ཀུ་ཤུའི་ཁ་པར་ནང་གི་བོད་ཡིག་ཚིག་མཛོད།

 

འདི་ནི་ཨ་མྱེའི་སྤྲུལ་ཆུང་རིན་པོ་ཆེ་མཆོག་གི་རང་རིགས་ལ་བཅང་བའི་ལྷག་བསམ་དང་སྐད་ཡིག་ལ་དུང་བའི་འདུན་པ་དེས་སྦྱིན་པའི་དུས་རབས་ཉེར་གཅིག་སྟེ་བརྡ་འཕྲིན་ཡར་རྒྱས་ཀྱི་སྐབས་འདིར་ཀུ་ཤུ་ཁ་པར་འཛིན་མཁན་གྱི་འུ་ཅག་ལ་སྦྱིན་པའི་རིན་བྲལ་གྱི་ལེགས་སྐྱེས་དེ་རེད། འདི་ནི་ཀུ་ཤུ་ཁ་པར་གྱི་མཉེན་ཆས་ཕབ་ལེན་བྱེད་ཡུལ་ནས་བཙལ་སྟེ་ཐད་ཀར་ཕབ་ལེན་བྱེད་ཐུབ་ཅིང་བཀོལ་སྤྱོད་ཧ་ཅང་སྟབས་བདེ་ཞིང་ཡར་ཐོན་གྱི་རང་བཞིན་ལྡན་པའི་བོད་ཡིག་ཚིག་མཛོད་ཀྱི་མཉེན་ཆས་རྐང་གཅིག་པུ་དེ་ཡང་རེད།  མཉེན་ཆས་ཚིག་མཛོད་འདིའི་ནང་དུ་ཚིག་མཛོད་ཆེན་མོ་དང་དག་གསར། དེ་བཞིན་བོད་དབྱིན་ཤན་སྦྱར་གྱི་ཚིག་མཛོད་རང་འབྱུང་ཡེ་ཤེས་སོགས་འགའ་ཞིག་ཀྱང་མཆིས། འདི་ལས་བོད་ཡིག་ཙམ་མིན་པར་དབྱིན་ཡིག་གི་དོན་འགྲེལ་བོད་ཡིག་ལས་གཟིགས་ཐུབ་ཅིང་བོད་ཡིག་གི་ཚིག་དོན་ཡང་དབྱིན་ཡིག་ལས་འཚོལ་ནུས་པའི་ཆེས་ནུས་ཅན་གྱི་མཉེན་ཆས་ཤིག་རེད། རིན་པོ་ཆེ་མཆོག་གིས་ཚིག་མཛོད་འདི་ཉིད་བཟོ་སྐབས་ཉིད་ཀྱི་བཀའ་མངགས་ལྟར་གུས་པས་དག་གསར་ཆ་ཚང་ཞིག་གློག་ཀླད་དུ་བཏགས་ཏེ་ཞབས་འདེགས་ཏོག་ཙམ་ཞུ་ཐུབ་པ་བྱུང་། སྐབས་དེའི་དུས་གུས་པའི་སེམས་སུ་འདི་ལྟ་བུའི་ཕན་ནུས་ཅན་གྱི་ཚིག་མཛོད་ཅིག་ཐོན་ཐུབ་རྒྱུ་ནི་རྨི་ལམ་དུ་ཡང་ག་ལ་ཡོད། འོན་ཀྱང་རྗེས་སོར་ཚིག་མཛོད་འདི་འདྲ་ཞིག་ཏུ་ཐོན་འདུག་པར་མ་ཟད་གུས་པས་ད་སྡེའི་ནང་དུ་ཚིག་དུམ་ཞིག་ཁ་བསབ་བྱས་པ་དེ་ཡང་རང་སོར་བཞག་འདུག ༼དོལ་རྒྱལ། སྨོན་ལམ་ལོག་པའི་དམ་སྲི་ཞིག ཤུགས་ལྡན་ཀྱང་ཟེར།༽ རིན་པོ་ཆེ་མཆོག་གིས་ད་དུང་དུང་དཀར་ཚིག་མཛོད་ཅིག་ཀྱང་དགོས་གལ་ཆེ་ལུགས་གསུངས་བྱུང་ཡང་གུས་པ་སློབ་སྦྱོང་གི་དུས་ཚོད་བཅས་ཀྱི་རྐྱེན་པས་བཏགས་ཐུབ་མ་བྱུང་།

སྐབས་དོན་དྲ་གྲོགས་དག་ལ་རེ་བསྐུལ་ཞིག་ཞུ་འདོད་བྱུང་། འདི་ནས་ཨ་མྱེའི་སྤྲུལ་ཆུང་རིན་པོ་ཆེ་ནས་དུང་དཀར་ཚིག་མཛོད་ཆེན་མོ་མཉེན་ཆས་དེར་འཇུག་འདོད་ཆེ་བས་དུང་དཀར་ཚིག་མཛོད་ཆེན་མོ་གློག་ཀླད་དུ་བྲིས་མ་ཡོད་ཚེ་གཤམ་གསལ་གྱི་བརྒྱུད་ལམ་གང་རུང་དུ་གནང་རོགས་ཅེས་ཞུ་བཞིན་ཡོད། དུང་དཀར་ཚིག་མཛོད་མཉེན་ཆས་འདིར་བཞག་ཐུབ་ན་ངོ་མ་ཕུན་སུམ་ཚོགས་པའི་ཡན་ལག་ཅིག་ཀྱང་ཡིན་འདུག་ན་རང་མི་རིགས་ཀྱི་སྐད་ཡིག་ལ་དུང་བའི་ལྷག་བསམ་ཅན་དག་གིས་མཐུན་འགྱུར་ཞིག་གནང་རོགས་ཞེས་ཞུ་བཞིན་ཡོད།བཀའ་དྲིན་ཆེ།

སྐད་འཕྲིན་ཁ་བྱང་  i_love_tibet
གློག་འཕྲིན་ཁ་བྱང་   riksang777@gmail.com


མཉེན་ཆས་འདི་བཟོ་བསྐྲུན་གནང་མཁན་ཨ་མྱེའི་སྤྲུལ་ཆུང་རིན་པོ་ཆེ་འམ་མཚན་གཞན་མཆོག་སྤྲུལ་ཕྱོགས་ལས་རྣམ་རྒྱལ་ནི་ནམ་རྒྱུན་ནེ་རྫུ་ལེ་ཌུར་དད་ལྡན་ཆོས་ཚོགས་ལ་གསུང་ཆོས་གནང་བཞིན་བཞུགས་ཀྱི་ཡོད་ལ། ལོ་སྔོན་མ་ནས་བཟུང་ཁོང་གི་ཕ་ཡུལ་འཇུ་ཉུང་དགོན་གྱིས་མཁན་ཁྲིར་མངའ་གསོལ་མཛད་པ་ལྟར་ད་ལམ་རང་དགོན་དུ་མཁན་པོའི་ཕྱག་ལས་གནང་བཞིན་ཡོད།

བརྡ་འཕྲིན་བང་ཁ་འོད་ཀྱི་རླབས་སུ་རྩེན། །
འཛམ་གླིང་ཤར་ནུབ་འཕྲུལ་ཆའི་སྣེ་མོར་འདུ། །
གློག་ཆས་བཀོལ་སྤྱོད་ཆེ་བའི་དུས་རབས་འདིར། །
རང་ཅག་རང་སོར་འདུག་པའི་གནས་མིན་པས། །
རིན་ཐང་ཆེ་བའི་རང་གི་སྐད་ཡིག་ལ། །
རང་གཞན་ཚང་མས་སྲི་ཞུ་ཏོག་ཙམ་བསྒྲུབ། །

༢༠༡༥/༧/༡༦ ཉིན་གུས་འཇའ་ཐང་འབྲོག་བུས་འཕྲལ་མར་བྲིས།

དྲ་ཚིགས་བཟོ་བར་ཐོག་མར་ཤེས་དགོས་པའི་གནད་དོན་བཞི།

 

རཱོ་མན་ཇེ་ལིན་ཀི།
རིགས་སློབ། རིན་ཆེན་དབང་རྒྱལ་གྱིས་བསྒྱུར།

གཅིག སྦྱང་བྱ་མང་དུ་ཡོད་པ།

གལ་ཏེ་ཁྱོད་ཀྱིས་རྩོམ་ཡིག་འདི་ཀློག་གིན་ཡོད་ཚེ་ཕལ་ཆེར་རང་ཉིད་ལ་དྲ་ཚིགས་ཤིག་མེད་པའམ་ཡང་ན་དྲ་ཚིགས་བཟོ་སྐྲུན་བྱེད་སྟངས་ཕྱོགས་ཙམ་ལས་ཤེས་ཀྱི་མེད་མཁན་ཞིག་ཡིན་སྲིད། དྲ་ཚིགས་མང་པོ་ཞིག་ལ་བལྟ་ཀློག་བྱས་མྱོང་ནའང་རང་ཉིད་ལ་དབང་བའི་དྲ་ཚིགས་ཤིག་ད་དུང་བཟོས་མྱོང་མེད་པས་བཟོ་ཨེ་ཤེས་ན་བསམ་པའི་དངངས་སྐྲག་ཅུང་ཟད་ཡོད། ཁྱོད་ཀྱིས་དྲ་ཚིགས་བཟོ་བར་ཚོད་བལྟ་བྱས་ཡོད་ལ་དེས་སེམས་ལ་དངངས་སྐྲག་ཅུང་ཟད་བསླངས་ཡོད། ཡང་ན། ཁྱོད་གློག་ཀླད་རིག་པའི་སྤྱིའི་ཤེས་བྱ་ཤེས་མཁན་ཞིག་ཡིན། ཚིག་གི་ལས་སྣོན་བྱེད་སྟངས་དང་། དྲ་རྒྱའི་ནང་དུ་གནས་ཚུལ་སྣ་ཚོགས་འཚོལ་ཞིབ་བྱེད་ཐུབ་མཁན་ཞིག་ཡིན། ལྷག་པར་དུ་ཁྱོད་ཀྱིས་ཨེ་མཱ་ཛོན་དྲ་ཐོག་ཚོང་ཁང་ནས་དེབ་མངགས་ཉོ་བྱས་མྱོང་ཡོད། འོན་ཀྱང་། རང་ཉིད་ལ་དྲ་ཚིགས་བཟོ་བ་ནི་ད་དུང་ཐག་རིང་ཞིག་ཡིན། དྲ་ཚིགས་བཟོ་བ་ནི་སྙིང་རུས་ཆེར་བསྐྱེད་ཀྱིས་སྦྱོང་དགོས་པའི་ཤེས་བྱ་ཞིག་ཡིན་ཞིང་དེ་ལ་སྦྱང་བྱའི་རིགས་ཤིན་ཏུ་མང་། ཁྱོད་ཀྱིས་གློག་ཀླད་རིག་པའི་བརྡ་ཆད་བསྡུས་ཚིག HTML, CSS, HTTP, RSS, SEO འདི་དག་ཐོག་མར་མཐོང་སྐབས་དེ་རྣམས་ཁྱོད་ལ་གསར་རྐྱང་གི་སྐད་བརྡ་ཤ་སྟག་ཡིན་པས་མིག་ལ་ངལ་བ་སྟེར་སྲིད། བྱ་བ་གང་ལའང་ཐོག་མར་འཇུག་སྐབས་དངངས་སྐྲག་ཅུང་ཟད་རེ་ཡོད་པས་ཁྱོད་ཀྱིས་བརྡ་ཆད་འདི་དག་ཐོག་མར་སྦྱོང་སྐབས་ཀྱང་སློབ་ཆུང་སློབ་མ་ཞིག་དང་འདྲ་བའམ་ཡང་ན་ལས་ཀ་ལ་ཐོག་མར་འགྲོ་མཁན་གྱི་སློབ་ཐོན་པ་ཞིག་དང་འདྲ་བར་སེམས་ལ་དངངས་སྐྲག་ཅུང་ཟད་ཡོད། ད་དུང་དེ་དང་དེའི་རྗེས་སུ་གང་བྱེད་དགོས་མིན་མ་ཤེས་པར་སྦྱོང་འདོད་ཀྱི་ཚོར་བ་ཡོངས་སུ་བརླག་སྲིད། འོན་ཀྱང་ཐུགས་ཁྲལ་མ་བྱེད། དེ་ནི་སྐད་བརྡ་འདི་དག་སྦྱོང་མཁན་ཀུན་ལ་འཕྲད་སྲིད་པའི་སྤྱི་ཡོངས་ཀྱི་གནད་དོན་ཞིག་རེད། ཉིས་སྟོང་དགུའི་ཟླ་བ་བཅུ་པར་ང་ཡང་ཁྱོད་དང་འདྲ། སྐབས་དེར་ངས་གློག་ཀླད་ནང་དུ་འཕྲིན་ཡིག་འབྲི་བ་དང་གསར་འགྱུར་ལ་བལྟ་ཀློག་བྱེད་ཤེས་པ་ཙམ་ལས་དྲ་ཚིགས་བཟོ་སྟངས་སྐོར་གང་ཡང་ཤེས་ཀྱི་མེད་ལ། ལྷག་པར་དུ་སྦྱོང་གཞིའི་ཤེས་བྱར་གསར་རྐྱང་གི་ཐ་སྙད་དང། ལམ་སྟོན། སྦྱོང་ཚུལ། མཉེན་ཆས། བགྲོ་གླེང་། ཟིན་བྲིས། དྲ་ཚིགས། དེབ་སོགས་ཧ་ཅང་མང་དྲག་པའི་ཚོར་སྣང་སྐྱེས་པ་ད་ལྟའང་དྲན་གྱི་འདུག དེ་ནི་ང་ཤིན་ཏུ་ཆེ་བའི 747 རྟགས་ཅན་གྱི་རླངས་འཕྲུལ་གནམ་གྲུའི་ཁ་ལོ་བའི་ཁང་མིག་ཏུ་བསྡད་དེ་ད་གནམ་གྲུ་འཕུར་ཅིག་ཟེར་བ་དང་འདྲ།

