ཁུག་དམར་ཟེར་ན་ཅི་རེད།

 

རྩོམ་ཡིག་སྤེལ་མཁན། སྲོང་བཙན། www.tehorsonam.com

དེང་སྐབས་ཁུག་དམར་ཟེར་ནས་མི་མང་པོས་ག་ས་གང་དུ་གླེང་བཞིན་འདུག་པས་ངེད་ཀྱིས་ཀྱང་ཤེས་རྟོགས་རེ་བྱས་མོད། དྲ་ཐོག་ཏུ་ཁུག་དམར་སྤྱོད་པའི་ཉེན་ཚབས་ཀྱང་གླེང་ནས་ཡང་སྙིང་ཁུག་དམར་ཇི་ལྟར་སྤྱོད་དགོས་པ་དང་དེའི་དགེ་མཚན་གླེང་མཁན་གཅིག་ཀྱང་མ་མཐོང་། ཁུག་དམར་ནི་དྲ་ཇག་ཚོས་ཆེད་དུ་རྐུ་ཇག་བྱེད་པའི་ལག་ཆ་ཞིག་ཡིན་སྙམ་པ་འདུག

མ་གཞི་ངེད་ཅག་བོད་ལ་ཆ་འཕྲིན་རིག་གནས་ཐད་རྒྱུས་ངལ་ཉུང་ཞིང་འདིའི་ཐད་ལག་རྩལ་བ་ཆེས་ཉུང་བ་ཙམ་མ་ཟད་སྤྱི་ཚོགས་ཀྱི་དགོས་མཁོ་ཆེ་བའི་དྲ་བའི་རིགས་ཇི་ལྟར་བཀོལ་སྤྱོད་དགོས་པའི་བརྙན་རིས་དང་པར་རིས་ཡིག་ཆ་སོགས་ཧ་ལམ་མེད་ཚད་དུ་འདུག ཨིན་ཡིག་དང་རྒྱ་ཡིག་སོགས་ཀྱི་སྐད་རིགས་ཁག་གི་ཐོག་ཏུ་ནི་རིང་ཐུང་སྣ་ཚོགས་དང་ཡག་ཉེས་ཅི་རིགས་ཅན་གྱི་ཡིག་ཆ་དང་བརྙན་རིས་སོགས་ཧ་ཅང་ཡག་པོ་དེ་འདྲ་འབེལ་འབེལ་ལྷུག་ལྷུག་ཡོད་སྟབས་ཆེད་དུ་སློབ་སྦྱོང་བྱེད་འགྲོ་མི་དགོས་པར་ཧ་ཅང་སྟབས་བདེ་ངང་ནང་སྦྱོང་བྱེད་ཆོག མཐའ་ན་ཀུ་ཤུ་ཁ་པར་ངོས་ཀྱི་གསང་ཚིག་ཇི་ལྟར་བཟོ་དགོས་སམ་ཞེས་དྲི་བ་རེ་དྲིས་ན་ལན་སྟོང་ཕྲག་ལྷག་རྙེད་ཐུབ་ཀྱི་ཡོད།

བྱ་དངོས་ཇི་ལྟར་ཡིན་རུང་བཟང་ངན་གྱི་ངོས་གཉིས་ཡོད་ལ་དེ་མཚུངས་བཞིན་མིའི་རིགས་ཀྱིས་ལྟ་སྟངས་ཀྱང་ཡག་གཙོག་གཉིས་ཀ་འཛིན་པས་གཏན་ནས་སྐྱོན་གྱིས་མ་གོས་པར་ཡོད་དཀའ། དེར་བརྟེན། སྐྱོན་ཕྱོགས་ཁོ་ནར་གླེང་ནས་དགེ་མཚན་བརྗོད་དཀའ་བ་དག་སྣང་མེད་བསྐྱུར་འཇོག་དང་སྤྱི་ཚོགས་སུ་མཁོ་རྒྱུག་དགོས་ངེས་ཅན་དག་རྒྱང་ཕུད་དུ་བཏང་ན་དེང་རབས་ཀྱི་རྗེས་ཆོད་མི་ཐུབ་པ་ཙམ་གྱིས་ག་ལ་ཚད་དེ་ནམ་ཡང་ལས་ཚབས་ཆེ་ཞིང་འབབ་རྒྱུ་ཉུང་བའི་ལས་ཀ་ཞིག་ཏུ་འགྱུར་རྒྱུ་རེད། 

ཁུག་དམར་ནི་སྐད་འཕྲིན་བཟོ་ཚང་ཁང་གིས་གསར་དུ་བཟོས་ཏེ་སྐད་འཕྲིན་བརྒྱུད་ནས་དངུལ་མཁོ་གཏོང་བྱེད་ཆོག་པ་ཞིག་ཡིན། འདིས་ནི་དངུལ་ཁང་དུ་སྐྱོད་མི་དགོས་པར་དངུལ་བྱང་ནང་གི་སྒོར་མོ་དག་ཁུག་དམར་བརྒྱུད་ཕན་ཚུན་གཏོང་རེས་བྱེད་པ་དང་། ཁུག་དམར་ནས་དངུལ་བྱང་དུ་བླངས་ཏེ་ཉར་ཚགས་བྱེད་ཆོག་པ་ཞིག་རེད། ཁུག་དམར་ནང་གི་སྒོར་མོ་བཏང་སྟེ་མགྲོན་ཁང་སྔོན་གླ་དང་མེ་འཁོར་དང་གནམ་གྲུའི་འཛིན་བྱང་གསར་ཉོ། དྲ་ཐོག་གི་ཅ་དངོས་མངགས་ཉོའང་བྱེད་ཆོག་གི་འདུག ད་དུང་སྤྱོད་སྒོ་ཇེ་ཆེར་འགྲོ་རྒྱུ་ནི་བཤད་མི་དགོས་ལ་ཉིན་ཞིག་ཁ་པར་ལག་ཏུ་ཡོད་ཚེ་དངུལ་ཁུག་དང་དངུལ་དམར་ཞིག་བཀོལ་དགོས་དོན་མེད་པར་ཁ་པར་ནང་གི་ཨང་གྲངས་འགའ་ཕར་སྐུར་ཚུར་སྐུར་བྱེད་དེ་ལས་དོན་ལེགས་འགྲུབ་བྱེད་ཆོག་པ་ནི་དུས་ཚོད་སྔ་ཕྱི་ཙམ་ལས་ཡོང་ངེས་རེད།

