05

 

སློབ་ཁྲིད་ཀྱི་ནང་དོན།

  • རྩོམ་ཡིག་གི་ནང་དོན་ནང་བར་སྟོང་ (space) གཉིས་གསུམ་མང་བ་ཤོར་བ་རྣམས་བར་སྟོང་གཅིག་བཟོ་ཆེད། Indesign གྱི་ Find and Change ཟེར་བ་དེ་བེད་སྤྱོད་གཏོང་སྟངས།
  • ཡི་གེ་རྣམས་ཆ་སྙོམ་པ་བཟོ་ཆེད་ Justification དང་དེའི་སྒྲོམ་གྱི་ཚད་གཞི་སྒྲིག་སྟངས། གཤམ་གྱི་རི་མོའི་ནང་གསལ་ཡོད་པ་ལྟར་།
  • བོད་ཡིག་ཚིགས་བཅད་དེ་དག་སྒྲིག་སྟངས།
  • Superscript དང་ Subscript དེ་དག་བོད་ཡིག་ཆེད་སྙོམ་པོ་བཀོད་སྟངས།
    • རྒྱས་པ་ Edit>Preferences>Advance Type..>Character Setting
  • བརྗོད་བྱའི་མཐའ་ལ་ཡོད་པའི་ཤད་ "།" དེ་དག་ཡིག་ཕྲེང་འོག་ཏུ་མི་འཛག་པའམ་མི་ཤོར་བའི་ཆེད་ No Break བཟོ་སྟངས།
  • ཡིག་གཟུགས་མཐུག་པོ་ (Bold) བཟོ་སྟངས།
    • character style > character color> Text Border
  • ཡིག་གཟུགས་ཀྱོག་ཀྱོག་ (Italic) བཟོ་སྟངས།
    • character style > advance character format>Skew
  • Applying character style on a Paragraph Style
    • [from Paragraph Style>Drop Caps and Nested Styles> Nested Style ]
  • Applying character style onto a letter

བརྙན་ཟློས་འདི་ནི། ཕྱི་ལོ་ ༢༠༡༣ ལོའི་ཟླ་ ༢ ཚེས་ ༢༦ ནས་ ཟླ་ ༣ ཚེས་ ༤ བར། སྐུ་ཞབས་སྨོན་ལམ་གྱིས་བོད་ཡིག་དང་འབྲེལ་བའི་དཔེ་དེབ་ཇུས་འགོད་ཟབ་སྦྱོང་ཞིག་སྐོར་རེད་འདུག །བརྙན་ཟློས་དེ་བོད་ཡིག་དཔེ་དེབ་དང་ indesign ནང་ལས་ཀ་བྱེད་མཁན་ཡོངས་ལ་ཕན་ཐོག་ཆེན་པོ་མཐོང་བས། དེ་དག་དྲ་སྟེང་དུ་སྤེལ་ཏེ་ཀུན་ལ་ཕན་པའི་རེ་བ་ཡོད། གློག་གླད་ཀྱི་བརྙན་ཟློས་ཆ་ཚང་ཡུ་ཊུབ་དྲ་གནས་ཐོག་ཡོད། འདིར་གནོན།