ཐོག་མར་དྲ་ཚིགས་བཟོ་སྐབས་མཚམས་རེར་མགོ་འཐོམ་པ་དང་ལན་རེར་ནོར་ཏེ་རང་ཉིད་ལ་གླེན་རྟགས་ཀྱི་དྲི་བ་དེ་འདྲ་ཡང་འདྲི་མི་སྲིད་པ་མིན། འོན་ཀྱང། དེ་ནི་དྲ་ཚིགས་ལག་རྩལ་པ་ཀུན་ལ་བྱུང་མྱོང་ཞིང་ང་ལའང་དེ་ལྟར་བྱུང་། གལ་ཆེ་བ་ནི་གསང་བའི་སྐད་བརྡ་འདི་དག་སྦྱོང་སྐབས་གནས་ཚུལ་མང་པོར་རྒྱུས་ལོན་བྱེད་དགོས་པ་དག་གིས་དངངས་སྐྲག་ནམ་ཡང་སྐྱེ་རུ་འཇུག་རྒྱུ་མེད། ཆུང་ས་ནས་འགོ་བཙུགས་ཏེ་ལུས་པོ་འཁྱར་འཁྱོར་གྱིས་གོམ་པ་སྤོ་དགོས། གལ་ཏེ་གློག་ཀླད་སྐད་བརྡ་རིག་པ་ཆ་ཚང་བ་ཞིག་མ་ཤེས་ཀྱང་སྐྱོན་མེད། ཐོག་མར་དེའི་སྐོར་གྱི་རྩོམ་ཡིག་དང་ཟུར་བལྟས་སློབ་ཚན་སོགས་བལྟ་ཀློག་གིས་གློག་ཀླད་རིག་པའི་ཤེས་བྱའི་ལྡུམ་རའི་ནང་དུ་འགྲུལ་བཞུད་བྱེད་དགོས། ག་ལེར་ཉུང་ངུ་རེ་ཤེས་པར་བྱེད་དགོས་པ་ལས་ཚོུད་གཅིག་གི་ནང་དུ་ཅི་ཡང་ཤེས་མི་སྲིད། དུས་ཚོད་ཕུད་དེ་སྦྱོང་བརྡར་བྱོས། སྦྱོང་འདོད་ཀྱི་ཚོར་བ་ཆེར་བསྐྱེད་ཀྱིས་དུས་ཐུང་ངུའི་ནང་ཅུང་ཟད་རེ་ཤེས་པར་གྱིས། ཐོག་མར་དྲ་ཤོག་གཅིག་རྐྱང་ཅན་ཞིག་ཁ་ཕྱེ་སྟེ་ཡིག་རིས་སྦྲེལ་མཐུད་དང་། པར་རིས་ཁ་སྣོན། ཡིག་གཟུགས་ཕྲ་སྦོམ་ཅན་དུ་གཏོང་བ་སོགས་ནས་འགོ་འཛུགས་དགོས། ངས་གློག་ཀླད་ཤེས་བྱའི་སྐོར་གྱི་སློབ་ཚན་སྦྱོང་བར་འཛིན་གྲྭ་གཅིག་ཀྱང་འགྲོ་མྱོང་མེད། དྲ་ཚིགས་འདི་མ་བཟོས་པའི་སྔོན་དུ་ང་དྲ་ཚིགས་བེད་སྤྱོད་གཏོང་མཁན་ཞིག་ཡིན་པ་ལས་དྲ་ཚིགས་ལག་རྩལ་པ་ཞིག་མིན། སྐབས་དེར་ངས་གློག་ཀླད་ཤེས་བྱའི་སྐོར་གྱི་སྐད་བརྡ་འདི་དག SEO, RSS, HTML གཅིག་ཀྱང་ཤེས་ཀྱི་མེད། ཡིན་ན་ཡང་། ག་ལེར་བློ་རྩ་བརྟན་པོས་རྒྱུན་ཆད་མེད་པར་སློབ་སྦྱོང་བྱས་ཏེ་ད་ལྟ་ང་དྲ་ཚིགས་ལག་རྩལ་པ་ཞིག་ཏུ་གྱུར་ཟིན། དེ་ནི་ཉིན་གཅིག་གི་དུས་ཡུན་ཙམ་མིན་པར་བརྒྱུད་རིམ་ཞིག་རེད། ཁྱོད་ད་ལྟའི་དྲ་ཚིགས་འདིར་ཡོང་སྟེ “དྲ་ཚིགས་བཟོ་བར་ཐོག་མར་ཤེས་དགོས་པའི་གནད་དོན་བཞི།” ཟེར་བའི་དྲ་ངོས་འདི་ཀློག་གིན་ཡོད་པས། ཁྱོད་ནི་དྲ་ཚིགས་ལག་རྩལ་པ་ཞིག་ཆགས་པའི་ལམ་དུ་ཞུགས་ཚར་ཞིང་། རང་ཉིད་ལ་དྲ་ཚིགས་བཟོ་བའི་བརྒྱུད་རིམ་དེ་འགོ་བཙུགས་ཟིན་པ་གསལ་པོ་ཡིན། དྲ་ཚིགས་བཟོ་བའི་གོམ་པ་དང་པོ་ནི་སྦྱོང་འདོད་ཀྱི་བསམ་བློ་དེ་ཡིན། ཁྱོད་ད་ལྟ་གོམ་པ་གཉིས་པ་དྲ་ཚིགས་གང་འདྲ་བཟོ་དགོས་མིན་གྱི་མཚམས་སུ་སླེབས་ཡོད། ངས་ཁྱོད་ལ་ཡིད་སྨོན་སྐྱེ་ཡི་འདུག ཁྱོད་མདུན་གྱི་འཇིག་རྟེན་ནི་འཇིག་རྟེན་ཁམས་གསར་པ་ཞིག་དང་། གང་དུའང་མདུན་སྐྱོད་བྱེད་ཆོག་པའི་ལས་དོན་གསར་པ་ཞིག་གི་འགོ་རྩོམ་བཞིན་ཡོད། དྲ་ཚིགས་བཟོ་སྐྲུན་གྱི་མཐུན་རྐྱེན་ལེགས་ཤོས་འཇིག་རྟེན་ཁམས་གསར་པ་ཞིག་ཏུ་འགྲུལ་བཞུད་ཀྱིས་སྐད་བརྡ་གསར་པ་ཞིག་སྦྱོང་ཞིང་། མི་སྣ་གསར་པ་མང་པོ་ཞིག་ལ་ཐུག་རྒྱུའི་གྲ་སྒྲིག་བྱེད་བཞིན་ཡོད། འོན་ཀྱང་། དྲ་ཚིགས་བཟོ་བ་ནི་སཱི་ཊན་རྒྱལ་ཁབ་ཀྱི (IKEA) བཟོ་ཆས་ཚོང་ཁང་ནས་ཐོན་པའི་ཞིབ་ཚགས་པོས་འབིགས་ཀྱིས་ཟུར་བཞིར་བུ་ག་ཕུག་སྟེ་གཅུས་གཟེར་རྒྱབ་པའི་རྐུབ་སྟེགས་བཟོ་བ་དང་མི་འདྲ་ཞིང་། ཟུར་གཅིག་ནས་གཅིག་བརྒྱུད་དེ་གོམ་པ་ལྔ་པ་ཞིག་སྤོ་དགོས་དོན་མེད་མོད། དྲ་ཚིགས་ཀུན་ལ་ལག་རྩལ་རང་བཞིན་ལྡན་པའི་ཐུན་མོང་གི་ཁྱད་ཆོས་རེ་ཡོད་པས། ཁྱོད་ཀྱིས་ལྕགས་རྡོག་ཁབ་ཏུ་བསྒྱུར་བ་ལྟ་བུའི་སྙིང་རུས་བསྐྱེད་དགོས། རང་ཉིད་ཀྱི་དྲ་ཚིགས་ནི་རང་ཉིད་ཀྱི་ཌི་ཨེ་ཨེན (DNA) རིགས་རྒྱུན་ལྡན་པའི་གཅེས་པའི་ཕྲུ་གུ་དང་འདྲ་ཞིང་། རང་ཉིད་ཀྱི་ལག་རྩལ་རང་བཞིན་གྱི་ཁྱད་ཆོས་ཀྱང་ལྡན་ཡོད་པས། ཁྱོད་ཀྱིས་རྒྱུན་ལྡན་དུ་དེ་ལ་བསམ་བློ་བཏང་སྟེ་སྔར་བས་ལེགས་པའི་ཇུས་འགོད་ཅིག་བྱེད་དགོས་སྙམ་པ་དང་། ག་ལེར་འཚར་ལོངས་བྱེད་དུ་བཅུག་སྟེ་ཀུན་ལས་མཛེས་ཤིང་བལྟ་ན་སྡུག་པ་ཞིག་ཏུ་བཟོ་སྐྲུན་བྱེད་དགོས་སྙམ་གྱི་རེད། མི་ནི་དུད་འགྲོ་དང་མི་འདྲ་བར་དངོས་པོ་གསར་སྐྲུན་བྱེད་འདོད་ཀྱི་འདུན་པ་ཡོད་པར་མ་ཟད་ད་དུང་དེའི་ནུས་པ་ཡང་ཡོད། མིའི་རིགས་ཀྱིས་ཕྱོགས་ཡོངས་ནས་ཤེས་བྱ་ཉུང་ངུ་དང་ཆ་ཤས་རེ་རེ་བཞིན་འཚོལ་སྡུད་ཀྱིས་བཟོ་དབྱིབས་དང་རྣམ་པ་གསར་པ་ལྡན་པའི་དངོས་པོ་སྣ་མང་གསར་སྐྲུན་བྱེད་ཐུབ། ང་ཚོ་ཡང་འཛམ་གླིང་གི་གསར་གཏོད་མཁས་པ་ཤེ་ཁི་སེ་ཧྥིར་དང་། མའ་ཁལ་གྷེ་ལོ། མཱོ་ཛར་ཊ་སོགས་དང་འདྲ་བར་གདོད་མའི་རྡུལ་འདུས་ཀྱི་རིགས་རྒྱུན་ལས་དངོས་པོ་གསར་སྐྲུན་གྱི་ནུས་པ་ཡོད་པ་གཅིག་མཚུངས་སུ་སྐྱེས་པས། ཡང་དག་པའི་ཐབས་ལམ་ཞིག་ལ་བརྟེན་ནས་ཤེས་བྱ་ཉུང་ངུ་འཚོལ་སྡུད་ཀྱིས་ཡང་ཡང་བཟོ་བཅོས་བྱེད་ཚེ་ད་གཟོད་སྔར་མེད་པའི་དངོས་པོ་གསར་སྐྲུན་བྱེད་ཐུབ་པ་གོར་མ་ཆག ། ཐོག་མར HTMLདང་ CSS སྐད་བརྡའི་སྐོར་ཤེས་བྱ་འཚོལ་སྡུད་བྱོས། དེ་ནས་ཁྲུས་ཁང་དུ་སོང་སྟེ་གཟུགས་པོ་བཀྲུས། སྦག་སྦག་ཞོན་ནས་གཅེས་ཁྱི་ཁྲིད་དེ་དགོང་ཟས་ཟ་རུ་སོང། དེ་ནས་སླར་ཡང་སྦྱོང་འགོ་བཙུགས་ན་སྔར་བས་མང་དུ་ཤེས། ད་ནས་བཟུང་ཉིན་རེའི་ཐབས་ལམ་འདི་འདྲ་སྤྱད་དེ་བྱས་ན་ད་གཟོད་དྲ་ཚིགས་བཟོ་འདོད་ཀྱི་འདུན་པ་ཤུགས་ཆེར་འཕེལ་ཞིང་། དེ་ལ་བརྟེན་ནས་གདོད་མའི་རྡུལ་འདུས་རིགས་རྫས་ལས་མིར་ཆགས་པའི་གོ་རིམ་ལྟར་ཉུང་ངུ་ཆེན་པོར་སྒྱུར་བའི་འབད་བརྩོན་གྱིས་ད་གཟོད་བཟོ་དབྱིབས་དང་རྣམ་པ་མི་འདྲ་བ་ལྡན་པའི་དྲ་ཚིགས་གསར་སྐྲུན་བྱེད་ཐུབ། གལ་ཏེ་ཁྱོད་ཀྱིས་དྲ་ཚིགས་བཟོ་བའི་ལག་རྩལ་ཡོངས་སུ་ཤེས་ཚེ་ད་གཟོད་དྲ་ཚིགས་སྟེང་ནས་སྒོར་མོ་ཅི་ཙམ་བསགས་ཐུབ་པ་དང། ཟིན་བྲིས་གྲོགས་པོ་དང་། དྲ་ཐོག་སྐུ་མགྲོན་ཅི་ཙམ་ཡོད་ཀྱང་དེ་དག་གིས་གཞན་ལ་མེད་པའི་ཁྱོད་ཀྱི་ལག་རྩལ་དེ་ནམ་ཡང་འཕྲོག་བཅོམ་བྱེད་མི་ཐུབ། དེས་ན་དྲ་ཚིགས་བཟོ་སྐྲུན་ལ་འབད་ཅིག 