འོན་ཀྱང་དྲ་ཇག་འགས་ཁུག་དམར་ནང་གི་དངུལ་རྐུ་ཐབས་བྱེད་སྲིད་ལ་དེ་ནི་ཁྱིམ་དུ་རྐུན་མ་འཛུལ་ཏེ་དངུལ་དམར་རྐུ་ཐབས་བྱེད་པ་དང་གཅིག་མཚུངས་བཞིན་ཡིན་པས་རྐུན་འགོག་ཐབས་ལམ་ཡང་དེ་མཚུངས་བཞིན་གནང་དགོས་པ་ནི་བཤད་མེད་རེད། དྲ་ཇག་ལ་འཇིགས་ཏེ་ཁུག་དམར་མི་སྤྱོད་པ་དང་རྐུན་མ་ཞེད་ནས་དངུལ་མི་ཁུར་བར་ཁྲོམ་དུ་སོང་བ་ཁྱད་ཅིག་མེད་པས། ཁྱེད་རང་ལག་སྟོང་གིས་ཁྲོམ་ནས་ཅི་ཡང་ཉོ་མི་ཐུབ་པར་ཁྱིམ་དུ་སྟོང་ལོག་རྒྱག་རྒྱུ་རང་རེད། འདི་ནི་མི་སྤྱང་པོའི་བྱེད་ཐབས་ཤིག་ཡིན་ནམ་ལྐུག་པའི་ལས་ཀ་ཞིག་ཡིན་ཁྱེད་ཀྱིས་ཞིབ་ཏུ་བསམ་བློ་ཐོངས།
  • (དྲ་ཇག=དྲ་ཇག་ནི་དྲ་བའི་ཐོག་ཏུ་ཐབས་ལམ་འདྲ་མིན་སྤྱད་ནས་དངུལ་རྐུ་བ་དང་མི་སྒེར་གྱི་གནས་ཚུལ་རྐུ་ཇག་བྱེད་པའི་རིགས་ལ་གོ། 
  • (ཁུག་དམར།=ཁུག་དམར་ནི་རྒྱ་ཡིག་གི(钱包)ནས་བསྒྱུར་བ་ཞིག་རེད།)


ཕྲ་མཉེན་ཚང་གིས་སྐར་ཁུང་བརྒྱད་པར་ལག་རྩལ་རྒྱབ་སྐྱོར་མེད་ཟེར།

 

ཕྱི་ལོ་ 2016 ཟླ་ 1 ཚེས་ 12 རེས་གཟའ་མིག་དམར་ཉིན་ཕྲ་མཉེན་ཚང་གིས་གཞུང་འབྲེལ་གསལ་བསྒྲགས་ལྟར་ན་ལོ་གསུམ་ལས་འཁོར་མེད་པའི་སྐར་ཁུང་གི་རྒྱུད་ཁུངས་མ་ལག་ཨང་བརྒྱད་པ་ (Window8) དང། དྲ་མྱུལ་མཉེན་ཆས་ IE7,IE8,IE9,IE10 བཅས་ལ་དེ་ཉིན་ནས་ཕྲ་མཉེན་ཚང་གི་ལག་རྩལ་རྒྱབ་སྐྱོར་དང་ཉེན་སྲུང་མཐུན་རྐྱེན་གསར་པ་མི་སྦྱོར་ཟེར།

དེར་བརྟེན་ད་ལྟའང་སྐར་ཁུང་བརྒྱད་པ་བེད་སྤྱོད་གནང་མཁན་ཡོད་ན། དེ་དག་སྐར་ཁུང་བརྒྱད་ཚག་གཅིག་དང་། ཡང་ན་སྐར་ཁུང་བཅུ་པའི་ཐོག་རིམ་སྤར་གནང་དགོས་པའི་ལམ་སྟོན་བྱས་ཡོད། ཕྲ་མཉེན་ཚང་གིས་སྐར་ཁུང་བརྒྱད་པ་དེ་ལྟར་རྒྱང་ཕུད་གཏོང་དགོས་དོན་གཙོ་བོ་ནི། སྐར་ཁུང་བརྒྱད་པར་སྔ་མ་ནས་སྒྲིག་བཀོད་ལ་སྐྱོན་ཆེན་པོ་ཡོད་པ་དང་། དེ་སེལ་ཆེད་སྐར་ཁུང་བརྒྱད་ཚག་གཅིག་དམིགས་བཀར་དུ་བཟོས་ཡོད། མ་ཟད་སྐར་ཁུང་བརྒྱད་པ་དེ་གློག་ཀླད་དང་། ཊེ་བྷེ་ལེཊ་(tablet) སོགས་ཀྱི་ནང་ཡག་པོ་འགྲོ་གི་མེད། གལ་ཏེ་སྐར་ཁུང་བརྒྱད་པར་བཟོ་སྒྲིག་དང་བསྐྱར་བཅོས་བྱེད་དགོས་ན། དེ་ནི་ངལ་བ་འཕར་མ་ཞིག་དང། དོན་མེད་དུས་ཚོད་ཆུད་ཟོས་འགྲོ་རྒྱུ་གཞི་ཁོ་ན་ལས་མ་འདས།

སྐར་ཁུང་བརྒྱད་ཚག་གཅིག་ཐོག་སྤར་མཁན་ཚོར་ཕྲ་མཉེན་ཚང་ནས་ཕྱི་ལོ་ 2023 བར་ལག་རྩལ་གྱི་རོགས་སྐྱོར་ཐོབ་ཀྱི་ཡོད་པ་དང་། སྐར་ཁུང་བཅུ་པའི་ཐོག་རིམ་སྤར་གནང་མཁན་ཚོར་ཕྱི་ལོ་ 2025 བར་ཕྲ་མཉེན་ཚང་གི་ལག་རྩལ་རོགས་སྐྱོར་ཐོབ་ཀྱི་འདུག