གཉིས། HTML སྐད་བརྡ།

HTML ནི་ཡིག་རིས་སྦྲེལ་མཐུད་ཀྱི་སྐད་བརྡ་ཡིན་ཞིང་། འཚོལ་ཆས་ལ་ཡིག་རིས་རྣམས་འཆར་བྱེད་ཀྱི་བརྡ་སྐྱེལ་མ་ལག་གཙོ་བོ་ཡིན། སྐད་བརྡ་དེ་ཡིག་འབྲུ་རེའི་གཡས་གཡོན་དུ་གསང་བརྡ་རེ་ཁ་སྣོན་གྱིས་གྲུབ་པ་ཞིག་ཡིན། དཔེར་ན། དྲ་ཤོག་ངོས་སུ་ཡིག་འབྲུ་དང་གསང་བརྡ་མཉམ་སྡེབ་བྱས་པ འདི་བྲིས་ཚེ་དྲ་ངོས་ཡིག་གཟུགས་ཕྲ་བ་ནས་སྦོམ་པོར་འགྱུར་བ་ཡིན། འོན་ཀྱང། འདས་པའི་ལོ་རབས་ནང HTML སྐད་བརྡ་འདི་ཡིག་འབྲུ་ལས་གཙོ་བོར་གསང་བརྡས་གྲུབ་པ་ཡིན། HTML སྐད་བརྡས་རེའུ་མིག་དང་། འགེངས་ཤོག པར་རིས་སོགས་བཟོ་ཐུབ་ཅིང། མདོར་ན། དྲ་ངོས་ཀྱི་བཟོ་དབྱིབས་དང་སྣང་བརྙན་ཀུན HTML སྡེབ་འབྲི་བྱས་པ་ལས་གྲུབ་པ་ཤ་སྟག་ཡིན། HTML སྐད་བརྡ་གཏིང་ཟབ་པར་ཤེས་པ་ནི་དྲ་ཚིགས་བཟོ་སྐྲུན་བྱེད་པ་ལས་དཀའ་མོད། སྟབས་ལེགས་པ་ཞིག་ལ་དྲ་རྒྱའི་ནང་དུ་ཁྱོད་ལ་ལམ་སྟོན་བྱེད་པའི་ཉེར་མཁོའི་ཟུར་བལྟས་སློབ་ཚན་དང་རྩོམ་ཡིག་སོགས་མང་དུ་ཡོད། ངས་གཙོ་བོར W3 Schools ཟེར་བའི་དྲ་ཚིགས་ནང་དུ་ལས་དང་པོ་ནས་མཐོ་རིམ་གནས་ཚད་བར་གྱི་ཟུར་བལྟས་སློབ་ཚན་བལྟ་ཀློག་བྱས་པ་ལས HTML བརྡ་ཆད་འདི་ཤེས་ཤིང་། དེ་ནི་ཧ་ཅང་ཕན་ཐོགས་ཆེན་པོ་ཞིག་རེད། ཁྱོད་ཀྱིས་ཀྱང་དུས་ཁོམ་བྱུང་དུས་ཟུར་བལྟས་སློབ་ཚན་བལྟ་ཀློག་དང་། བར་སེང་གི་སྐབས་སུ HTML སྐད་བརྡ་སྡེབ་འབྲི་བྱས་ཏེ་པར་རིས་དང་། རེའུ་མིག ཡིག་གཟུགས་ཟུར་ཉལ་ཅན་བཟོས་པ་ནས་འགོ་ཚུགས་ཤིག ཞོར་དུ HTML སྐད་བརྡའི་ནང་དོན་འགྲེལ་བཤད་མདོར་བསྡུས་བྱས་པའི་དཔེ་དེབ་ཅིག་ལ་བལྟ་ཀློག་བྱེད་དགོས། དཔེར་ན། ཅིའི་ཕྱིར HTML སྐད་བརྡ་འདི་བཟོས་པ་དང། དེ་གལ་ཆེན་དོན་ཅི་ཡིན། དུས་ནམ་ཞིག་ལ་བེད་སྤྱོད་བྱས་པ་ཡིན་མིན་སྐོར་ལ་བལྟ་ཀློག་བྱེད་དགོས། HTML སྐད་བརྡའི་དཔེ་དེབ་ཅིག་གིས་བརྡ་ཆད་འདིའི་སྤྱིར་བཏང་གི་དྲི་བ་འདི་དག་ལ་ལན་འདེབས་བྱེད་པར་མ་ཟད་ད་དུང་དེའི་ནང་དོན་ངོ་མ་ཅི་ཡིན་འགྲེལ་བཤད་རྒྱག་ངེས་ཡིན། ཁྱོད་ཀྱིས་རང་ཉིད་ལ HTML སྐད་བརྡ་སྐོར་གྱི་ཤེས་བྱ་གང་དགོས་པ་དེ་ཤེས་ན་འགྲིགས་པ་ལས་དེའི་ནང་དོན་ཡོངས་རྫོགས་ཤེས་དགོས་དོན་མེད་ལ། རྗེས་སུ་དྲ་ཚིགས་བཟོ་སྐབས་སྔར་དཔེ་ཀློག་སྐབས་ཟིན་ཐོ་གང་བཀོད་པ་དེ་མ་བརྗེད་ན་འགྲིག་པས་ནང་དོན་ཡོད་ཚད་ཁྱོད་ལ་དགོས་མཁོ་མེད། དེས་ན། HTML སྐད་བརྡ་སྤྱིར་བཏང་གི་ཤེས་བྱ་སྟོན་པའི་དཔེ་དེབ་ཅིག་ཉོ་དགོས། དཔེ་དེབ་དེ་གང་མགྱོགས་བལྟ་ཀློག་བྱས་ཏེ HTML སྐད་བརྡ་རང་ཉིད་ཀྱི་ཀླད་པའི་ནང་དུ་སིམ་དུ་འཇུག་དགོས། སྤྱིར་སྐད་བརྡ་འདིའི་སྐོར་དཔེ་དེབ་བགྲང་གིས་མི་ལངས་པས་རང་ཉིད་ལ་གང་འཚམས་པ་དེ་བདམས་ཉོ་བྱོས། ངས Dummies series of books ཟེར་བའི་དེབ་དེ་ཉོས་པ་ཡིན། གང་ཡིན་ཟེར་ན་དེབ་དེའི་ནང་དུ HTML སྐད་བརྡ་སྐོར་གྱི་སྤྱིར་བཏང་གི་ཤེས་བྱ་ཡོངས་རྫོགས་འདུས་ཡོད། ང་འཛིན་གྲྭ་གཅིག་ཀྱང་མ་སོང་བར HTML for Dummies ཟེར་བའི་དཔེ་དེབ་བཀླགས་ཏེ་སྐད་བརྡ་འདི་ཤེས་བྱུང་། རྨང་གཞི་ཤེས་ན་ད་གཟོད་གཏིང་ཇེ་ཟབ་ཏུ་གཏང་རྒྱུ་ནི་ཧ་ཅང་སླ། དེ་ཡང་། གྷུ་གྷལ་འཚོལ་ཆས་ནང་དུ་སོང་སྟེ HTML སྐད་བརྡ་སྐོར་གྱི་དྲི་བ་མང་པོ་འཚོལ་ཞིབ་བྱེད་དགོས། HTML སྐད་བརྡ་སྐོར་གྱི་སྤྱིར་བཏང་གི་དྲི་བ་རེ་གཉིས་བཀླགས་པ་ལ་བརྟེན་ནས་ཁྱོད་ཀྱིས་ཉེར་མཁོའི་ཡོ་བྱད་རྣམས་འཚོལ་ཤེས་ངེས་ཡིན། དཔེར་ན། དྲ་ཤོག་ངོས་སུ་རེའུ་མིག་ཅིག་བཟོ་དགོས་ཚེ་གྷུ་གྷལ་འཚོལ་ཆས་ནང་དུ ‘table html’ ཞེས་བྲིས་ཏེ་བཙལ་ན ‘table html’ སྐོར་གྱི་དཔེ་སྣ་ཚོགས་རྙེད་ངེས་ཡིན། HTML སྐད་བརྡའི་རྨང་གཞིའི་ཤེས་བྱ་ཤེས་ན་ད་གཟོད་དེའི་སྐོར་གྱི་དཔེ་སྣ་མང་རྙེད་ངེས་ཡིན་པར་མ་ཟད། དཔེ་དེ་རྣམས་དབྱེ་འབྱེད་ལས་སླ་པོས་བྱེད་ཐུབ། ངས་དྲ་ཚིགས་འདིའི་རེའུ་མིག་ཐམས་ཅད་བཟོས་པ་ཡིན་མོད། ད་དུང་ཡང HTML tables སྐོར་གྱི་དཔེ་སྣ་ཚོགས་འཚོལ་ཞིབ་བྱེད་ཀྱི་ཡོད། གང་རྙེད་པའི་དཔེ་རྣམས་རང་ཉིད་ཀྱི་དགོས་མཁོ་དང་བསྟུན་ཏེ་བཟོ་བཅོས་ཀྱིས་དྲ་ངོས་སུ་འཇོག་གི་ཡོད། ཁྱོད་ཀྱིས་ཀྱང HTML སྐད་བརྡའི་ཆ་ཤས་རེ་རེ་བཞིན་བློར་བཟུང་མི་དགོས་པར་རང་ཉིད་ལ་གང་མཁོ་བ་དེ་ངོས་འཛིན་ཐུབ་ན་འགྲིག། 

གསུམ། CSS སྐད་བརྡ།

CSS ཡི་དོན་ནི་སྟོན་པ་མ་ཤི་ཀའི་འཁྲབ་སྟོན་པ་གྲགས་ཅན་ཟེར་བ་ཡིན་སྟབས། ཁྱོད་ཀྱིས་སྟོན་པ་མ་ཤི་ཀ་ལ་ཡིད་ཆེས་ཀྱི་དད་པས་དྲ་ཚིགས་བཟོ་ནའང་ད་དུང་དཀའ་ངལ་འཕྲད་སྲིད། CSS སྐད་བརྡ་ནི་དྲ་ཤོག་ངོས་ཀྱི་ནང་དོན་རིགས་དགར་བྱ་ཕྱིར་དུ་ཆུ་གཉེར་བཟོ་དབྱིབས་ལྡན་པའི་དྲ་ཤོག་བཟོ་བར་གཙོ་བོར་བཀོལ་སྤྱོད་བྱེད་པ་ཡིན། དེ་ནི་ཅུང་ཟད་སྦྱོང་དཀའ་བས་འཕྲལ་མར་ཤེས་མི་སྲིད། ངེས་པར་དུ་སློབ་སྦྱོང་བྱས་ཏེ་ཁོང་དུ་ཆུད་པར་བྱོས། དེ་ནས་གནོན་ཐེངས་གཅིག་ལས་མི་དགོས། དཔེར་ན། སྦག་སྦག་གཏོང་སྟངས་ཤེས་ན་ད་གཟོད་ཞོན་ཐེངས་གཅིག་ཡིན་པ་དང་འདྲ། ཁྱོད་རང་ལོ་ཉེར་གཅིག་ཟིན་དུས་མ་གཏོགས་སྦི་རག་འཐུང་བའི་འགོ་མི་བརྩམ། སྐབས་དེར་སྦི་རག་ཇི་ལྟར་འཐུང་དགོས་པ་དང་དེའི་བྲོ་བ་ངོ་མ་ཅི་ཡིན་ཤེས་ཏེ་མངོན་པར་བསྟོད་པ་ལྟར CSS སྐད་བརྡ་སྡེབ་འབྲི་བྱེད་ཚུལ་དང་དེ་ལ་ཡིད་སྨོན་སྐྱེ་བར་ཡང་དུས་ཚོད་དགོས་ཤིང་། ལྷག་པར་དུ CSS སྐད་བརྡ་སྦྱོང་བ་ཡང་སྦྱང་བྱ་གཞན་དང་འདྲ་བར་འབད་རྩོལ་བྱེད་དགོས། ཐོག་མར་ངལ་བ་དྲག་པོས་ཐེངས་བཅུ་ལ་བཟོས་ཀྱང་ད་དུང་ཚད་བཀག་དུས་ཚོད་ཡོལ་ཏེ་སྔར་བཞིན་བསྐྱར་ལོག་བྱེད་སྲིད། ཁྱོད་ཀྱིས་སློབ་གྲྭའི་རྒྱབ་ངོས་སུ་ཡོད་པའི་གད་སྙིགས་བླུག་སྣོད་འགྲམ་དུ་ཐེངས་དང་པོར་སྦི་རག་ཤེལ་དམ་དོ་ཨུ་ཚུགས་ཀྱིས་འཐུང་དུས་ཅི་འདྲས་སྣང་བ་སྐྱིད་པོ་ཞིག་མ་ཡིན་ནམ། དུས་ཚོད་ཕུད་དེ་བརྡ་ཆད་འདི་ལེགས་པར་ཤེས་པར་བྱས་ན་ད་གཟོད་བསྐྱར་ལོག་བྱེད་ཐེངས་རེ་རེ་ནི་སྔར་བས་མཛེས་པའི་དྲ་ཚིགས་ཀྱི་སྣང་བརྙན་རེ་རེ་ཡིན། CSS སྐད་བརྡའི་བྱེད་ལས་གཙོ་བོ་ནི་བརྗོད་གཞི་ལས་སྣང་བརྙན་དང་རྣམ་པ་སོ་སོར་ཕྲལ་ཏེ་རིགས་དགར་བྱེད་པ་དེ་ཡིན་ཞིང་། དྲ་ངོས་ཀྱི་ཆ་ཤས་གཅིག་ལ་འགྱུར་བ་བཏང་བ་ལས་དྲ་ངོས་ཀྱི་སྣང་བརྙན་རིལ་པོ་ལ་འགྱུར་བ་གཏོང་ཐུབ། དཔེར་ན། དྲ་ཤོག་བཟོ་བཀོད་བྱེད་སའི་ནང་དུ་འདི་སྡེབ་འབྲི་བྱས་ན་དྲ་ངོས་རིལ་པོའི་ཡིག་གཟུགས་ཚད་གཞི་ཨང་གྲངས་བཅུ་ནས་བཅུ་གཅིག་བར་ཆེ་རུ་གཏོང་ཐུབ། དེ་ནི་དྲ་ངོས་ཀྱི་དྲ་ཤོག་རེ་རེའི་ཡིག་གཟུགས་ཆེ་ཆུང་གཏོང་བར་དྲ་ཤོག་རེ་རེ་ཁ་ཕྱེ་བ་ལས་སླ་བ་གསལ་པོ་ཡིན། CSS སྐད་བརྡ་ལ་དྲ་ངོས་ཀྱི་བརྗོད་གཞི་མི་འདྲ་བ་ལས་པང་ངོས་དང་སྣང་བརྙན་བཅས་སོ་སོར་ཕྲལ་ཏེ་རིགས་དགར་བྱེད་པ་ལས་ད་དུང་ཕྱིན་ཆད་འགྱུར་བ་གཏོང་སླ་བའི་ཁྱད་ཆོས་ལྡན་ཡོད། གལ་ཏེ་ཁྱོད་ཀྱིས་སྐད་བརྡ་འདི་མ་ཤེས་ཚེ་ཟླ་གསུམ་སློབ་གསེང་གི་སྐབས་ཉིན་མཚན་མེད་པར་དྲ་ཤོག་རེ་རེའི་མཛུབ་གནོན་ལ་སྣུན་ཏེ་ངལ་བ་དྲག་པོ་བསྟེན་དགོས་པ་ནི་བཤད་མི་དགོས་ཤིང་། རྣམ་པ་དང་བརྗོད་གཞི་ཀུན་མཉམ་དུ་འདྲེས་ཏེ་ཨི་ཇིབ་ཀྱི་གནའ་བོའི་བརྡ་མཚོན་ཡིག་གཟུགས་ཀྱི་ནང་དོན་འགྲེལ་བཤད་རྒྱབ་པ་ལས་ཀྱང་དཀའ་ཞིང་། ན་ཉིན་སྟོན་པ་ཡེ་ཤུའི་འཁྲུངས་སྐར་ཉིན་ཤིང་སྡོང་ངོས་སུ་གློག་སྒྲོན་བཀལ་བ་ལས་ཀྱང་རྙོང་འཛིན་ཅན་ཞིག་ཏུ་འགྱུར་ངེས་ཡིན། ཡིན་ན་ཡང་། CSS སྐད་བརྡ་འདི་ཤེས་ཚེ་ད་གཟོད་པང་ངོས་ལས་རྣམ་པ་ལོགས་སུ་དགར་ཐུབ་ཅིང་། ཁྱོད་མཚོ་ཐོག་འཁྱམ་མྱུལ་བྱེད་སྐབས་གློ་བུར་དུ་སོ་མཱ་ལཱའི་མཚོ་ཇག་དང་གདོང་ཐུག་རྒྱབ་ཀྱང་ད་དུང་ཁྱོད་ཀྱིས་ལས་སླ་པོས་དྲ་ངོས་བཟོ་བཅོས་བྱེད་ཐུབ། CSS སྐད་བརྡ་སྦྱོང་བའི་ཐབས་ལམ་ལེགས་ཤོས་ནི་སྦྱོང་བརྡར་དྲ་བརྙན་ཉུང་ངུ་རེ་ལ་བལྟ་དགོས་པ་དེ་ཡིན། W3 Schools དྲ་ཚིགས་ནང་དུ CSS སྐད་བརྡ་སྦྱོང་བར་མཁོ་བའི་ཟུར་བལྟས་སློབ་ཚན་མང་པོ་འདུག ཟུར་བལྟས་སློབ་ཚན་བལྟ་ཀློག་བྱས་པ་ལས་འདི་ཤེས་ཏེ་འཕྲལ་མར་དྲ་ངོས་ཀྱི་སྣང་བརྙན་ལ་འགྱུར་བ་གཏོང་ཐུབ་ཅིང་དཔེ་སྣ་ཚོགས་བཟོ་བཅོས་བྱེད་པ་ལས་ཁྱོད ནི CSS སྐད་བརྡའི་ཐད་ལ་གོ་རྟོགས་ཟབ་པའི་མི་ཞིག་ཏུ་འགྱུར་ངེས་ཡིན། དྲ་ཚིགས་བཟོ་བར CSS སྐད་བརྡ་ཤེས་དགོས་པའི་གནད་དོན་དེ་ནི་ཧ་ཅང་གལ་ཆེ་བ་བཤད་ཅི་དགོས། ཁྱོད་ཀྱིས་སྐད་བརྡ་འདི་ཐོག་མར་སྦྱོང་སྐབས་ཡུན་ཙམ་རིང་ཐང་ཆད་དེ་སྦྱོང་མཚམས་བཞག་སྲིད་མོད། འོན་ཀྱང་། སྐད་བརྡ་འདི་མ་ཤེས་པར་དྲ་ཚིགས་བཟོ་སྐྲུན་བྱེད་པ་དེ་ནི་དེ་བས་དཀའ་ངལ་ཆེ་རུ་གཏོང་བ་དང་ཁྱད་མེད་པས། ཐོག་མར CSS སྐད་བརྡ་ཤེས་པར་བྱས་ན་ད་གཟོད་སྔར་བས་ལེགས་པའི་དྲ་ཚིགས་བཟོ་སྐྲུན་བྱེད་ཐུབ། 

བཞི། དྲ་ཚིགས་ཀྱི་ལག་རྩལ་མཉེན་ཆས་དང་བཀོལ་སྤྱོད་བྱེད་སྟངས།

དྲ་ཚིགས་ལག་རྩལ་རིག་པའི་གཞུང་ལུགས་ལྟར་ན། ཁྱེད་ལ་གང་དགོས་པ་དེ་ནི་ནཱོ་ཊི་པེ་ཊི་ཡིན་ཟེར། གནའ་བོའི་གྷི་རཱི་སཱའི་ཆ་བགོས་རྩིས་རིག་པ་བསྐྱར་ཟློས་ཀྱིས་ས་ཆའི་གྲངས་ཁྲི་གཅིག་བར་བརྩི་ཐུབ་སྲིད་པ་ལྟར། ནཱོ་ཊི་པེ་ཊིའི་ནང་དུའང་དྲ་ཚིགས་ཆ་ལག་ཚང་བ་ཞིག་བཟོ་སྐྲུན་བྱེད་ཐུབ་སྲིད་པ་ཡིན། ཡིན་ན་ཡང་། དེ་ནི་སྲིད་མཐའ་ཙམ་ཡིན་པས་ཁྱེད་ལ་དེ་དགོས་ཟེར་བ་མིན།

དོན་དངོས་ནི། ཁྱོད་ལ་དྲ་ཚིགས་ཀྱི་ལག་རྩལ་རང་བཞིན་ལྡན་པའི་མཉེན་ཆས་ཤིག་དགོས་པ་དེ་ཡིན། མཉེན་ཆས་ཚད་ལྡན་ཞིག་གིས་ད་གཟོད་དྲ་ཚིགས་བཟོ་སྐྲུན་དང་བཀོལ་སྤྱོད་བྱེད་ཕྱོཊ་ཀྱི་དཀའ་ངལ་རྣམས་ཡོངས་སུ་བསལ་ཐུབ། མ་གཞི HTML དང་ CSS སྐད་བརྡ་འདི་གཉིས་ཤེས་དགོས་པ་ཡིན་མོད། འོན་ཀྱང་དྲ་ཚིགས་ཀྱི་ལག་རྩལ་མཉེན་ཆས་ཡོད་ཚེ་དེ་གཉིས་ངེས་པར་དུ་ཤེས་དགོས་དོན་མེད། ལག་པ་དང་ཙི་ཙི་གཉིས་ཀྱིས་ཡར་མར་གནོན་ཏེ་ཕྲ་སྦོམ་དང་དྲུད་འཕྲི་བྱེད་པ་དེ་ཙམ་གྱིས་དྲ་ཚིགས་བཟོ་སྐྲུན་བྱེད་ཐུབ། འོན་ཀྱང་། སྐད་བརྡ་འདི་གཉིས་ཀྱི་རྨང་གཞིའི་ཤེས་བྱ་མ་ཤེས་པར་ལག་རྩལ་མཉེན་ཆས་ཅི་འདྲའི་ཚད་ལྡན་ཞིག་ཡིན་ཀྱང་ད་བར་དུ་དྲ་ཚིགས་བཟོ་བཀོད་ལེགས་པ་གཅིག་ཀྱང་སྐྲུན་ཐུབ་མེད། མཛུབ་གནོན་གྱིས་ཡོལ་ངོས་རྣམ་པར་འགྱུར་བ་བཏང་སྟེ་དྲ་ངོས་བཟོ་བཅོས་གཏོང་བ་ལས HTML སྐད་བརྡ་སྡེབ་འབྲི་བྱེད་པ་སླ་བ་ཡིན་ཏེ། ཡོལ་ངོས་རྣམ་པར་འགྱུར་བ་བཏང་སྟེ་དྲ་ངོས་བཟོ་བཅོས་བྱེད་པར་སྐར་མ་ཉི་ཤུ་འགོར་ཞིང་། HTML བརྡ་ཆད་སྡེབ་འབྲི་ཡིས་དྲ་ངོས་བཟོ་བཅོས་བྱེད་པར་སྐར་ཆུང་བཅུ་ལས་མི་འགོར། གལ་ཏེ་རང་ཉིད་ལ་དྲ་ཚིགས་བཟོ་འདོད་ཡོད་ཚེ HTML དང་ CSS སྐད་བརྡ་སྦྱོང་དགོས་ཞེས་ཐེངས་མང་བཤད་དོན་ཅི་ཡིན་ཟེར་ན། དྲ་ཚིགས་ལག་རྩལ་མཉེན་ཆས་ཅི་འདྲའི་ཚད་ལྡན་ཞིག་ཡིན་ཀྱང་དེས་དུས་ཚོད་སྲི་ཚགས་མི་བྱེད་ཅིང་དེ་ནི་ལས་དང་པོ་པ་ལ་དགོས་མཁོ་ཡོད་པ་ཞིག་ཡིན་མོད། ཉེ་བར་མཁོ་བ་ནི་སྐདབརྡ་དེ་གཉིས་ཡིན། འདས་པའི་ལོ་རབས་སུ་ལས་དང་པོ་པ་ལ་མཁོ་བའི་དྲ་ཚིགས་ཀྱི་ལག་རྩལ་མཉེན་ཆས་ནི་གཞུང་ལས་མདུན་ངོས་དྲ་ཤོག (Microsoft FrontPage) ཟེར་བ་འདི་ཡིན་མོད། ད་ལྟ་དེ་ནི་དུས་ཚོད་ཡོལ་ཟིན་པ་ཞིག་རེད། གཞུང་ལས་མདུང་ངོས་དྲ་ཤོག་ལ་དྲ་ཚིགས་འཐུས་སྒོ་ཚང་བ་ཞིག་བཟོ་སྐྲུན་བྱེད་པའི་ལྡེམ་མྱུར་ལྡན་པའི་ཡོ་བྱད་མེད་ལ། དེའི་ནང་དུ་དྲ་ཚིགས་ཀྱི་སྣང་བརྙན་གཅིག་རྐྱང་ཅན་ཞིག་ལས་བཟོ་སྐྲུན་བྱེད་མི་ཐུབ།

དྲ་ཚིགས་ཇུས་འགོད་ཀྱི་མ་ལག་ཚང་ཞིང་རིན་གོང་ཆེ་བའི Dreamweaver མཉེན་ཆས།

ཉེ་དུས་རཱོལ་སི་རཱོ་སེའི་དྲ་ཚིགས་ཇུས་འགོད་མཉེན་ཆས་ལས་ཁུངས (Rolls Royce) ཀྱིས་བཟོས་པའི་དྲ་ཚིགས་ཇུས་འགོད་མཉེན་ཆས་ནི Adobe Dreamweaver CS5 ཟེར་བ་དེ་ཡིན། མཉེན་ཆས་དེར་དྲ་ཚིགས་ལག་རྩལ་གྱི་ཉེར་མཁོའི་ཡོ་བྱད་ཐམས་ཅད་ཚང་ཞིང་བེད་སྤྱོད་སྟབས་བདེ་སླའི་ཁྱད་ཆོས་ལྡན་ཡོད། འོན་ཀྱང་བེད་སྤྱོད་སྟབས་བདེ་སླའི་བཅའ་དངོས་གང་ལའང་རིན་གོང་ཆེ་བ་ནི་བཤད་མི་དགོས་པས་འདི་ལའང་ཌོ་ལར་བཞི་བརྒྱ་ཐམ་པ་ཡིན། དྲ་ཚིགས་འདི Dreamweaver cs5 ནས་བཟོས་པ་ཡིན་སྟབས་དང་པོ་ནས་རིན་གོང་ཆེན་པོ་གནས་ཡོད་མོད། ངས Dreamweaver cs5 མཉེན་ཆས་སྐོར་གྱི་རྩོམ་ཡིག་བཀླགས་པ་དང་བེད་སྤྱོད་གཏོང་སྟངས་ཤེས་པར་བྱས་ཏེ་ད་གཟོད་ཉོ་རྒྱུ་ཐག་བཅད་པ་ཡིན། ཐོག་མར་ཟླ་གཅིག་རིན་མེད་ངང་བེད་སྤྱོད་ཆོག་པའི Dreamweaver cs5 མཉེན་ཆས་དེ་ཕབ་ལེན་བྱས་ཏེ་དྲ་ཚིགས་འདི་བཟོ་སྐྲུན་བྱེད་འགོ་བཙུགས་པ་ཡིན། དེ་ནི་ཚོད་ལྟ་བདེ་ཞིང་སྦྱོང་རྒྱུ་ཡང་དེ་ཙམ་དཀའ་མོ་ཞིག་མ་རེད། ངས dreamweaver བེད་སྤྱོད་ཇི་ལྟར་གཏོང་དགོན་མིན་ཤེས་ཕྱིར HTML སྐད་བརྡ་སྦྱོང་བའི་ཐབས་ཤེས་ལྟར་བྱས་པ་ཡིན། དེ་ཡང Dreamweaver CS5 For Dummies ཉོས་ཏེ Dreamweaver ཡི་རྨང་གཞིའི་ཤེས་བྱ་སྦྱངས་ཤིང་དེ་ནས་གཏིང་ཇེ་ཟབ་ཏུ་གཏོང་ཕྱིར་དྲ་རྒྱའི་ངོས་སུ་སྦྱང་གཞིའི་ཡིག་ཆ་མང་དུ་བཙལ་ཏེ་སྦྱངས་པས། ཚོུད་འགའ་ཤས་ལས་མ་སོང་བར Dreamweaver ཡི་པང་ངོས་སྐྲུན་བྱེད་ཀྱི་མཛུབ་གནོན་ཡོ་བྱད་རྣམས་བེད་སྤྱོད་གཏོང་སྟངས་སྟབས་བདེ་རུ་ཕྱིན་སོང།

ཇུས་འགོད་བྱེད་པར་སྟབས་བདེ་ཞིང་རིན་གོང་འོས་འཚམས་ཀྱི་ལག་རྩལ་མཉེན་ཆས CoffeeCup

རིན་གོང་ཌོ་ལར་བཞི་བརྒྱ་ཐམ་པ་གནས་པའི་ལག་རྩལ་མཉེན་ཆས་འདི་ལས་རིན་གོང་ཆུང་བའི་མཉེན་ཆས་མང་དུ་ཡོད། དཔེར་ན། CoffeCup ཇུས་འགོད་མཉེན་ཆས་འདི་ནི་དྲ་ཚིགས་ལག་རྩལ་དང་བཀོལ་སྤྱོད་གཉིས་ཀར་བདེ་ཞིང་། རིན་གོང་ཡང་ཌོ་ལར་ལྔ་བཅུ་ལས་གནས་མེད། ཕལ་ཆེར་དེ་ནི་ལས་དང་པོ་པ་ཚོ་ལ་བདམས་ཉོ་ལེགས་ཤོས་དེ་ཡིན། འོན་ཀྱང་། མཉེན་ཆས་འདི་ལ Dreamweaver མཉེན་ཆས་ལྟ་བུ་ཡོ་བྱད་ཀྱི་མ་ལག་ཀུན་ཚང་མེད་སྟབས་ཐོག་མར CoffeeCup ལས་ཡིད་ཚིམས་པ་ཞིག་སྦྱངས་ནས་ད་གཟོད Dreamweaver བདམས་ཉོ་བྱས་ན་ལེགས། གལ་ཏེ་མཉེན་ཆས་འདི་ཡང་རིན་གོང་ཆེ་བས་ལོ་རེའི་སོང་རྩིས་ཀྱི་ཚད་གཞི་ལས་བརྒལ་འདུག་སྙམ་ན་ད་དུང་ཁྱེད་ལ་བདམས་ག་ཡོད། CoffeeCup HTML Editor ཟེར་བའི་མཉེན་ཆས་འདི་རིན་མེད་ངང་ཕབ་ལེན་བྱས་ཆོག་ཅིང་། Dreamweaver དང་འདྲ་བར HTML དང CSS སྐད་བརྡ་སྡེབ་འབྲི་ཡིས་ཚོན་མདོག་སྣ་མང་བདམས་ཆོག་པ་དང། མཛུབ་གནོན་བྱེད་དེ་དྲ་ཤོག་གི་པང་ངོས་སོགས་ཡར་མར་དྲུད་ཕྲི་ཡང་བྱས་ཆོག འོན་ཀྱང་དེར་པང་ངོས་དང་བཟོ་བཀོད་སོགས་བཟོ་བྱེད་ཙམ་ལས་དྲ་ཤོག་ཞབས་ཞུའི་དྲ་ངོས་སུ་པར་སྐྲུན་བྱེད་པའི་ཡོ་བྱད་ལྡན་མེད།

HTML དང་ CSS སྐད་བརྡའི་ཆ་རྐྱེན་མི་དགོས་པའི Website Builder མཉེན་ཆས།

ངས་གོང་དུ HTML དང CSS སྐད་བརྡ་ངེས་པར་དུ་སྦྱོང་དགོས་ཞེས་བཤད་པ་ཡིན་མོད། འོན་ཀྱང་ཁྱོད་སྐད་བརྡ་དེ་གཉིས་སྦྱོང་མི་འདོད་པའི་རིགས་ཡིན་སྲིད་པས་ད་དུང་ཁྱོད་ལ་གདམ་ག་གཞན་ཡོད། གལ་ཏེ་ཁྱེད་དངོས་གནས་དྲ་ཚིགས་ལག་རྩལ་དང་། ཡོ་བྱད་མ་ལག་ཀུན་ཚང་བ HTML /CSS/FTP བཅས་སློབ་མི་འདོད་ན་པང་ངོས་ཀྱི་ཆ་ཤས་རེ་རེ་དྲུད་འཕྲི་དང་ཡར་མར་སྤོར་གནོན་ཙམ་གྱིས་དྲ་ཚིགས་བཟོ་སའི་མཉེན་ཆས website builder ཡོད། མཉེན་ཆས་དེའི་ཁྱད་ཆོས་ནི་ཙི་ཙིས་ཡར་སྣུན་མར་སྣུན་གྱིས་དྲ་ཚིགས་བཟོ་སྐྲུན་བྱེད་ཐུབ་པ་དེ་ཡིན་ཡང་། དྲ་ངོས་ཀྱི་བརྗོད་གཞི་རིགས་དགར་བྱེད་པར་དཀའ་ངལ་འཕྲད་སྲིད་ཅིང་། མཉེན་ཆས་འདིའི་ལག་རྩལ་མ་ལག་ངལ་བ་དྲག་པོས་མཛུབ་གནོན་གྱིས་ལག་ལེན་སྟར་དགོས། HTML དང CSS སྐད་བརྡའི་ཆ་རྐྱེན་དང་། ཞབས་ཞུའི་དྲ་ངོས་སུ་པར་སྐྲུན་བྱེད་པའི་ཡོ་བྱད་མ་གཏོགས་པའི་གཞན་མ་ལག་རྩལ་མ་ལག་ཀུན་མཉེན་ཆས་འདི་ལ་ཚང་ཡོད། WorldForWebsite provides a great website builder མཉེན་ཆས་འདི་ལ་དྲ་ཚིགས་བཟོ་སྐྲུན་གྱི་ལག་རྩལ་གང་ཡང་མི་དགོས་པར་ཚོུད་འགའི་ནང་དྲ་ཚིགས་བཟོ་ཐུབ།