སྐར་ཁུང་བརྒྱད་པ་དང་དྲ་མྱུལ་མཉེན་ཆས་  IE7,IE8,IE9,IE10 རང་འཇག་བེད་སྤྱོད་བྱེད་མཁན་ཡོད་ན། རྗེས་ཕྱོགས་དྲ་ཐོག་ཀྱི་ཉེན་སྲུང་དང་། སྐར་ཁུང་མ་ལག་གི་བཀོད་སྒྲིག་ལ་དོ་ཕོག་ཡོང་སྲིད་པ་ཞིག་ཆགས་ཡོད།

མིང་ཚིག

Service or Support / ལག་རྩལ་ཞབས་ཞུ།
Microsoft / ཕྲ་མཉེན་ཚང་།
Window / སྐར་ཁུང་།
Web Browser / དྲ་མྱུལ་མཉེན་ཆས།

FAT32 དང་ NTFS, exFAT བཅས་ལ་ཁྱད་པ་གང་ཡོད།

 

FAT32 དང་ NTFS, exFAT གསུམ་ནི་སྐར་ཁུང་མ་ལག་གི་ཡིག་ཆའི་རྒྱུད་ཁོངས་ཡིན། ཡིག་ཆའི་རྒྱུད་ཁོངས་ཟེར་བ་ནི། གློག་ཀླད་ནང་གི་ཡིག་ཆ་རྣམས་གསོག་སྡེར་ནང་ཇི་ལྟར་ཉར་གསོག་དང་གནས་དགོས་པའི་སྒྲིག་གཞི་ཞིག་ཡིན། ཡིག་ཆའི་རྒྱུད་ཁོངས་གིས་གློག་ཀླད་ནང་ཡོད་པའི་ཡིག་ཆ་དང་ཡིག་ཁུག མཉེན་ཆས་སོགས་ཀྱི་བྱ་འགུལ་དང་། སྒྲིག་རིམ། འབྲེལ་མཐུད་བྱེད་སྟངས་སོགས་ལ་སྟངས་འཛིན་བྱེད་ཀྱི་ཡོད།

མཐེབ་སྡེར་(Pen Drivve)དང་དང་ཕྱི་གསོག་སྲ་སྡེར་(external Hard Disk)ཇི་འདྲ་ཞིག་སྐར་ཁང་རྒྱུད་དེ་གཙང་གསུབ་ (Format) གཏོང་དགོས་རིགས་སྐར་ཁུང་གིས་འདེམས་ག་གསུམ་སྤྲོད་ཀྱི་ཡོད། དེ་དག་ནི་གསོག་སྡེར་གྱི་ཡིག་ཆའི་རྒྱུད་ཁོངས་ NTFS ཐོག་དང་ FAT32 ཡང་ན་ exFAT གསུམ་གང་རུང་གཅིག་ལ་འཇོག་རྒྱུ་དེ་ཡིན། སྐར་ཁུང་གིས་འདེམས་ག་དེ་གསུམ་འཇོག་ཡོད་པ་ལས་དེ་ལ་དམིགས་བསལ་གྱི་འགྲེལ་བརྗོད་མེད། རྒྱུན་གཏན་གློག་ཀླད་ཐོག་ལས་ཀ་བྱེད་མཁན་ཞིག་ལ་ཡང་ཡང་འཕྲད་རྒྱུ་ཡོད་པའི་ཚིག་དེ་གསུམ་ལ་ང་ཚོས་རྒྱུད་མངའ་རོབ་ཙམ་ལོན་འདོད་ན། གུས་པས་གཤམ་ལ་ཡིག་ཆའི་རྒྱུད་ཁོངས་དེ་དག་རེ་རེའི་ཁྱད་ཆོས་དང་དེ་ཚོའི་ཁྱད་པར་གང་ཡོད་གོ་བདེ་དོན་བསྡུས་ཞིག་གཤམ་ལ་ཆད་པར་བྱ།

FAT32

FAT32 ནི་ཡིག་ཆའི་རྒྱུད་ཁོངས་རྙིང་གྲས་ཞིག་ཡིན་པ་དང་སྐར་ཁུང་ 95 སྐབས་བཟོས་པ་ཞིག་ཡིན། དེའི་གོང་གི་སྐར་ཁུང་ཐོན་སྔ་བ་རྣམས་ཡིག་ཆའི་རྒྱུད་ཁོངས་ FAT16 ཐོག་བཟོས་ཡོད། ཡིག་ཆའི་རྒྱུད་ཁོངས་འདི་ལ་ལེགས་ཉེས་ཀྱི་ཆ་གཉིས་ཀ་ལྡན་ཡོད། ཡིག་ཆའི་རྒྱུད་ཁོངས་རྙིང་པ་ཡིན་པ་བརྟེན་སྐར་ཁུང་95 ནས་ད་ལྟ་བར་བྱུང་བའི་སྐར་ཁུང་ཚང་མས་ངོས་འཛིན་ཐུབ་པ་དང་། མཐེབ་སྡེར་དང་སྲ་སྡེར་ཇི་འདྲ་ཞིག་ FAT32 ཡིན་ཕྱིན་གློག་འཕྲུལ་ཚང་མའི་ནང་ཁ་འབྱེད་ཐུབ་ཀྱི་ཡོད།

ཡིག་ཆའི་རྒྱུད་ཁོངས་དེའི་སྐྱོན་ཆ་ནི། སྲ་སྡེར་ཞིག་ FAT32 བསྒྱུར་ཟིན་ན། སྲ་སྡེར་དེའི་ཐོག་ཡིག་ཆ་གཅིག་ལ་ 4GB སྒང་ལ་ཡོད་ན་ཉར་གསོག་མི་ཐུབ་པ་དང། གསོག་སྡེར་ཞིག་ལ་ཁྱོན་ཡོངས་ཀྱི་གཤོང་ཚད་ 2TB ལས་མེད། མ་ཟད་ཡིག་ཆའི་རྒྱུད་ཁོངས་དེའི་ཐོག་ཡིག་ཆའི་དབང་ཚད་སྒྲིག་རྒྱུའི་འདེམས་ག་སོགས་གང་ཡང་མེད། དེར་བརྟེན་ཡིག་ཆའི་རྒྱུད་ཁོངས་དེ་ FAT32 ཡིན་པའི་གསོག་སྡེར་ནང་གི་ཡིག་ཆ་འཕྲོག་བརླག་འགྲོ་སླ་བ་དང་། བསྐྱར་གསོའི་ནུས་པ་མེད།

མདོར་བསྡུས་ན་བཤད་ན། FAT32 བྱས་པའི་མཐེབ་སྡེར་དང་སྲ་སྡེར་རྣམས་གློག་ཀླད་རིགས་ཚང་མའི་ནང་ཁ་འབྱེད་ཐུབ། འོན་ཀྱང་ཡིག་ཆ་གཅིག་ལ་ 4GB ལས་ཆེ་བ་ཡོད་ན་གསོག་སྡེར་ནང་ཉར་མི་ཐུབ། སྲ་སྡེར་དེའི་སྤྱིིའི་གཤོང་ཚད་མཐོ་ཤོས་ 2TB ལས་མེད།

NTFS

NTFS ནི་སྐར་ཁུང་ཚང་གིས་དེང་སང་བེད་སྤྱོད་བྱེད་བཞིན་པའི་སྲ་སྡེར་གྱི་ཡིག་ཆའི་རྒྱུད་ཁོངས་ཅིག་ཡིན། སྐར་ཁུང་ Vista, 7, 8, 8.1, 10 བཅས་ཀྱ་རྩིས་འཁོར་གྱི་ཡིག་ཆའི་རྒྱུད་ཁོངས་ནི་ NTFS ཐོག་འཇོག་དགོས་ཀྱི་ཡོད། ཡིག་ཆའི་རྒྱུད་ཁོངས་འདི་ལ་གློག་ཀླད་ནང་ཡོད་པའི་ཡིག་ཆ་དང་ཡིག་ཁུག་(Folder) མཉེན་ཆས་སོགས་ལ་བལྟ་ཀློག་གི་དབང་ཚད་སྒྲིག་རྒྱུ་ཡོད་པ། ཡིག་ཆ་དང་གློག་ཀླད་ལ་སྐྱོན་ཆ་བྱུང་ན་བསྐྱར་གསོ་བརྒྱག་ཐུབ་པ། གསོག་ཚད་ཚད་བཀག་མེད་པ་སོགས་དེ་དང་དེ་མིན་གྱི་ཁྱད་ཕན་ཆེན་པོ་ཡོད།

NTFS དེ་སྐར་ཁུང་ 10 ནས་སྐར་ཁུང་ XP བར་ཐོན་པའི་གློག་ཀླད་ཀྱིས་ངོས་འཛིན་ཐུབ་ཀྱང་། NTFS ཅན་གྱི་སྲ་སྡེར་རམ་མཐེབ་སྡེར་ཞིག་ཀུ་ཤུ་དང་ལི་ནེཀ་སི་(Linux)གློག་ཀླད་ནང་བཅུག་སྐབས་སྲ་སྡེར་དང་མཐེབ་ནང་གི་ཡིག་ཆ་རྣམས་ལྟ་ཐུབ་ཙམ་ལས་ནང་ངོས་སུ་ཡིག་ཆ་བཟོ་མི་ཐུབ།

exFAT

exFAT ནི་ཕྱི་ལོ་ 2006 ལོར་གཏན་འབེབ་བྱས་པའི་ཡིག་ཆའི་རྒྱུད་ཁོངས་ཞིག་ཡིན་པ་དང་། དེ་སྔའི་སྐར་ཁུང་ XP དང་ Vista ལ་ཁ་སྣོན་བྱས་ཡོད། exFAT ནི་FAT32 གི་ཡིག་ཆའི་གཤོང་ཚད་ཀྱི་གནད་དོན་ནམ་སྐྱོན་ཆ་དེ་སེལ་ཐབས་གཙོ་བོར་དམིགས་པ་ལས་དེ་མིན་གྱི་ཁྱད་ཆོས་གཞན་མེད། exFAT ནི་NTFSལྟར་ཡིག་ཆའི་གཤོང་ཚད་ལ་ཚད་བཀག་མེད། འོན་ཀྱང་exFAT ལ་NTFS ལྟར་ཡིག་ཆའི་ཉེན་སྲུང་དང་བཀོད་སྒྲིག་བྱེད་པའི་ཡིག་ཆའི་དབང་ཚད་(file permission) དེ་དག་མེད།

གློག་ཀླད་དང་གློག་ཆས་འདྲ་མིན་ནང་ཁ་འབྱེད་ཐུབ་མིན་ལ་དཔྱད་ན།

  • གསོག་སྡེར་ཞིག་ NTFS ཐོག་འཇོག་ཡོད་ན། གསོག་སྡེར་དེ་སྐར་ཁུང་བདུན་པ་དང་དེའི་རྗེས་ཀྱི་སྐར་ཁུང་ཐོན་རིམ་གསར་གྲས་ཚང་མས་ཁ་འབྱེད་ཐུབ། འོནཀྱང་ཀུ་ཤུའི་གློག་ཀླད་དེང་དུས་གློག་ཆས་གཞན་དང་ཁ་པར་སོགས་ཀྱིས་ཁ་འབྱེད་མི་ཐུབ།
  • གསོག་སྡེར་ཞིག་ exFAT ཐོག་འཇོག་ཡོད་ན། གསོག་སྡེར་དེ་སྐར་ཁུང་བདུན་པ་དང་དེའི་རྗེས་ཀྱི་སྐར་ཁུང་གསར་པ་དེ་དག་གིས་ཁ་འབྱེད་ཐུབ། འོན་ཀྱང་སྐར་ཁུང་ XP དང་དེའི་གོང་གི་སྐར་ཁུང་རྙིང་པ། ཀུ་ཤུའི་གློག་ཀླད། དེང་དུས་གློག་ཆས་དང་ཁ་པར་སོགས་ཀྱི་ནང་ཁ་འབྱེད་མི་ཐུབ།
  • གསོག་སྡེར་ཞིག་ FAT32 ཐོག་འཇོག་ཡོད་ན། སྐར་ཁུང་གི་གློག་ཀླད་ཡོད་དོ་ཅོག་དང། དེང་དུས་ཀྱི་གློག་ཆས་ཁ་པར་སོགས་ཀྱི་ནང་ཁ་འབྱེད་ཐུབ། འོན་ཀྱང་ཀུ་ཤུའི་གློག་ཀླད་ནང་མི་ཡོང་།