དྲ་ཚིགས་ལག་རྩལ་མཉེན་ཆས་བདམས་ག།

Adobe Dreamweaver

ལེགས་པའི་ཆ། དྲ་ཚིགས་ལག་རྩལ་མ་ལག་དང་བཀོལ་སྤྱོད་ཡོ་བྱད་སྣ་མང་འདུས་པས། དྲ་ཚིགས་ཚད་ལྡན་བཟོ་སྐྲུན་བྱེད་ཐུབ་པར་མ་ཟད། དྲ་ཤོག་པར་རིས་ཞབས་ཞུའི་དྲ་ངོས་སུ་པར་སྐྲུན་བྱེད་པའི་ཡོ་བྱད་ཀྱང་ལྡན་ཡོད། ལྷག་པར་དུ་མཉེན་ཆས་དེར་ད་ལྟ་དང་མ་འོངས་པར་འབྱུང་སྲིད་པའི་དྲ་ཚིགས་ལག་རྩལ་མ་ལག་ཆེས་ལེགས་ཤོས་རྣམས་ལྡན་ཡོད།
ཉེས་པའི་ཆ། རིན་གོང་ཌོ་ལར་བཞི་བརྒྱ་ཙམ་ཡིན་པས་ཅུང་ཟད་གོང་ཆེ།

CoffeeCup Website Designer

ལེགས་པའི་ཆ། མཉེན་ཆས་དེར་དྲ་ཚིགས་ལག་རྩལ་མ་ལག་དང་བཀོལ་སྤྱོད་ཡོ་བྱད་ཕལ་ཆེར་འདུས་ཡོད་མོད། འོན་ཀྱང Dreamweaver ལྟ་བུ་དྲ་ཚིགས་བཟོ་སྐྲུན་གྱི་མཐོ་རིམ་གནས་ཚད་ལྡན་པའི་མ་ལག་མི་ལྡན་ཞིང་མ་ལག་ཀུན་ལས་དང་པོ་པ་ལ་གཙོ་བོར་དམིགས་ཏེ་བཟོས་པ་ཡིན། རིན་གོང་ཌོ་ལར་ལྔ་བཅུ་ཡིན།
ཉེས་པའི་ཆ། Dreamweaver ལྟ་བུའི་ཡོ་བྱད་མ་ལག་ཚང་མེད།

CoffeeCup HTML Editor

ལེགས་པའི་ཆ། རིན་མེད་ཡིན།
ཉེས་པའི་ཆ། HTML སྡེབ་འབྲི་མཉེན་ཆས་འདི CoffeeCup HTML ཡི་སྡེབ་འབྲི་མཉེན་ཆས་ཅུང་ཟད་ཚད་དམའ་རུ་བཏང་སྟེ་བཟོས་པ་ཡིན་པས། རྣམ་པ་སྒྲིག་བཀོད་དང་། CSS སྡེབ་འབྲི། ས་ཁྲ་པར་རིས་ཅན། ཚོན་ཁྲ་སྣ་མང་བདམས་ག་བྱེད་པའི་མ་ལག་ལྡན་མེད།

Website Builder

ལེགས་པའི་ཆ། དྲ་ཚིགས་བཟོ་སྐྲུན་མ་ལག་ཀུན་ཕལ་ཆེར་འདུས་ཤིང་། HTML དང CSS སྐད་བརྡ་སྡེབ་འབྲིའི་ཆ་རྐྱེན་ཀྱང་མེད། པང་ངོས་ཀྱི་ཆ་ཤས་རེ་རེ་དྲུད་འཕྲི་དང་ཡར་མར་སྤོར་གནོན་ཙམ་གྱིས་དྲ་ཚིགས་བཟོ་ཐུབ་པ་དང་། ཞབས་ཞུ་དྲ་བའི་གཞོགས་འདེགས་ཐོད་པ་གང་ཡང་ལྡན་མི་དགོས་པ་ཡིན།
ཉེས་པའི་ཆ། ཡོ་བྱད་རིགས་མི་འདྲ་བ་གཅིག་སྟོང་ཙམ་ཡོད་མོད། མཉེན་ཆས་གཞན་ལྟར་སྟངས་འཛིན་བྱེད་པའི་བདམས་ག་ཆ་ཚང་བ་ཞིག་མེད་པ་དང་། དྲ་ངོས་པར་རིས་དང་གསང་བརྡ་སྡེབ་འབྲི་བྱེད་པའི་ཡོ་བྱད་ལའང་ཚད་གཞི་ཡོད།

ངའི་མཚམས་སྦྱོར་ཞུ་བྱ་གཙོ་བོ་ནི། ཁྱེད་ཀྱིས་དྲ་ཚིགས་གཏན་འཁེལ་བ་ཞིག་བཟོ་ཤེས་ཀྱི་མེད་པའམ་ཡང་ན་འབྲིང་ཙམ་ལས་ཤེས་ཀྱི་མེད་ཚེ་ཟླ་གཅིག་རིན་མེད་ངང་བེད་སྤྱོད་ཆོག་པའི 30 day free trial of CoffeeCup ཚོད་ལྟའི་མཉེན་ཆས་དེ་ཕབ་ལེན་བྱེད་དགོས། མཉེན་ཆས་དེའི་ནང་དུ་བཟོ་སྐྲུན་བྱེད་སྟངས་ཤེས་རྗེས་ད་གཟོད་ཌོ་ལར་ལྔ་བཅུ་སྤྲད་དེ CoffeeCup མཉེན་ཆས་ཉོས་ན་འགྲིག དེའི་རྗེས་སུ་དེ་ལས་ལག་རྩལ་མ་ལག་ཆ་ཚང་བའི་མཉེན་ཆས Dreamweaver མཉེན་ཆས་ཉོས་ན་ལེགས། ཕྱོགས་གཞན་ཞིག་ནས། CoffeeCup མཉེན་ཆས་ནང་དུ་དྲ་ཚིགས་བཟོ་རྒྱུ་གདེང་ཚོད་ལོན་ཏེ། དེ་ནས་ཟླ་གཅིག་རིན་མེད་ངང་བེད་སྤྱོད་ཆོག་པའི Dreamweaver ཚོད་ལྟའི་མཉེན་ཆས་ཕབ་ལེན་བྱས་ན་ངས་ཉེན་བརྡ་གཏོང་དགོས་པ་ཞིག་ལ། ཁྱོད་ཀྱིས Dreamweaver ཚོད་ལྟའི་མཉེན་ཆས་ནས་དྲ་ཚིགས་བཟོ་འགོ་བཙུགས་ཏེ་ཟླ་གཅིག་ལ་ཉེ་སྐབས། རིན་མེད་ངང་བེད་སྤྱོད་ཆོག་པའི་ཚད་བཀག་དུས་ཡུན་རྫོགས་ཏེ་ཞབས་ཞུའི་དྲ་བས Dreamweaver མཉེན་ཆས་ཉོ་མ་འདོད་ནའང་ཉོ་བར་བཙན་སྐུལ་གཏོང་སྲིད་པས། སྐབས་དེར་མཉེན་ཆས་གཞན་ཞིག་ཉོ་དགོས། གལ་ཏེ་དངོས་གནས་རང་ཉིད་ལ་དྲ་ཚིགས་ཚད་ལྡན་ཞིག་དགོས་མཁོ་ཡོད་མེད་གཏན་མ་འཁེལ་ཞིང་། རྙོང་འཛིང་ཅན་གྱི HTML དང CSS སྐད་བརྡ་འདི་གཉིས་ཤེས་འདོད་མེད་ཚེ Website Builder མཉེན་ཆས་འདི་སྦྱོངས་དང། ཆུ་ཚོད་ཁ་ཤས་ལས་མ་འགོར་བར་དྲ་ཚིགས་བཟོ་ཐུབ་པར་མ་ཟད་ཞབས་ཞུའི་དྲ་ངོས་སུ་པར་སྐྲུན་ཀྱང་བྱེད་ཐུབ། ལྷག་པར་དུ་དེའི་ནང་དུ་དྲ་ངོས་སུ་བརྗོད་གཞི་མི་འདྲ་བ་འབྲི་ཐུབ་ཅིང་དྲ་ཚིགས་ཀྱི་སྣང་བརྙན་གང་འདྲ་ཆགས་མིན་ཚོད་ལྟ་ཡང་བྱས་ཆོག རྗེས་སུ་དེ་བས་ལེགས་པའི་མཉེན་ཆས་ག་དུས་ཉོས་ནའང་ཆོག་པ་ཡིན། 

VirtualBox ནང་སྐར་ཁུང་ 10 དང་ Linux བཅུག་སྟངས།

 

VirtualBox མཉེན་ཆས་ནི་རང་ཉིད་ཀྱི་སྤྱོད་བཞིན་པའི་རྒྱུད་ཁུངས་མ་ལག་སྟེང་རྒྱུད་ཁུངས་མ་ལག་གཞན་བཅུག་རྒྱུ་ཡོད་ཁར་དུས་གཅིག་གི་ནང་རྒྱུད་ཁུངས་མ་ལག་གཉིས་གསུམ་ཁ་ཕྱེ་རྒྱུ་ཡོད་པའི་མཉེན་ཆས་ཞིག་ཡིན། དཔེར་ན། ཀུ་ཤུ་གློག་ཀླད་ནང་སྐར་ཁུང་རྒྱུད་ཁུངས་མ་ལག་བླུགས་སྟེ་སྐར་ཁུང་གི་མཉེན་ཆས་ཚོད་ལྟ་དང་བེད་སྤྱོད་བྱེད་རྒྱུ་བཟོ་བ་དང་། ཡང་ན་ངས་གཤམ་གྱི་བརྙན་ཟློས་ནང་གསལ་བ་ལྟར་སྐར་ཁུང་བརྒྱད་པའི་ནང་སྐར་ཁུང་བཅུ་པ་བླུགས་ནས་སྐར་ཁུང་བཅུ་པ་ཚོད་ལྟ་བྱེད་རྒྱུ་སོགས་ཡོད། དེ་ལྟར་ཡོང་ཐུབ་པ་ནི་ VirtualBox ཞེས་པའི་མཉེན་ཆས་དམིགས་བསལ་ཞིག་སྤྱོད་རྒྱུ་ཡོད་པའི་དབང་གི་ཡིན། VirtualBox ཟེར་བའི་མཉེན་ཆས་དེ་རྒྱུད་ཁུངས་མ་ལག་ཚང་མའི་ཆེད་དུ་བཟོས་ཡོད་པ་དང་རིན་མེད་ཐོག་ཕབ་ལེན་བྱེད་རྒྱུའང་ཡོད། གཤམ་གྱི་བརྙན་ཟློས་ནང་ངའི་གློག་ཀླད་སྐར་ཁུང་བརྒྱད་པ་བྱས་པ་ཞིག་གི་ནང་ VirtualBox བེད་སྤྱད་དེ་ Linux དང་ Window 10 གཉིས་སྒྲིག་འཇུག་བྱེད་སྟངས་སྟོན་ཡོད།

གྲ་སྒྲིག

  • གལ་ཏེ་ VirtualBox བེད་སྤྱོད་གཏོང་འདོད་ན། མཉེན་ཆས་འདི་གཞུང་འབྲེལ་དྲ་བ་ནས་ཕབ་ལེན་དང་སྒྲིག་འཇུག་བྱེད་དགོས། VirtualBox ནི་དེང་གི་རྒྱུད་ཁུངས་མ་ལག་ཚང་མའི་ཆེད་དུ་བཟོས་ཡོད། གཞུང་འབྲེལ་དྲ་བ་ནི། https://www.virtualbox.org/
  • VirtualBox ནང་རྒྱུད་ཁུངས་མ་ལག་གཞན་བཅུག་པའི་སྐབས་ཁྱེད་ཀྱི་གློག་ཀླད་གསར་པ་ཞིག་བླངས་པ་དང་འདྲ་པོ་ཡོད། གློག་ཀླད་གསར་པར་ RAM དང་ Hard Disk དགོས་པར་བརྟེན། ཁྱེད་ཀྱི་གློག་ཀླད་ཨ་མར་ RAM དང་ Hard Disk འདང་ངེས་ཞིག་དགོས།
  • རྒྱུད་ཁུངས་མ་ལག་གི་འོད་སྡེར་རམ་ ISO ཅན་གྱི་རྒྱུད་ཁུངས་མ་ལག་ཕབ་ལེན་བྱས་ཟིན་པ་ཞིག་དགོས།
  • གལ་ཏེ་ཁྱེད་ལ་རྒྱུད་ཁུངས་མ་ལག་གི་འོད་སྡེར་གང་ཡང་མེད་ན། འདིར་ཁྱེད་ལ་ཚོད་ལྟའི་ཆེད་ Linux གྱི་རྒྱུད་ཁུང་མ་ལག་ Slitaz ཟེར་བ་དེ་ཕབ་ལེན་བྱས་ན་འགྲིག 
  • Slitaz ཟེར་བ་འདིར་ 35mb ལས་མེད། VirtualBox ནང་ཚོད་ལྟ་བྱེད་འོས་པ་ཞིག་ཡིན། Slitaz ཕབ་ལེན།
  • སྐར་ཁུང་ 10 ལ་ 3.6gb ཡོད། ཕབ་ལེན་བྱེད་ན་དྲ་གནས་འདིར་གཟིགས། Window10 ཕབ་ལེན།

བརྙན་ཟློས།



VirtualBox ནང་ Slitaz Linux བཅུག་པའི་སྐབས། RAM=256MB དང་ Hard Disk = 1GB ཐོག་འཇོག་ན་འགྲིག
VirtualBox ནང་ Window 10 བཅུག་པའི་སྐབས། RAM=2GB དང་ Hard Disk = 40GB ཐོག་འཇོག་ན་འགྲིག

ཁྱེད་ཀྱིས་སྤྱོད་བྱེད་བཞིན་པའི་གློག་ཀླད་ལ་ཉུང་མཐར་ RAM=3GB དགོས། དེ་མིན་ VirtualBox ནང་སྐར་ཁུང་གཞན་བཅུག་ཐུབ་ཀྱང་ལས་ཀ་བྱེད་རྒྱུར་ཧ་ཅང་འགོར་པོ་ཆགས་ཀྱི་རེད།