མིང་ཚིག

Hard Disk / 硬盘 / སྲ་སྡེར།
Pen Drive / མཐེབ་སྡེར།
External Hard Disk / 外置硬盘 / ཕྱི་གསོག་སྲ་སྡེར།
Memory Card / 存储卡 / གསོག་ལྷེབ།
Folder / 文件夹 / ཡིག་ཁུག
File System / 文件系统 / ཡིག་ཆའི་རྒྱུད་ཁོངས།
File Permission / 文件权限 / ཡིག་ཆའི་དབང་ཚད།

Ubuntu ཁ་པར།

 

Ubuntu ནི་ Linux གི་རྒྱུད་ཁུངས་མ་ལག་གི་རིགས་གཅིག་ཡིན་པ་དང་། གློག་ཀླད་མང་པོའི་ནང་བེད་སྤྱོད་ཤུགས་ཆེ་ཤོས་ཡོད་པ་ཞིག་ཡིན། ལོ་ཤས་སྔོན་ Ubuntu ཚང་ལ་བསམ་བློ་གསར་པ་ཞིག་རྙེད་ཡོད། དེ་ནི་ཁོང་ཚོའི་གློག་ཀླད་ཀྱི་རྒྱུད་ཁུང་མ་ལག་འདི་མི་ཚང་མའི་ལག་ཐོག་ཁ་པར་ནང་བཅུག་ཐུབ་མིན་ཐད་ཡིན། ཁོང་ཚོར་བསམ་བློ་དེ་ལྟར་འཁོར་བའི་རྒྱུ་མཚན་ནི། ད་ལྟའི་ཆར་ཁ་པར་གྱི་ནང་ཁྲོལ་གྱི་ནུས་པ་ཡོངས་རྫོགས་གློག་ཀླད་གཅིག་གི་ནུས་ཚད་དང་ལྡན་པ་ཞིག་ཡིན། དཔེར་ན། གློག་ཀླད་གཅིག་ལ་ཉུང་མཐར་ RAM = 1GB དང་། ཁ་པར་ལ་ཡང་དེ་ལྟར་ཡོད། གློག་ཀླད་ལ་གསོག་སྡེར་ཡོད་པ་བཞིན་ཁ་པར་ལ་ཡང་གསོག་སྡེར་འཚབ་ཏུ་ microSD ཡོད། གློག་ཀླད་བྱ་རིམ་ལྟེ་བ་ (Processor ) ལ་ 1.5 GHz ཡོད་པ་ལྟར་ཁ་པར་ལ་ཡང་བྱ་རིམ་ལྟེ་བའི་ནུས་ཚད་ཀྱང་དེ་ལས་མཐོ་བ་དེ་འདྲ་ཡང་ཡོད། དེར་བརྟེན་ཆ་ག་ནས་བལྟས་ཀྱང་དེ་སང་གི་ཁ་པར་ནི་གློག་ཀླད་གཅིག་གི་ནུས་པ་དང་་ལྡན་ཡོད་ཞིག་རེད། འོན་ཀྱང་ཁ་པར་གྱི་ནང་ཁྲོལ་ནུས་ཚད་དེ་ལྟར་ཆེན་པོ་ཡོད་ཀྱང་ང་ཚོ་ད་ལྟ་བར་ཕན་ཚུན་ཁ་པར་གཏོང་རེས་བྱ་རྒྱུ་དང་། སྤྱི་ཚོགས་དྲ་འབྲེལ། འཕྲིན་ཐུང་དང་དཔར་བརྙན་བསྐུར་རེས། སྐབས་རེ་གློག་རྩེད་དང་། གློག་བརྙན་བལྟ་བ་སོགས་སྤྱིར་བཏང་གི་བེད་སྤྱོད་ཙམ་ལས་ཁ་པར་དེ་དག་གི་ནུས་པ་བརྒྱ་ཆ་ 50% ཡང་སྤྱོད་ཐུབ་ཀྱི་མེད་པ་རེད།

Ubuntu Phone ཡང་ན་ཨུ་བྷན་ཊུ་ཁ་པར་ནི་སྔར་རྒྱུན་ཁ་པར་གྱི་བྱེད་ལས་ཆ་ཚང་ཡོད་པའི་ཐོག་ད་དུང་ཁ་པར་སྒང་ལ་མངོན་ཆས་(Monitor)དང་། མཐེབ་གཞོང་། ཙི་ཙི་བཅས་མཐུད་དེ་གློག་ཀླད་ཀྱི་བྱེད་ནུས་གཉིས་ཀ་ཡོད་པ་ཞིག་ཆགས་ཀྱི་ཡོད། བཤད་སྟངས་གཞན་ཞིག་ནི། ཁྱེད་ཀྱི་ཁ་པར་དེ་རྒྱུན་གཏན་གྱི་ཁ་པར་ནང་བཞིན་སྦ་ཁུག་ནང་འཁུར་ཏེ་འགྲོ་རྒྱུ་ཡོད་ལ། ནང་གི་ལྕོག་ཙེའི་སྒང་ལ་བཞག་ནས་གློག་ཀླད་བཞིན་དུ་རྩོམ་ཡིག་བརྒྱག་པ་དང་དྲ་ཚིགས་དང་བརྙན་པར་བཟོ་བ་སོགས་བྱེད་ཐུབ་པ་ཡིན།

གཤམ་ང་ཚོས་ཨུ་བྷན་ཊུ་ཁ་པར་དེ་བེད་སྤྱོད་བྱེད་སྟངས་ཀྱི་དཔེ་མཆོན་བརྙན་འདི་ལ་ལྟ།


Ubuntu ལག་ཐོག་ཁ་པར་རིགས།

ཕྱི་ལོ་ 2013 ལོ་ནས་ཨུ་བྷན་ཊུ་གིས་ལག་ཐོག་ཁ་པར་སྟེང་ལས་གཞི་འགོ་བཙུགས་ཡོད་པ་དང་། ད་ལྟ་བར་ཚོད་ཆ་དང་། ལས་བསྐྲུན་གསར་པ་དེ་དང་མཉམ་ལས་བྱེད་རྒྱུར་ཁ་པར་བཟོ་གྲྭ་མང་པོ་དང་འབྲེལ་བ་བྱས་མཐར། ད་བར་ཨུ་བྷན་ཊུ་གི་ཁ་པར་སྤུད་དག་གསུམ་ཚོང་འགྲེམས་བྱེད་སྒོ་བཙུགས་ཐུབ་པ་བྱུང་ཡོད།

ཁ་པར་དེ་གསུམ་ནི། 2016 མ་ཟིན་སྔོན་ཙམ་ལ་བཟོས་པའི་ BQ Aquaris E5 HD དང་། BQ Aquaris E4.5 དེ་ནས་ཐོག་མར་བཟོས་པའི་ The Meizu MX4 བཅས་ཡིན། ཁ་པར་དེ་དག་གི་ནང་ཁྲོལ་གྱི་ཚད་གཞི་མཐོ་པོ་ལྡན་འདུག་པ་གཤམ་གྱི་དཔེ་རིས་ལས་གསལ་ཐུབ།




མིང་ཚིག

  • Ubuntu / ཨུ་བྷན་ཊུ། /
  • Processor / བྱ་རིམ་ལྟེ་བ། / 处理器 (བོད་རྒྱ་དབྱིན་གསུམ་ཆ་འཕྲིན་ལག་རྩལ་ཚིག་མཛོད་ལས་ Processor ལ་སྒྲིག་གཅོད་ཆས་བཀོད་འདུག་ཀྱང་གོ་བདེ་པོ་མིན་འདུག)
  • Monitor / མངོན་ཆས། / 显示器

ལག་འཕྲུལ་ཀུན་ལ་འགྲོ་བའི་སོ་སྔོན་མཐེབ་གཞོང་ Logitech K480

 

ག་ཐོག་ཁ་པར་ནང་འཕྲིན་ཐུང་མང་པོ་དང་བརྗོད་བྱ་མང་པོ་བཏག་དགོས་ན་ཉོབ་སྣང་སྐྱེ་གཞི་ཞིག་དང་དཀའ་ཚེགས་ཅན་ཞིག་ཀྱང་ཆགས་སྲིད། དེར་བརྟེན་ང་ཚོས་གློག་ཀླད་སྟེང་མཆོང་དགོས་པ་ཡང་སེ་ཡོང་གི་ཡོད། ཉེ་བའི་ལོ་ཤས་ནང་ལག་འཕྲུལ་དེ་དག་གི་སྟེང་ཡིག་བཏགས་ཐད་ཀར་བྱེད་རྒྱུར་སྟབས་བདེ་བསྐྲུན་ཆེད་བཟོ་ཚོང་ཁང་མང་པོས་སོ་སྔོན་གྱི་མཐེབ་གཞོང་འདྲ་མིན་འགྲེམས་ཚོང་བྱེད་འགོ་བཙུགས་ཡོད། ད་བར་ལག་འཕྲུལ་འདྲ་མིན་ཆེད་དུ་མཐེབ་གཞོང་ཆེ་ཆུང་རྣམ་པ་མང་པོ་ཐོན་ཡོད། དེ་དག་ཧ་ལམ་འདྲ་པོ་འདྲ་པོ་རེད་ལ། ཁ་པར་གཅིག་གི་སྟེང་ཡིག་བཏགས་བྱེད་ཐུབ་ཙམ་རེད། དེ་ཚོ་གང་རུང་གཅིག་ཉོས་ཏེ་སྤྱོད་ན་མ་འགྲིག་པ་མེད་སྙམ།

གལ་ཏེ་སྤྱོད་སྒོ་མང་བ་དང་། མཐུན་རྐྱེན་མང་པོ་འཛོམས་པ། སྤུས་ཚད་ལྡན་པ་ཞིག་ཉོ་འདོད་ན་འདིར་གུས་པས་སོ་སྔོན་གྱི་མཐེབ་གཞོང་གསར་པ་ཞིག་ཁྱེད་ལ་ངོ་སྤྲོད་བྱེད་ཀྱི་ཡིན། ཉེ་དུས་དྲ་ཐོག་འཚོལ་ཞིབ་བྱས་པའི་རྒྱུད་སོ་སྔོན་(Bluetooth)གྱི་མཐེབ་གཞོང་སྤུས་ལེགས་ཤིག་དྲ་ཐོག་ནས་ཚོང་རྒྱུ་འདུག །མཐེབ་གཞོང་དེ་ནི་ Bluetooth Logitec K40 ཟེར། མཐེབ་གཞོང་དེས་རྒྱུན་གཏན་གློག་ཀླད་ཆེད་དུ་སྤྱོད་ཐུབ་པ་མ་ཟད་ཨྱ་ཧྥོན་དང་། ཨན་ཌོ། སྐར་ཁུང་གི་ལག་ཐོག་ཁ་པར་དང་ལག་འཕྲུལ་ཚང་མ་མཉམ་དུ་བདེ་བླག་ངང་བེད་སྤྱོད་བྱེད་ཐུབ་ཀྱི་འདུག

སོ་སྔོན་གྱི་མཐེབ་གཞོང་དེ་ལ་དམིགས་བསལ་ཁྱད་ཆོས་ཁ་ཤས་ཡོད་པ་ནི།

  • དུས་གཅིག་ལ་ལག་ཐོག་ཁ་པར་གསུམ་མཉམ་དུ་མཐུད་ཐུབ་པ།
  • ཡི་གེ་བཏགས་པའི་སྐབས་ཁ་པར་དང་པོ་གཉིས་པ་གསུམ་པ་གང་རུང་འདེམས་ཏེ་ཡིག་བཏགས་བྱས་མཆོག
  • ཁ་པར་ནང་མཉེན་ཆས་ཁ་འབྱེད་རྒྱུ་དང་། བསྡུ་རྒྱུ། སྒོ་རྒྱག་པ་སོགས་མཐེབ་གཞོང་དེ་རང་ནས་བྱེད་ཆོག
  • མཐེབ་གཞོང་གི་ཆེ་ཆུང་རན་པ་དང་མཛུབ་གནོན་བདེ་བ།
  • མཐེབ་གཞོང་དེ་ལ་གློག་མེ་ Cell ཉོས་ཏེ་བཅུག་རྒྱུ་བཅས་འདུག
  • Amazon དང་ Ebay སོགས་དྲ་ཐོག་ནས་ཉོ་ན་ཨ་སྒོར་ $50 རེད་འདུག