གཉེན་ཆས་རྣམས་ལ་ Crack དང་ Keygen ཟེར་བ་སོགས་ཅི་ཕྱིར་དགོས་སམ།

 

གུས་པའི་དྲི་བ་ལ་རྩིས་འཁོར་ནང་གཉེན་ཆས་རྣམས་ལ་ Crack དང་ Keygen ཟེར་བ་སོགས་ཅི་ཕྱིར་དགོས་སམ་ཞུ། ཀླུ་འཁྱིལ་བས།
ཤོས་ཡོན་ཁྱབ་སྤེལ་ཆེད་དུ་བཟོས་པའི་མཉེན་ཆས་མ་གཏོགས། གཞན་མཉེན་ཆས་རྣམས་ནི་ཚོང་ཟོག་དང་གཅིག་པ་རེད། མཉེན་ཆས་ཞིག་བེད་སྤྱོད་བྱེད་པར་མཉེན་ཆས་དེ་བཟོ་མཁན་གྱི་སྒྲིག་སྲོལ་ལྟར་རིན་པ་སྤྲོད་ནས་སྤྱོད་དགོས། ནུབ་ཕྱོགས་ལ་ཁྲིམས་ལུགས་དམ་པོ་ཡོད་པ་བརྟེན། མཉེན་ཆས་བཟོ་མཁན་གྱི་མཁེ་དབང་སླད་རིན་པ་མ་སྤྲད་པར་མཉེན་ཆས་བེད་སྤྱོད་བྱེད་ན་ཁྲིམས་འགལ་དུ་བརྩི།

འོན་ཀྱང་ཤེས་ཡོན་པའི་སྡེ་ཁག་གཞན་ཞིག་གི་བལྟ་ཚུལ་ནི། མཉེན་ཆས་བཟོ་མཁན་གྱིས་རིན་པ་ཚད་ལས་འགལ་གྱི་ཡོད་པ་དང་། ཁྲིམས་ལུགས་ཀྱི་དབང་ཆ་སྤྱད་དེ་ཚོང་མཉེར་བས་སྒེར་གྱི་མཁེ་ཕན་གཅིག་པོ་སྲུང་བ་ནི་མི་འགྲིག་པའི་བསམ་ཚུལ་ཞིག་སླེབས་ཀྱི་ཡོད། དེར་བརྟེན་མི་མང་པོ་ཞིག་གིས་མཉེན་ཆས་ལ་རིན་པ་སྤྲོད་མི་དགོས་པར་གསང་བའི་ཐོག་ནས་བེད་སྤྱོད་གཏོང་ཐུབ་རྒྱུ་དང་འཇུ་བཟུང་མི་ཐུབ་པའི་ Crack དང་ Serial No., Patch ,KeyGen ཟེར་བ་སོགས་བཟོས་ཏེ། དྲ་ཐོག་ནས་ཕབ་བཤུ་བྱེད་རྒྱུ་ཡོད་པ་བཟོ་གི་ཡོད།

མཉེན་ཆས་བཟོ་མཁན་གྱི་ཚོང་སྡེ་ཞིག་ལ་ཆ་མཚོན་ན་ Crack དེ་དག་གིས་མཉེན་ཆས་ཚོང་འགྲེམས་ལ་དོ་ཕོག་ཆེན་པོ་བཟོ་གི་ཡོད། ཕྱོགས་གཞན་ཞིག་ལ་མཉེན་ཆས་ཉོ་མི་ཐུབ་མཁན་སྐྱེ་བོ་མང་པོ་ཞིག་ལ་མཁེ་ཕན་བསྐྲུན་གྱི་ཡོད། Crack དང་ Keygen ཡོད་པའི་མཉེན་ཆས་དེ་དག་བེད་སྤྱོད་གཏོང་སྐབས་འགྲིག་མིན་བསམ་ཚུལ་མི་འདྲ་བའི་རྩོད་གླེང་མང་པོ་ཡོང་གི་ཡོད་ལ། ཕྱོགས་རེ་རེའི་བསམ་ཚུལ་ལ་གཞིགས་ན། འདི་འགྲིགས་དང་འདི་ནོར་ཟེར་ཁག་པོ་རེད།

ད་ལྟའི་དུས་སུ་མཉེན་ཆས་ཡོད་དོ་ཅོག་ལ་ Crack རེ་བཟོས་ཡོད་ཟེར་ན་ངས་ཧམ་པ་མི་ཆེ་བསམ། ཉེ་ཆར་ Adobe ཚོང་རྭས་ Creative Cloud ཟེར་བའི་ Adobe གི་མཉེན་ཆས་སྤར་མ་གསར་ཤོས་བཟོས་ཡོད། ཁོང་ཚོས་འུར་སྒྲ་ཆེན་པོས་ད་ནས་བཟུང་ Adobe ཚོས་ལས་སྡེ་ཚན་གྱིས་བཟོས་པའི་མཉེན་ཆས་རྣམས་གཞན་གྱི་བརྐུ་འཁྱེར་དང་འགྲེམས་སྤེལ་བྱེད་མི་ཐུབ་པ་བཟོས་ཡོད་པ་གྲགས་ཀྱང་། ཉིན་ཁ་ཤས་རྗེས་ Adobe གི་མཉེན་ཆས་ཡོད་དོ་ཅོག་དང་ Crack རེ་བཟོས་ཡོད་ལ་དྲ་ཐོག་ཕབ་ལེན་ཁྲི་ཚོ་འགལ་ཟིན་ཡོད།

Crack བཟོ་མཁན་དེ་དག་ནི་སྐབས་རེ་ཁྲིམས་ལུགས་ངོས་ནས་བརྐུ་མ་དང་ཇག་པར་ངོས་འཛིན་གྱི་ཡོད། འོན་ཀྱང་མི་མང་མང་པོ་ཞིག་གིས་ཁོང་ཚོ་ནི་སེམས་ནང་གི་ཛཱོ་ལོ་ ( Zolo ཟེར་བ་ནི་དབྱིན་ཇིའི་གློག་བརྙན་གཅིག་གི་ནང་གི་གཞུང་དྲག་དང་ཚོང་པ་ཆེན་པོར་རྒོལ་ལན་དང་མི་མང་ལ་ཕན་གྲོགས་བྱེད་མཁན་གྱི་དཔའ་བོ་ཞིག་གི་མིང།) འདྲ་པོ་ཆགས་རེད།

ངའི་བསམ་པར་རིན་པ་མ་སྤྲད་པར་མཉེན་ཆས་ཕབ་བཤུ་བྱེད་པ་དེ་དག་ཤེས་ཡོན་དང་སྒེར་གྱི་ཆེད་དུ་ལས། མཉེན་ཆས་དེ་འདྲ་བཤུས་ཀྱིས་འོད་སྡེར་བཟོས་སྟེ་ཚོང་འགྲེམས་རིགས་བྱེད་མི་ངན་སེམས། དེ་བས་ཀྱང་གལ་ཆེ་བ་ནི། ཨ་རི་དང་ཡོ་རོབ། དེ་བཞིན་ཁྲིམས་ལུགས་བཙན་པའི་རྒྱལ་ཁབ་དེ་དག་ནང་ Crack དང་ Keygen ཡོད་པའི་མཉེན་ཆས་རིགས་མ་སྤྱད་ན་ལེགས། རྒྱལ་ཁབ་དེ་དག་ནང་ཚོང་མཉེར་བར་ཁྲིམས་ཀྱི་རྒྱབ་རྩ་ཡོད་ཙང་གལ་ཏེ་ཁྱེད་ཀྱིས་རིན་པ་མ་སྤྲད་པའི་མཉེན་ཆས་བེད་སྤྱོད་བྱེད་ཀྱི་ཡོད་པ་ཤེས་སྲིད། ཤེས་ཕྲལ་ཁྲིམས་ལུགས་ལྟར་དངུལ་གྱི་ཉེས་ཆས་དང་ཉེས་མིང་འཕོག་སྲིད། དེར་བརྟེན་དེ་དོན་དགོངས་པར་བཞག་དགོས་པ་གལ་ཆེ།

གང་ལྟར་དེང་གི་དུས་སུ་ང་ཚོར་སྣང་བའི་ནག་པོ་ནི་ནག་པོ་རང་མིན་པ་དང། དཀར་པོ་ནི་དཀར་རྐྱང་མིན་པའི་རྙོགས་ཟིང་གི་འཇིག་རྟེན་དེའི་ཐོག་སྒེར་གྱི་བསམ་ཚུལ་ཞིག་གནད་དོན་ཞིག་ཐག་བཅད་མི་ཐུབ་ལ། ཐག་བཅད་པའི་འདོད་ཚུལ་ལ་ང་ཚོས་ངེས་ལེན་བྱེད་ཁག་པོ་ཆགས་ཡོད། དེར་བརྟེན་མཉེན་ཆས་ལ་རིན་པ་མ་སྤྲད་པར་བེད་སྤྱོད་བྱེད་ན་འགྲིགས་མིན་ནི་མི་རེ་ལ་བསམ་ཚུལ་རེ་ཡོད་ངེས་དེར་བརྟེན་ང་ཡང་ཁྱེད་ཀྱི་བསམ་ཚུལ་ལ་ཉན་འདོད་འདུག །

གལ་ཏེ་བསམ་ཚུལ་གསུངས་འདོད་ན། གཤམ་འོག་གི་མཆན་བཀོད་སའི་ནང་མཆན་བཀོད་རྒྱུ་མ་བརྗེད་རོགས།

འཛམ་གླིང་ཐོག་གློག་ཀླད་རིན་གོང་ཆུང་ཤོས་ཨ་སྒོར་ $9

 

འཛམ་གླིང་ཐོག་རིན་གོང་ཆུང་ཤོས་ཀྱི་གློག་ཀླད་དེའི་ཆེ་ཆུང་ནི་ ATM བྱང་བུ་ལས་ཀྱང་ཆུང་བ་ཡོད། ཨ་སྒོར་ $9 (རྒྱ་གར་སྒོར་ Rs. 575 ཙམ་)ལ་ཉོ་ཐུབ་པའི་གློག་ཀླད་དེ་ལ་ CHIP ཟེར་བ་དང་དེས་དྲ་མྱུལ་བྱེད་པ་དང། དཔར་དང་ཡིག་ཆ་བཟོ་བ། དེ་བཞིན་གློག་རྩེད་དང་གློག་བརྙན་བལྟ་བ་སོགས་ཅི་རིགས་བྱེད་ཐུབ་ཀྱི་ཡོད།

CHIP བཟོ་བསྐྲུན་བྱེད་མཁན་གྱིས་ཁྲོམ་རྭའི་ཐོག་འགྲེམ་ཚོང་ཆེད་མ་རྩ་ཨ་སྒོར་ $50,000 སྒྲུབ་རྒྱུའི་འཆར་གཞི་བྱས། འོན་ཀྱང་མ་འཇོག་གི་ལས་གཞི་འགོ་བཙུགས་ནས་དུས་ཚོད་ཐུང་ཐུང་ཞིག་གི་ནང་མ་འཇོག་ཨ་སྒོར་ $697,000 བྱུང་འདུག དེ་ནི་ཐོག་མའི་རྒྱལ་ཁ་ཞིག་ཡིན་ལ་ཁོང་ཚོའི་ལས་འཆར་དེ་ལ་ཕུགས་རྒྱང་གི་གཤོག་སྒྲོ་རྒྱས་པའི་སྔ་ལྟས་ཞིག་མཐོང།

སྤྱིར་བཏང་གློག་ཀླད་ཀྱི་གཙོ་འཁོར་འདི་ལ་རིན་གོང་ཆུང་ཆུང་ཡིན་ཀྱང། མངོན་ཆས་Monitor དང་། མཐེབ་གཞོང། ཙི་ཙི་ལྟ་བུའི་གློག་ཀླད་ཀྱི་ཆ་ལག་གཞན་རྣམས་སོ་སོས་ཉོ་དགོས་པའམ་ཡང་ན་གློག་ཀླད་རྙིང་པའི་ཆ་ལག་བེད་སྤྱོད་བྱས་ན་འགྲིག

གློག་ཀླད་གཙོ་འཁོར་དེའི་ནང་ Linux གྱི་རྒྱུད་ཁུངས་མ་ལག་བཅུག་ཡོད་པ་དང་། རྒྱུད་ཁུངས་མ་ལག་དེའི་ནང་ཡིག་ཆ་བཟོ་སྒྲིག་བྱེད་ཆེད་ LibreOffice དང་། གླུ་གཞས་དང་གློག་བརྙན་བལྟ་ཆས་ VLC སོགས་མཉེན་ཆས་མང་པོ་རང་སྒྲིག་ཡོད། གསོག་སྡེར་གྱི་སྟོང་ཆ་ཡོད་ན་དེའི་སྟེང་མཉེན་ཆས་གཞན་སྟོང་ཕྲག་ལྷག་ཕབ་ལེན་སྒྲིག་འཇུག་བྱེད་རྒྱུ་ཡོད་འདུག
གློག་ཀླད་དེ་ལ་ 1Ghz processor དང་ RAM=512, Storage=4GB ལས་མེད་པར་བརྟེན་གློག་བརྙན་བཟོ་སྒྲིག་གི་ལས་ཤུགས་ཆེན་པོ་དེ་འདྲ་བྱེད་མི་ཐུབ། ཡིན་ནའི་གཙོ་འཁོར་འདི་ལ་སོ་སྔོན་(bluetooth) གྱི་མཐུན་རྐྱེན་ཡོད་པར་བརྟེན་གློག་རྩེད་ལ་དགའ་མཁན་ཚོས་ཤུགས་ཆུང་བའི་གློག་རྩེད་རིགས་རྩེ་ཐུབ་རྒྱུ་ཡོད།

གློག་ཀླད་ཆུང་ཆུང་དེས་མི་ཚང་མའི་འདོད་བློ་སྐོང་མི་ཐུབ་ཀྱང་མི་ཚང་མར་འདེམས་ག་ཞིག་སྤྲད་ཡོད། གློག་ཀླད་དེ་འདི་ལོ་ 2015 ལོ་མཇུག་ཏུ་འཛམ་གླིང་ས་ཕྱོགས་གཞན་ལ་ཚོང་འགྲེམས་བྱེད་འཆར་ཡོད་འདུག

ཕྱི་ལོ་ 2012 ལོར་གློག་ཀླད་རིན་གོང་ཆུང་ཤོས་བཟོ་མཁན་ Raspberry Pi ཟེར་བ་དེ་རེད། གློག་ཀླད་ཆུང་ཆུང་དེ་ལ་ཨ་སྒོར་ $25-$35 བྱས་ཏེ་ Ebay ནང་ཉོ་རྒྱུ་ཡོད། དྲ་གནས་འདིར་གཟིགས། http://goo.gl/YVzLlM