བརྙན་ཐུང་འདིར་གཟིགས་ན་གསལ་བ་ཧ་གོ་ངེས།



གསལ་བཤད་ཞུ་རྒྱུ་ཞིག་ནི་མཐེབ་གཞོང་ཡག་པོ་དེ་ལྟར་ཡོད་ཀྱང་བོད་ཡིག་ཡག་པོ་བཏགས་རྒྱུར་རོགས་ཕན་ཇི་ཙམ་ཐུབ་མིན་མི་ཤེས། གལ་ཏེ་ཉོ་མཁན་འདྲ་ཡོད་ན། ཚོད་ལྟ་བྱས་ཏེ་བོད་ཡིག་བཏགས་ཐུབ་མིན་གུས་པར་གསུང་རོགས་ཞུ།

བསོད་ནམས་ཟླ་བའི་ wechat སྤྱི་སྟེགས།

 

སྤྱི་སྟེགས་དེ་བཞིན་བོད་གྲོགས་ཕུན་དབང་གིས་ལྷག་བསམ་བཟང་པོས་རོགས་རམ་གནང་ནས་བཟོ་ཐུབ་པ་བྱུང་ཁོང་ཉིད་ལ་སྙིང་ཐག་པ་ནས་ཐུགས་རྗེ་ཆེ་ཞུ།

ད་ནས་བཟུང་སྤྱི་སྟེགས་དེ་བཞིན་བོད་ཕྱི་ནང་གཉིས་ཀའི་ནང་གློག་ཀླད་དང་ཁ་པརསྐོར་གྱི་ཤེས་བྱའི་རིགས་སུ་འགྱུར་བའི་གུས་པའི་རྩོམ་ཡིག་དང་། དཔར་རིས། བརྙན་ཟློས་སོགས་སྤེལ་རྒྱུ་ཡིན་ན། རྒྱ་ཆེའི་དྲ་གྲོགས་ལྷན་རྒྱས་ནས་ཐུགས་འཁུར་དང་རྒྱབ་བསྐྱོར་གནང་རོགས་ཞུ།

སྤྱི་སྟེགས་མིང་གཞུང་ནི་ sonamdawa101 ཡིན། འཕྲིན་ཕྲན་གྱི་འཚོལ་བཤེར་བྱེད་སའི་ཐོག་ sonamdawa101 བཀོད་དེ་འཚོལ་བའམ། ཡང་ན། QR-Code Scanner བཤེར་ཆས་སྤྱད་དེ་མཉམ་བཞུགས་གནང་ཐུབ།

གཤམ་ལ་སྤྱི་སྟེགས་སུ་བཞུགས་སྟངས་སྟོན་ཡོད།


འཚོལ་བཤེར་ནང་ sonamdawa101 བཀོད་དེ་འཚོལ་ན་རྙེད་ཐུབ། དེ་ནས་ Follow ཟེར་བ་དེའི་ཐོག་གནོན།

འཛུལ་བཞུགས་ཟིན་པ་དང་། མཚམས་འདྲིའི་ཡི་གེ་ཤར་འོང་། གཤམ་འདིར་དཀར་ཆག་གི་ཚུལ་དུ་ INTRO (ངོ་སྤྲོད་) དང་ Design (སྒེར་གྱི་ཇུས་འགོད་ལས་གཞི།) དེ་ནས་ ARCHIVES (སྤེལ་ཟིན་པའི་རྩོམ་གྱི་ཡིག་ཚགས།) བཅས་ཡོད།

ཉིན་རེར་གློག་ཀླད་དང་ཁ་པར་སྐོར་གྱི་ཤེས་བྱའི་རྩོམ་ཡིག་དང། སློབ་ཁྲིད། དྲི་བ་དྲིས་ལན། ཆ་འཕྲིན་སྐོར་གྱི་གནས་ཚུལ་གསར་པ་མ་ལུས་ཁྱེད་ལ་དུས་ཐོག་ཏུ་འབྱོར་ཐུབ།

དྲ་གྲོགས་ལྷན་རྒྱས་ནས་གུས་པའི་སྤྱི་སྟེགས་དེ་བཞིན་བོད་མི་མང་པོར་ཕན་ཐོག་ཡོང་ཆེད་རྒྱ་ཁྱབ་ཏུ་རྒྱུད་སྤེལ་གནང་རོགས་ཞུ། ཐུགས་རྗེ་ཆེ།

ཡུ་ཊུབ་དྲ་གནས་ཐོག་ MP3 བཅུག་སྟངས།

 

ཡུ་ཊུབ་ནི་གློག་བརྙན་སྤེལ་སའི་སྟེགས་བུ་ཁྱབ་རྒྱ་ཆེ་ཤོས་དེ་ཡིན་པ་མ་ཟད་དྲ་ཚིགས་འདིའི་ཐོག་གཞས་ཉན་སའི་དྲ་ཚུགས་ལེགས་ཤོས་ཞིག་ཀྱང་ཆགས་ཡོད། ད་རེས་ང་ཚོས་ཡུ་ཊུབ་སྐོར་བཤད་མི་དགོས་པར་དྲ་ཚིགས་དེའི་ཐོག་ MP3 ཡིན་པའི་གཞས་གཅིག་སྟབས་བདེ་པོའི་ངང་ཇི་ལྟར་ཡར་བཅུག་ཐུབ་པའི་ཐབས་དེ་ཁྱེད་ལ་ངོ་སྤྲོད་བྱེད་ཀྱི་ཡིན། ཐབས་ཤེས་དེ་མི་མང་ཆེ་བས་ཤེས་ཀྱི་མེད།