འགྲེམས་སྟོན་གློག་བརྙན་ལ་གཟིགས།


དཔར་རིས།

CHIP དེ་ Monitor གསར་རྙིང་དང་མཐུད་རྒྱུ་ཡོད།

CHIP ནང་ Linux གི་རྒྱུད་ཁུངས་མ་ལག་དང་ LibreOffice, VLC སོགས་རང་སྒྲིག་ཡོད།

དགོས་མཁོའི་མཉེན་ཆས་སྟོང་ཕྲག་ཕབ་ལེན་བྱེད་རྒྱུ་ཡོད།

LibreOffice སྤྱད་དེ་རྒྱུན་པའི་ཡིག་ཆ་བཟོ་སྒྲིག་བྱེད་རྒྱུད་ཡོད། LibreOffice ནི་ Microsoft Office འདྲ་པོ་རེད།

དྲ་རྒྱའི་ཐོག་བཞུགས་ཐུབ་པ་དང་། དྲ་ཐོག་གི་ལས་རིགས་སྒྲུབ་ཐུབ།

གཟུགས་མཐོང་བརྙན་འཕྲིན་དང་མཐུད་དེ་གློག་རྩེད་རིགས་རྩེ་ཐུབ།

ཨ་སྒོར་ $49 ཅན་གྱི་ལག་ཐོག་གློག་ཀླད་ཞིག་ཡོད། དེ་ལ་མཐེབ་གཞོང་དང་། འཆར་ངོས་ 4.3 inch ཡོད། གློག་མེ་ཆུ་ཚོད་གསུམ་ལྷག་གདང་བའི་གློག་མེ་ 3000mAh ཡོད། འཆར་གཞི་ལྟར་ན་ཕྱི་ལོ་ 2016 གི་ལོ་དཀྱིལ་ཙམ་ལ་འགྲེམས་ཚོང་ཐུབ་པ་བྱེད་རྒྱུ་ཡིན་འདུག

Microsoft Sway

 
ཕྲ་མཉེན་ཚང་གིས་ཡིག་ཚང་མཉེན་ཆས་ཀྱི་ཁོངས་སུ་ Sway གསར་བཟོ་དང་ཕྱི་ལོ་ 2014 ཟླ་ 8 པའི་ནང་འགྲེམས་སྤེལ་བྱེད་ཡོད། མཉེན་ཆས་སམ་ཞབས་ཞུ་གསར་པ་དེ་ནི་ད་ཡོད་གློག་ཆས་ཡོད་དོ་ཅོག་གི་ནང་བེད་སྤྱོད་ཐུབ་པ་དང་། ཞབས་ཞུ་དེའི་དམིགས་བྱ་གཙོ་བོ་ནི། དུས་ཚོད་ཐུང་ཐུང་ནང་སློབ་ཁྲིད་ཀྱི་ནང་དོན་འགྲེལ་བརྗོད་ཡིག་ཆ་དང་། ཚོང་དང་ལས་གཞི་ཁག་གི་ལས་འཆར་འགྲེལ་བརྗོད་ཡིག་ཆ་རྣམས་ལས་ལྷ་པོ་ངང་བཟོ་ཐུབ་རྒྱུའི་མཐུན་རྐྱེན་བསྐྲུན་པ་ཞིག་ཡིན། བཟོས་ཟིན་པའི་འགྲེལ་བརྗོད་ཡིག་ཆ་དེ་དག་དྲ་ཐོག་འགྲེམས་སྤེལ་བྱེད་རྒྱུ་དང། གློག་ཆས་ཀྱི་འཆར་ངོས་སུ་དཀའ་ཚེགས་མེད་པར་སྟོན་ཐུབ།

ཕྲ་མཉེན་ཚང་དང་། outlook, hotmail སོགས་ཀྱི་ཁ་བྱང་ཡོད་ན། www.sway.com ནང་འཛུལ་ཐུབ་པ་དང་། ཡིག་ཆ་གསར་བཟོའི་མཐུན་རྐྱེན་ཆ་ཚང་འཛོམས་ཡོད། དྲ་ཚིགས་ཨ་མའི་ནང་མ་འཛུལ་གོང་ sway ཞབས་ཞུ་དེ་བེད་སྤྱོད་བྱེད་སྟངས་ཀྱི་བརྙན་ཟློས་ཐུང་ཐུང་ཁ་ཤས་ཡོད། དེ་དག་ལ་གཟིགས་ནའང་འགྲིག

Sway ཞབས་ཞུ་དེ་བེད་སྤྱོད་བྱེད་པའི་རིང་སྐྱོན་ཆ་ཆེ་ཤོས་ནི་བོད་ཡིག་ཡིག་འབྲུ་རྣམས་ཚགས་ཧ་ཅང་དམ་པོ་འདུག །དེས་ཡིག་འབྲུ་ཕན་ཚུན་འབྲེལ་ཏེ་ཀློག་ཁག་པོ་ཆགས་ཀྱི་འདུག ཞབས་ཞུ་དེ་ཐོག་མར་འགོ་བཙུགས་པ་ནས་ད་བར་ཡར་རྒྱས་མང་པོ་བཏང་ཡོད། ཞབས་ཞུ་གསར་པ་དེའི་མཐུན་རྐྱེན་མང་པོ་ཡོད་པ་དང་། ད་དུང་ལེགས་ཆའི་འགྱུར་བ་མང་པ་གཏོང་བཞིན་ཡོད།

གཤམ་འདིར་ sway སྤྱད་དེ་བཟོས་པའི་བོད་ཀྱི་དཔར་མཛོད་ཆུང་ཆུང་ཞིག་ཡིན། གཤམ་གྱི་ཡིག་ཆའི་ནང་གླུ་གཞས་ཉན་ཐུབ་པ་དང་། གློག་བརྙན་བལྟ་ཐུབ་པ། འདྲ་དཔར་སོགས་ཆེ་ཆུང་བཏང་རྒྱུ་ཡོད།

Sway ནང་ངོས་ཀྱི་སྒྲོམ་གཞི།





camScanner

 

དེར་ཁྱེད་ལ་ངོ་སྤྲོད་བྱེད་རྒྱུའི་མཉེན་ཆས་དེ་གུས་པས་ཟླ་ཤས་སྔོན་ནས་རྩོམ་བྲིས་ཟིན་ཀྱང་སྤེལ་རྒྱུ་ལུས་འདུག་པས་ལམ་སེང་བཟོ་བཅོས་ཏོག་ཙམ་བཏང་ནས་དེ་རིང་གཞི་ནས་བཀོད་པ་ཡིན།

CamScanner མཉེན་ཆས་འདི་ལོ་གཅིག་སྔོན་ངའི་གྲོགས་པ་ཞིག་གིས་ང་ལ་ཐོག་མར་ངོ་སྤྲོད་བྱས་བྱུང་། དེ་ནས་བཟུང་ངས་མཉེན་ཆས་དེར་དགའ་མོས་དང་བེད་སྤྱོད་ཤུགས་ཆེན་པོ་གཏོང་འགོ་བཙུགས་པ་ཡིན། མཉེན་ཆས་དེ་ད་ལྟ་ངའི་ཁ་པར་ནང་གལ་ཆེ་ཤོས་གཅིག་ཏུ་ཆགས་པ་དང་ནམ་ཡང་ཁ་འབྲལ་མྱོང་མེད། མཉེན་ཆས་དེའི་དམིགས་བྱ་གཙོ་བོ་ནི་སྒེར་གི་ཡིག་ཆ་དང་འཛིན་ཡིག་སོགས་བཤེར་འབེབ་བྱས་པ་ལྟར་ཉར་ཚགས་བྱེད་རྒྱུའི་མཐོན་རྐྱེན་ཞིག་རེད། གློག་ཀླད་དང་བཤེར་འབེབ་གཉིས་ལ་བརྟེན་མི་དགོས་པར། སྟབས་བདེའི་ལག་ཐོག་ཁ་པར་གྱི་པར་ཆས་དང་ CanScanner མཉེན་ཆས་དེ་གཉིས་ཀྱིས་ཡིག་ཆ་ཅི་རིགས་བཤེར་འབེབ་བྱས་ཐུབ།

མཉེན་ཆས་དེའི་ཁྱད་ཆོས།


  • མཉེན་ཆས་དེ་སྤྱད་ནས་ཁྱེད་ཀྱི་དཔེ་དེབ་ཧྲིལ་པོ་བཤེར་ཏེ་གློག་འཕྲུལ་དཔེ་དེབ་ལྟར་ཉར་ཚགས་དང་བལྟ་ཀློག་འགྲེམས་སྤེལ་སོགས་བྱེད་རྒྱུ་ཡོད།
  • བཤེར་འབེབ་བྱེད་པའི་སྐབས་མཚོན་མདངས་དང་དཀར་ཆ་བཟོ་དབྱིབས་སོགས་སྒྲིག་ཆོག
  • བཤེར་འབེབ་བྱས་ཟིན་པའི་ཡིག་ཆ་མང་པོ་ཆགས་ན་འཚོལ་བཤེར་བྱེད་རྒྱུ་ཡོད་པ།
  • བཤེར་འབེབ་ཟིན་པའི་ཡིག་ཆ་དེ་དག་གཞན་ལ་གཏོང་སྐབས་ PDF དང་ JPG རྣམ་པའི་ཐོག་བསྐུར་ཆོག
  • བཤེར་འབེབ་ཟིན་པའི་ཡིག་ཆ་ག་གེ་མོ་ཞིག་ཉེ་ཁྲིད་ཀྱི་དཔར་རྒྱག་འཕྲུལ་འཁོར་ནང་ Print བཤུ་ཐུབ་པ།
  • བཤེར་འབེབ་བྱས་པའི་ཡིག་ཆའི་ཐོག་བཟོ་བཅོས་བྱེད་རྒྱུ་ཡོད་པ།
  • བཤེར་འབེབ་བྱས་པའི་ཡིག་ཆ་རྣམས་དྲ་ཐོག་ཉར་གསོག་ཞབས་ཞུ་ཡོད་པ་སོགས་ཡོད།

དཔེ་མཚོན།

ཁྱེད་ཀྱི་ཡིག་ཆ་རྣམས་དྲ་ཐོག་ཏུ་གསོག་ཉར་ཐུབ་པའི་དཔེ་མཚོན་དུ། CamScanner སྤྱད་དེ་བཤེར་འབེབ་བྱེད་པའི་《བོད་ཡུལ་དུ་སངས་རྒྱས་བསྟན་པའི་དབུ་བརྙེས་ཚུལ་དང་། བསྟན་པའི་སྲོལ་གཏོད་པ། བསྟན་པ་དར་ཞིང་རྒྱས་པར་མཛད་པའི་སྐོར།》 ཞེས་པའི་ལེའུ་དེར་གཟིགས།  https://w103.camscanner.com/share/dixcK/0/w103s1aqj0qpw

མཉེན་ཆས་ཕབ་ལེན།

མཉེན་ཆས་དེ་གཞུང་འབྲེལ་དྲ་ཚིགས་ https://www.camscanner.com/user/download རྒྱུད་ལག་ཐོག་ཁ་པར་གྱི་རྒྱུད་ཁུངས་མ་ལག་ཚང་མའི་ཆེད་དུ་ཕབ་ལེན་བྱེད་རྒྱུ་ཡོད།

གཤམ་འདིར་ཕབ་ལེན་དུ་བཀོད་ཡོད་པ་ནི། ཨན་ཌོའི་མ་ལག་ཆེད་དུ་ཡིན་པ་དང་། ཁྱབ་བསྒྲགས་མེད་ཁར་མཐུན་རྐྱེན་ཆ་ཚང་འཛོམས་ཡོད་པ་དེ་ཡིན།

ཡིག་ཆ་ཆེ་ཆུང། 21.3mb
CamScanner

wylie unicode དྲ་ཐོག་བཏགས་ཆས།

 
དྲ་གནས། http://gdriv.es/nextfile

wylie ནི་བོད་ཀྱི་རིག་གཞུང་ཉམས་ཞིབ་བྱེད་མཁན་ནུབ་ཕྱོགས་མཁས་དབང་རྣམས་ཀྱིས་བེད་སྤྱོད་བྱེད་བཞིན་པའི་བོད་ཡིག་མིང་ཚིག་གམ་ཐ་སྙད་རྣམས་ནོར་འཛོལ་མེད་པར་དབྱིན་ཡིག་ལམ་ནས་ཡིག་བཏགས་བྱེད་ཐུབ་པའི་ཚད་ལྡན་གྱི་འགྲོ་སྟངས་ཞིག་རེད། wylie སྐོར་རྒྱས་པ་འདིར་གཟིགས། ཉེ་ཆར་གུས་པས་སྒེར་གྱི་ཆེད་དུ་ wylie མཐེབ་གཞོང་འགྲོ་སྟངས་སྤྱད་དེ་བོད་ཡིག་བཏགས་ཐུབ་པའི་དྲ་ཐོག་ཞབས་ཞུ་ཞིག་ཚོད་ལྟའི་ཐོག་བཟོས། Wylie བཏགས་ཆས་དེ་གློག་ཆས་ཡོངས་ཀྱི་ནང་ཁ་འབྱེད་ཐུབ་པ་དང་། བཏགས་ཆས་དེ་སྤྱོད་པར་དྲ་རྒྱའི་མཐུན་རྐྱེན་གཅིག་པོ་ཡོད་ན་འགྲིགས། བཏགས་ཆས་དེ་སྤྱོད་པར་དམིགས་བསལ་མཉེན་ཆས་གང་ཡང་མི་དགོས། ངས་དེ་སྒེར་གྱི་ཆེད་དུ་ཡིན་ཟེར་དགོས་དོན་ནི། གྲོགས་པོས་བོད་ཡིག་ལམ་ནས་འཕྲིན་ཐུང་རིགས་བལྟ་ཀློག་མི་ཐུབ་པ་རྣམས་ READER གྱི་སྡེ་ཚན་ནང་གཡུག་ (Paste) ནས་ཀློག་ཐུབ་པ་ཆགས་པ་དང་། གལ་ཏེ་བོད་ཡིག་ཐོག་ལན་སློག་དགོས་ན། TYPER སྡེ་ཚན་ནང་ wylie སྤྱད་དེ་བོད་ཡིག་བརྒྱག་གི་ཡོད། ཅི་སྟེ་ངའི་ཁ་པར་ནང་བོད་ཡིག་བཏགས་ཆས་ལེགས་པོ་མི་ཡོང་བས་སོ།

ངས་འདིར་ཁྱེད་ལ་དྲ་ཐོག་ཞབས་ཞུ་འདི་ངོ་སྤྲོད་བྱེད་དོན་ནི། གལ་ཏེ་ཁྱེད་ཀྱི་ཁ་པར་ནང་བོད་ཡིག་གི་དཀའ་ངལ་དེ་འདྲ་འཕྲད་ན། སྐབས་ཐོག་གི་ཐབས་ཤེས་དེ་སྤྱད་ཐུབ་པའི་རེ་བ་ཡོད། གལ་ཏེ་ wylie འགྲོ་སྟངས་མ་ཤེས་ན་ HELPER ཟེར་བའི་སྡེ་ཚན་ནང་འགྲོ་སྟངས་ཆ་ཚང་བསྟན་ཡོད། wylie འགྲོ་སྟངས་ཧ་ཅང་ལས་ལྷ་པོ་ཡིན་པར་བརྟེན། རིག་པ་འགྲིམས་ན་སྐར་མ་གསུམ་བཞི་ནང་བདེ་མྱུང་ངང་ཤེས་ཐུབ་པའི་ཁྱད་ཆོས་ལྡན། ཚོད་ལྟ་ཞིག་བྱེད་དང་།