དུས་རྒྱུན་མི་ཕལ་ཆེ་བས་གློག་བརྙན་བཟོ་སྒྲིག་བྱེད་ཆེད་ཀྱི་མཉེན་ཆས་དཔེར་ན། iMovie དང་ Window MovieMaker,  Adobe Premiere Pro, Final Cut Pro, Sony Vegas དེ་འདྲ་སྤྱད་དེ་ MP3 གཞས་ཞིག་དང་དེ་སྟེང་དཔར་ཞིག་སྣོན་ཏེ་བཟོ་སྒྲིག་བྱེད་ཀྱི་ཡོད། ལག་ལེན་དེ་མི་འགྲིག་པ་གང་ཡང་མེད་ཀྱང་། བཟོ་སྒྲིག་བྱེད་པའི་དུས་ཚོད་དང་དེ་ནས་ཡར་ཡུ་ཊུབ་ཏུ་བཅུག་རྒྱུར་དུས་ཚོད་མི་ཉུང་བ་ཞིག་གཏོང་དགོས་ཀྱི་ཡོད།

གཤམ་གྱི་ཐབས་ཇུས་འདི་སྤྱད་ན། གོང་གི་དུས་ཚོད་འགོར་བའི་ལས་རིགས་འདི་འདྲ་བྱེད་མི་དགོས། ཁྱེད་ལ་ MP3 གཅིག་དང་ JPG ཅན་གྱི་དཔར་གཅིག་དེ་ནས་ https://www.tunestotube.com དྲ་ཚིགས་དེའི་ཐོག་འགྲོ་ན་འགྲིག

དྲ་ཐོག་དེའི་སྟེང་ Connect YouTube Account ཟེར་བ་དེར་གནོན་ཏེ་རང་ཉིད་ཀྱི་ཡུ་ཊུབ་ཁ་བྱང་དྲ་གནས་གསར་པ་དེ་གཉིས་བར་མཐུད་དགོས་ཀྱི་ཡོད། དེར་བརྟེན་གཤམ་གྱི་རི་མོ་དེ་མངོན་ན་ Allow ཟེར་བ་དེ་འདེམས་དགོས།
དེ་ནས་ Upload file ལ་གནོན་ཏེ་གློག་ཀླད་ནང་ཡོད་པའི་ MP3 གཞས་སམ་སྒྲ་ལྡན་ཞིག་བཅུག་དགོས། MP3 ཡིག་ཆ་དེ་ 50MB ལས་མང་བ་ཡོང་མི་ཆོག

MP3 ཞིག་ཡར་བཅུག་ཚར་བ་དང་གོང་གི་ Upload Fiiles ཟེར་བ་དེ་གའི་ཐོག་ཡང་བསྐྱར་གནོན་ཏེ། འདྲ་དཔར་ཞིག་བཅུག་དགོས། འདྲ་དཔར་དེའི་ཆེ་ཆུང་ 1280x720px ཡིན་དགོས།

དེ་ནས་འོག་དེར་གཞས་ཀྱི་མིང(Title)་དང་། འགྲེལ་བཤད།(Description) གནད་ཚིག(Tag) འབྲི་ས་ཡོད། སྒེར་སྤྱོད་(Private)དང་ཡོངས་ཁྱབ་(Live) ཟེར་བའི་འདེམས་ག་གཉིས་ཡོད། དེ་གཉིས་ནི། སོ་སོ་གཅིག་པོས་བལྟ་ཐུབ་པ་བཟོ་རྒྱུ་དང། ཡང་ན་དྲ་ཐོག་མི་སུས་ཀྱང་ལྟ་ཐུབ་པ་བཟོ་དགོས་མིན་གྱི་འདེམས་ག་རེད། དེ་ཚོ་འགྲིག་ན། "I'm not a robot" ཟེར་བའི་དེར་གཅིག་གནོན་དགོས།

ཆ་ཚང་འཚར་བ་དང་ལམ་སེང་ཁྱེད་ཀྱི་ MP3 དང་འདྲ་དཔར་འདི་གཉིས་སྤྱད་དེ་ཡུ་ཊུབ་ཀྱི་གཞས་སྙན་རང་འགུལ་གྱིས་བཟོ་བཅུག་སྤེལ་གསུམ་གཅིག་ཅར་དུ་བྱེད་ཐུབ། བཟོས་ཟིན་པ་དང་ཡུ་ཊུབ་ཀྱི་དྲ་ཐག་ཁྱེད་ལ་ཤར་འོང་། དྲ་ཐག་དེར་གནོན་དང་གསར་དུ་བཅུག་པའི་གཞས་དེ་ལྟ་ཉན་བྱེད་རྒྱུ་ཆགས་ཡོད།

ཐབས་ཇུས་དེའི་མཁེ་ཕན་ཆེ་ཤོས་ནི་མཉེན་ཆས་གང་ཡང་མི་དགོས་པ་དང་། བཟོ་སྒྲིག་གི་དུས་ཚོད་གཏོང་མི་དགོས་པ། MP3 གཅིག་དང་འདྲ་དཔར་གཅིག་ཡོད་ན། དེ་མ་ཐག་ཡུ་ཊུབ་ཏུ་བཅུག་ཐུབ།

ཡུ་ཊུབ་ནང་བཅུག་ཟིན་པའི་གཞས་གཅིག་གི་དཔེ་མཚོན།

ཐབས་ཇུས་དེ་སྤྱད་ན་སྐྱོན་ཆའི་ཆ་འགའ་ཞིག་ནི། MP3 གི་ཡིག་ཆ་དེ་ 50MB སྒང་ལ་བསྒལ་མི་ཆོག །བཟོ་བཅུག་ཟིན་པའི་ཡུ་ཊུབ་གཞས་དེའི་སྟེར་ tunestotube གྱི་མིང་བྱང་ཞིག་འཇོག་གི་ཡོད་པ་བཅས་སོ།

དྲ་གནས་གཞན།

གོང་གི་ཞབས་ཞུ་དང་འདྲ་བའི་དྲ་ཚིགས་གཞན་གཅིག་ནི། http://tovid.io/ རེད། དེར་ཚོད་ལྟ་ཞིག་གནང་ནའང་འགྲིག