དྲ་ཐོག་ཞབས་ཞུ་དེ་སྡེ་ཚན་གསུམ་དུ་དབྱེ་ཡོད།

སྡེ་ཚན་དང་པོ་ WRITER རེད། wylie འགྲོ་སྟངས་ཤེས་ན་དབྱིན་ཡིག་ abcd བཀོད་དེ་བོད་ཡིག་བཏགས་ཐུབ་ཀྱི་ཡོད། གཤམ་གྱི་རི་མོའི་ནང་གསལ།

སྡེ་ཚན་གཉིས་པ་ READER རེད། བོད་ཡིག་གི་དྲ་ཚིགས་དང་འཕྲིན་ཐུང་སོགས་ལེགས་པོ་མི་འཆར་བ་རྣམས་དེའི་ཐོག་གཡུག་ན་བོད་ཡིག་བལྟ་ཀློག་ཐུབ།
སྡེ་ཚན་གསུམ་པ་ HELPER (མཐེབ་གཞོང་འགྲོ་སྟངས) སྡེ་ཚན་དེའི་ནང་ wylie ཇི་ལྟར་སྤྱོད་དགོས་མིན་ནམ་བཏགས་ཐབས་གསལ་པོ་བཀོད་ཡོད།

གསལ་བཤད།

wylie unicode བཏགས་ཆས་འདིས་སྤྱིར་བཏང་གི་བོད་ཡིག་ཆ་ཚང་བཏགས་ཐུབ། སྔགས་ཡིག་རིགས་སྐབས་འབབ་བརྒྱག་མི་ཐུབ་པ་ཡོང་སྲིད། ངས་མུ་མཐུད་སྔགས་ཡིག་རིགས་ཀྱང་ཆ་ཚང་བཏགས་ཐུབ་པའི་འབད་བརྩོན་བྱེད་བཞིན་ཡོད། ཐོན་རིམ་རྗེས་མའི་ནང་སྔགས་ཡིག་བཏགས་ཐུབ་པ་ཆགས་ངེས།

Newsify

 

རྩོམ་ཡོང་ཁུངས། བསོད་ནམས་དཔལ་ལྡན། tehorsonam.blogspot.com


མི་རྣམས་ཀྱི་འཚོ་བ་སྟབས་ཇེ་བདེ་དང་ལས་དོན་གང་མགྱོག་བྱེད་རྒྱུ་དགའ་བའི་མུར་འཕྲུལ་རིགས་སོགས་ཀྱིས་འདོད་བློ་དེ་བཀང་ཨེ་ཐུབ་ཀྱིས་འབད་པ་ཤུགས་ཆེན་བྱེད་བཞིན་ཡོད། དེང་གི་གློག་ཀླད་དང་ཁ་པར། མཉེན་ཆས་རེ་རེས་ཆེས་འབད་དགོས་ས་དེའང་སྟབས་ཇེ་བདེ་དང་སྣ་འཛོམས་རང་བཞིན་ཁྱབ་ཁོངས་རྒྱ་ཆེ་ཡོང་ཐབས་དེ་ཡིན་ཞིང་། འདིའི་ཐད་ནས་གྲུབ་འབྲས་མི་དམན་པ་རེའང་ཐོབ་བཞིན་ཡོད།

ངས་ད་ཐེངས་བཤད་འདོད་པ་ནི་ངེད་ཅག་བོད་པ་ཞིག་ལ་མཁོ་གལ་ཆེ་ཞིང་རང་ཉིད་ཀྱི་སྟབས་བདེའི་འཚོ་བར་ཕན་ཐོགས་ཡོད་པའི་སྐོར་ཞིག་ཡིན་ཏེ། ཁྱེད་ཀྱིས་རང་ཉིད་ཀྱི་ཁ་པར་ལས་ཉིན་རེ་གསར་འགྱུར་སོགས་ལྟ་ཀློག་བྱེད་བཞིན་ཡོད་ངེས་ལ། དྲ་ངོས་རེ་རེ་ན་ཉུལ་མི་དགོས་པར་མཉེན་ཆས་གཅིག་ལས་ཆེས་གསར་པའི་གསར་འགྱུར་དེ་ཀློག་ཐུབ་པའི་མཉེན་ཆས་དེ་ཁྱེད་ཀྱིས་བཀོལ་སྤྱོད་བྱེད་བཞིན་ཡོད་ངེས།

ཨན་ཌོ་མ་ལག་ཅན་གྱི་ཁ་པར་རིགས་སུ་Rssམཉེན་ཆས་དེ་གྷོ་གྷུལ་ཚོང་གཉེར་ཁང་གིས་བཏོན་པའི་Feedlyདེ་ཆེས་ལེགས་ཤོས་དེ་ཡིན་ཟེར་ཆོག འོན་ཀྱང་iOSམ་ལག་ཅན་གྱི་ཀུ་ཤུ་ཁ་པར་ནང་དུFeedly དེས་ཁོང་ཁྲོ་ཡང་ཡང་སློང་ཡོང་གི་འདུག མཉེན་ཆས་འདིས་གསར་འགྱུར་ནང་འཐེན་བྱས་ཟིན་རུང་སླར་ཡང་ལྟ་ཐེངས་རེར་དྲ་བ་མེད་ན་ནང་འཐེན་བྱས་ཟིན་དེས་ཕན་ཅི་ཡང་ཐོགས་མེད་པར་སླར་ནང་འཐེན་བྱེད་རྒྱུ་རེད། དེར་བརྟེན་འཚོལ་ཞིབ་ཀྱིས་གསར་རྙེད་བྱུང་བ་ནི་Newsifyའདི་ཡིན་ལ་འདི་ནས་ཁྱེད་ཀྱིས་གསར་འགྱུར་ནང་འཐེན་བྱས་ཟིན་ན་སླར་དྲ་བ་མེད་ནའང་ནང་འཐེན་བྱས་ཟིན་པའི་གསར་འགྱུར་ལྟ་ཀློག་བྱེད་ཐུབ་པས་ཁྱེད་ཀྱི་དྲ་དངུལ་བསྲི་ཚགས་དང་བརྡ་རྟགས་མེད་པའང་སྐྱོ་བའི་སྐབས་ལའང་གསར་འགྱུར་ལྟ་ཀློག་བྱེད་ཐུབ་པའི་དགེ་མཚན་ཡོད། ཁྱེད་ཀྱིས་ཚོད་ལྟ་བྱོས་དང་གྲུབ་འབྲས་མིག་མཐོང་ཡོང་ཐུབ།

མཉེན་ཆས་འདིའི་དམིགས་བསལ་ཁྱད་ཆོས་ཁག་ནི།

  • Feedly དང་ཐད་ཀར་འབྲེལ་ཏེ་གསར་འགྱུར་བསྡུ་རུབ་དང་བལྟ་ཀློག་བྱེད་པའམ། ཡང་ན་ Feedly མེད་མཁན་ཚོས་ iCloud ཁ་བྱང་སྤྱད་དེ་གསར་འགྱུར་ལེན་ཐུབ་པ།
  • གསར་འགྱུར་དྲ་ཚིགས་ལྟར་རྩོམ་ཡིག་རྣམས་རེའུ་མིག་ལྟར་སྒྲིག
  • གསར་འགྱུར་གསར་པ་རྣམས་རྒྱབ་ལྗོངས་སུ་གསོག་ཉར་དང་སྔོན་བརྡ་གཏོང་བ།
  • ཕབ་ལེན་ཟིན་པའི་གསར་འགྱུར་རྣམས་དྲ་རྒྱ་མེད་ཀྱང་བལྟ་ཀློག་ཐུབ་པ།
  • འཆར་ངོས་ཀྱི་འོད་མདངས་ཆུང་དུ་གཏོང་སྟེ་མཚན་མོར་བལྟ་ཀློག་བདེ་བ།
  • རྩོམ་ཡིག་དང་གསར་འགྱུར་འཚོལ་བཤེར་བྱེད་རྒྱུ་ཡོད་པ།
  • ཡིག་འབྲུ་ཆེ་ཆུང་སྒྲིག་ཐུབ།
  • བལྟ་ཀློག་ཟིན་པ་རྣམས་ལ་རྟགས་རྒྱག་སྟེ་ཚར་བའི་ཁུངས་སུ་འཇོག་པ།
  • གསར་འགྱུར་གསར་རྙིང་གོ་རིམ་འགོ་ལྡོག་བྱེད་རྒྱུ་ཡོད་པ།
  • གསར་འགྱུར་ག་གེ་མོ་ཞིག་སྤྱི་ཚོགས་དྲ་ལམ་དུ་ཁྱབ་སྤེལ་གཏོང་རྒྱུའི་མཐུན་རྐྱེན་ཡོངས་སུ་ཚང་བ།
  • གསར་འགྱུར་ག་གེ་མོ་ཞིག་གློག་འཕྲིན་རྒྱུད་གཞན་ལ་གཏོང་ཐུབ་པ་སོགས་མཐུན་རྐྱེན་མང་དག་འཛོམས་འདུག

མཉེན་ཆས་ཕབ་ལེན།

མཉེན་ཆས་དེ་ནི་ iPhone, iPad སོགས་ཀྱི་ཆེད་དུ་ཡིན།
ཕབ་ལེན་བྱེད་དགོས་ན། Newsify གི་གཞུང་ཕྱོགས་དྲ་ཚིགས་སུ་གཟིགས་པར་འཚལ།
དྲ་གནས། http://newsify.co/

ཀུ་ཤུའི་མ་ལག་ iOS 9 ཐོན་ལ་ཉེ།

 

རྩོམ་ཡོང་ཁུངས། ཕུན་དབང། བོད་མཉེན། Tibetsoft


ཀུ་ཤུ་སྤྱི་གཉེར་ཁང་གི་གཞུང་ཕྱོགས་ཀྱི་དྲྭ་བ་རུ་ཀུ་ཤུའི་མ་ལག་གསར་བ་ iOS 9 ཐོན་ལ་ཉེ་བའི་གནས་ཚུལ་དང་། དེའི་ཁྱད་ཆོས་དང་བྱེད་ནུས་གསར་བ་དག་བསྒྲགས་འདུག གཤམ་དུ་ iOS དགུ་བའི་ཁྱད་ཆོས་གསར་བ་འགའ་ཞིག་ངོ་སྤྲོད་རགས་བསྡུས་ཤིག་ཡོད།

iOS དགུ་བའི་ནང་ཉིན་རྒྱུན་སྤྱོད་པའི་མཉེན་ཆས་འགའ་ཞིག་ཇེ་ལེགས་སུ་བཏང་འདུག་སྟེ། དཔེར་ན། འཕྲིན་ཐུང་དང་། འཚོལ་བཤེར། ཟིན་བྲིས། ས་ཁྲ་སོགས་རེད།

༈ iOS དགུ་བའི་མ་ལག་དེ་དེ་སྔོན་གྱི་མ་ལག་གཞན་ལས་ཆུང་བ་བཟོས་འདུག iOS 8.3 ལྟ་བུ་ཡིན་ན་ཆེ་ཆུང་ལ་ 4.58GB ཡོད་པ་ལྟ་བུ་རེད། འོན་ཀྱང་ iOS དགུ་པར་ཆེ་ཆུང་ལ་ 1.3GB ལས་མེད་འདུག

༈ iOS དགུ་བ་དེ་ཀུ་ཤུ་ཁ་པར་ནང་དུ་གློག་རྫས་ཀྱི་ཚེ་ཚད་ཇེ་རིང་དུ་བཏང་ཡོད་ཟེར།

༈ iOS དགུ་བའི་ནང་སྔོན་འཇུག་བྱས་ཡོད་པའི་ཟིན་བྲིས་འབྲི་དེབ་དེའི་ནང་དུ་བྱེད་ནུས་གསར་བ་འགའ་ཞིག་བསྣན་ཡོད་ལ། ང་ཚོའི་རང་རང་གི་ཟིན་བྲིས་དག་མཉེན་ཆས་གང་དུའང་མཉམ་སྤྱོད་བྱེད་ཐུབ་ཟེར་གྱི་འདུག

༈  CarPlay ཟེར་བའི་རླངས་འཁོར་གྱི་གཞས་སྒམ་དང་ལག་ཐོག་ཁ་པར་གཉིས་དབར་སྐུད་མེད་འབྲེལ་མཐུད་བྱེད་རྒྱུའི་མཐུན་རྐྱེན་གསར་པ་སྦྱར་ཡོད། མཐུན་རྐེྱན་དེས་ཁ་པར་ནང་གི་གཞས་ཐད་ཀར་རླངས་འཁོར་གྱི་གཞས་སྒམ་ནང་གཏོང་་ཐུབ་ཀྱི་ཡོད་ལ། མི་གཞན་གྱི་ཁ་པར་སླེབས་སྐབས་རླངས་འཁོར་ནང་ཐད་ཀར་སྐད་ཆ་བཤད་པ་ལས་ལག་ཐོག་ཁ་པར་ལ་ལག་པ་འཆང་མི་དགོས་པ་བཟོས་འདུག

༈ iOS དགུ་བའི་ནང་དུ། Siri ལ་འཚོལ་བཤེར་ནུས་པ་ཇེ་མང་དང་བཙལ་བའི་མཇུག་འབྲས་དག་མཉེན་ཆས་དང་། འབྲེལ་གཏུགས་མི་སྣ། ཉེ་འཁོར་གྱི་ས་གནས། དྲྭ་ཐོག་རྙེད་དོན་སོགས་རིགས་བཀར་དེ་ཡོད་ཟེར།

༈ iOS དགུ་བ་དེ་ iPad ཡི་ནང་དུ་ཐུན་མིན་ཁྱད་ཆོས་གསར་པ་ཞིག་ཡོད་པ་ནི། འདི་སྤྱོད་སྐབས་དེ་སྤྱོད་པ་ཟེར་བ་དེ་རེད། དེ་ནི་དཔེར་ན་ཁྱེད་ཀྱིས་དྲྭ་མྱུལ་བྱེད་སྐབས་ངོ་དེབ་བམ་སྐད་འཕྲིན་སོགས་ལའང་ལྟ་ཆོག་པ་ཡིན་ཏེ། མཉེན་ཆས་གཉིས་དུས་མཉམ་དུ་བཀོལ་ཐུབ་པ་དེ་རེད།

༈ iOS དགུ་བ་དེ་ཡང་ཕལ་ཆེར་ཀུ་ཤུའི་སྒྲིག་ཆས་ཡོངས་ལ་ནང་འཇུག་ཆོག་ས་རེད།  ཀུ་ཤུ་ 4S ནས་ 6 Plus དང་། iPad mini ནས་ iPad Air 2 དང་། iPod touch ལྔ་བ་བཅས་ལ་རྒྱབ་སྐྱོར་ཡོད་དོ།།

    iOS དགུ་བའི་གནས་ཚུལ་རྒྱས་པར་བལྟ་ན་ཀུ་ཤུའི་གཞུང་ཕྱོགས་ཀྱི་དྲྭ་བ་ལས་མ་རྩོམ་ལ་བལྟ་ཆོག